စိန္တေသိကိုမှ မကြံနိုင်ခင် ပုစ္ဆေသိ မေးပြန်သည်

စိန္တေသိကိုမှ မကြံနိုင်ခင် ပုစ္ဆေသိ မေးပြန်သည် ဟူသည်မှာ မြန်မာစကားပုံတစ်ခု ဖြစ်သည်။

ရှင်းလင်းချက်

ပထမပုစ္ဆာကို ဖြေဆိုရန် မစဉ်းစားရသေးခင် နောက်ထပ်တစ်ဖန် မေးပြန်သည် ဆိုသကဲ့သို့ တစ်စုံတစ်ခုကို ပြီးပြတ်အောင် မလုပ်ရသေးခင် အခြားတစ်ခု ပေါ်လာပြန်သည်။

ရှေးအခါက ရွာတစ်ရွာတွင် တောင်ကျောင်း၊ မြောက်ကျောင်းဟူ၍ ကျောင်းနှစ်ကျောင်းရှိရာ တောင်ကျောင်းသူတော်က မြောက်ကျောင်းဖိုးသူတော် ထံသွား၍ စကားပုစ္ဆာ ပြဿနာပြုလုပ်၍ ပုစ္ဆာအမေးထုတ်သည်မှာ “အသင် မြောက်ကျောင်းဖိုးသူတော်၊ စိန္တေသိဟူသော ပါဠိကို သင် သိလျှင် အနက်ပြန်စမ်းပါ” ဟု ဆိုသတတ်။ ထိုအခါ မြောက်ကျောင်းဖိုးသူတော်က ထိုပါဠိကို အနက်မပြန်နိုင်သဖြင့် ကြံမှိုင်စဉ်းစားနေဆဲအခါ တောင်ကျောင်းဖိုးသူတော်က“မြောက်ကျောင်းဖိုးသူတော်၊ အနက်ပေးနိုင်လျှင်ပေးပါ၊ ပုစ္ဆိဟူသော ပါဠိကလေးမေးစရာရှိပါသေးသည်၊ နှေးလှပါကလား”ဟု ဆိုလျှင် မြောက်ကျောင်းဖိုးသူတော်က တစ်ခုမပြီးသေးခင် တစ်ခုထပ်၍ မေးရမည်လောဟု စိတ်ဆိုးသော အားဖြင့် “စိန္တေသိ ကြံတုန်းရှိသေး၊ ပုစ္ဆိမေးပြန်ပြီ”ဟု ဆိုသတတ်။ ထိုအခါ တောင်ကျောင်းဖိုးသူတော်က “မြောက်ကျောင်းဖိုးသူတော်သည် ငါ၏ ပုစ္ဆာ ပြဿနာကို ကောင်းစွာဖြေစွမ်းနိုင်ပါသည်”ဟု ချီးမွမ်း၍ မိမိကျောင်းသို့ ပြန်သွားသတတ်။

မူလရင်းမြစ်

• "သွားချေးထူရာတွင် ပိန်းဥစားပြန်သည်ဆိုသကဲ့သို့လည်ကောင်း၊ စိန္တေသိကိုမှ မကြံနိုင်ခင်က ပုစ္ဆေသိ မေးပြန်သည် ဆိုသကဲ့သို့လည်းကောင်း" [၁၁၅၂-ခန့်] ကျည်း။ ၁၄၃။