ဂျိုးဇဖင်းမိဖုရား

ဝီကီပီးဒီးယား မှ
ဂျိုးဇဖင်းမိဖုရားကြီး

Joséphine de Beauharnais (အသံထွက်: [ʒo.ze.fin də‿bo.aʁ.nɛ]; ၂၃ ဇွန် ၁၇၆၃ – ၂၉ မေ ၁၈၁၄) သည် နပိုလီယန်၏ ပထမဆုံး ဇနီးဖြစ်ပြီး ပြင်သစ်နိုင်ငံ၏ ပထမဆုံး ဧကရီဖြစ်သည်။

ပြင်သစ်ဘုရင် နပိုလီယန်ဗိုနပတ်၏ ချစ်ဇနီး မာရီရိုဂျိုး ဇဖင်းသည် ပြင်သစ်ပိုင် အနောက်အိန္ဒိယကျွန်းစုတွင် အပါ အဝင်ဖြစ်သော မားတီနစ်ကျွန်း၌ ခရစ် ၁၇၆၃ ခုနှစ် ဇွန်လ ၂၃ ရက်နေ့တွင် ဖွားမြင်သည်။ ဂျိုးဇဖင်းသည် ရေကြောင်း တပ်စုဗိုလ်ကလေး ဂျိုးဇက်တရှဒီလာပါဇရီး၏သမီး ၃ ယောက် အနက် အကြီးဆုံးဖြစ်၍ ရုပ်ရည်ချောမွေ့လှပသည့်အပြင် ဉာဏ် ပညာလည်း ထက်မြက်သူ ဖြစ်၏။ ပေါင်းသင်းဆက်ဆံရေးတွင် လိမ်မာရေးခြားရှိသဖြင့် ပါရစ်မြို့ မျက်နှာကြီးပိုင်းတွင် ဝင်ဆံ့သူ တစ်ယောက်ဖြစ်ပေသည်။ ဂျိုးဇဖင်းသည် ဗိုင်းကောင့်အယ်လက် ဇန္ဒာဗိုးအာနဲနှင့် ပထမအိမ်ထောင်ပြုခဲ့၏။ ဗိုးအာနဲမှာ ပြင်သစ် တော်လှန်ရေးအတွင်း၌ အသတ်ခံရလေသည်။ ဂျိုးဇဖင်းကိုယ်တိုင် လည်း အချုပ်ခံရပြီး အသတ်ခံရမည့်ဘေးမှ လက်မတင်ကလေး လွတ်ခဲ့လေသည်။ ပထမအိမ်ထောင်ဖြင့် ဂျိုးဇဖင်းတွင် ယူဂျင်း ခေါ် သားတစ်ယောက်နှင့် ဟော်တင်းယူဂျင်းနီခေါ် သမီး တစ်ယောက် ကျန်ရစ်ခဲ့လေသည်။

မုဆိုးမချော ဂျိုးဇဖင်းသည် ဖော်ရွေမှုနှင့် လူမှုရေး နား လည်မှု သတင်းမှာ ပါရစ်မြို့တွင် ပျံ့နှံ့ခဲ့ရာ နောက်ဆုံး၌ ပြင်သစ်အမြောက်တပ်မှ အရာရှိကလေး နပိုလီယန်ဗိုနပတ်နှင့် ဆုံစည်းမိလေတော့သည်။ နပိုလီယန်သည် ဂျိုးဇဖင်းကို ကလေး ၂ ယောက်၏ မိခင်မုဆိုးမဖြစ်မှန်း သိသော်လည်း တကယ်ပင် ချစ်မြတ်နိုးလှသဖြင့် ၁၇၉၆ ခုနှစ် မတ်လ ၈ ရက်နေ့တွင် ထိမ်းမြား လက်ထပ်လိုက်လေ၏။ ဂျိုးဇဖင်းမှာ မိန်းမချော တစ်ယောက်ဖြစ်သောကြောင့် နပိုလီယန်နှင့် လက်ထပ်ခြင်းမှာ လူတကာ အတင်းပြောစရာအကြောင်း ဖြစ်သွားခဲ့၏။ ထိုကြောင့် နပိုလီယန် စစ်ထွက်နေစဉ်အတွင်း ဂျိုးဇဖင်းမှာ သယောက် လင်ငယ်များနှင့် အချစ်စခန်းဖွင့်လေ့ရှိသည်ဟု ဆိုကြသည်။ ထိုသတင်းဆိုးကို နပိုလီယန်ကြားသိသောအခါ ပြင်းစွာ အမျက် ထွက်သည်ဟုလည်း ဆိုကြ၏။ ထိုမှတစ်ပါး ဂျိုးဇဖင်းသည် သူ့ယောက်ျားကိုနိုင်သည့်အကြောင်းနှင့် စပ်လျဉ်းသောအကြောင်း အရာများ ပေါ်ထွက်လာခဲ့သော်လည်း မှန်သည်ဟု အထောက် အထားပြ၍ ပြောဆိုရန်ကား ခဲယဉ်းလှပေသည်။ သို့သော် နပိုလီယန်သည် ဂျိုးဇဖင်းနှင့် လက်ထပ်လိုက် သဖြင့် စိတ်ပျော်ရွှင် ချမ်းမြေ့မှု ရရှိခဲ့သည်မှာ အမှန်ပင်ဖြစ်လေ သည်။ ဂျိုးဇဖင်းမှာ အတန်ဉာဏ်ထက်မြက်သူဖြစ်ရာ နပိုလီယန် ကို အကြံကောင်းဉာဏ်ကောင်းများ ပေးလိမ့်မည်မှာ ယုံမှား ဖွယ်ရာ မရှိပေ။

နပိုလီယန်နှင့် လက်ထပ်ထိမ်းမြားပြီးနောက် ၁ဝ နှစ်အတွင်း ဂျိုးဇဖင်းသည် ပြင်သစ်အင်ပိုင်ယာ၏ ဧကရီမိဖုရားကြီး ဖြစ် လာသည်။ ၁၈ဝ၄ ခုနှစ်တွင် နပိုလီယန်ကိုယ်တိုင် ဂျိုးဇဖင်း အား သရဖူဆောင်းပေး၍ မိဖုရားအဖြစ် ဘိသိက်မြှောက်ခဲ့လေ သည်။ ဂျိုးဇဖင်းမှာ နပိုလီယန်နှင့် သားသမီး မရချေ။ ထိုအခါ နပိုလီယန်သည် သူ၏ထီးမွေနန်းမွေ ဆက်ခံမည့်သူ မရှိဘဲ သေဆုံးသွားမည်ကို၎င်း၊ ထိုသို့ သေဆုံးသွားလျှင် သူကြိုးပမ်း ပြုစုပျိုးထောင်ခဲ့သော နိုင်ငံတော်ကြီး ပျက်စီးသွားမည်ကို စိုးရိမ် မိလေသည်။ ထိုကြောင့် နပိုလီယန်က ထီးမွေနန်းမွေ ဆက်ခံ မည့်သူကို အလိုရှိသည်က တစ်ကြောင်း၊ ဥရောပတိုက်မှ အခြားသော ထီးဆောင်းမင်းတို့နှင့် ဆွေမျိုး ဆက်လိုသည်က တစ်ကြောင်း၊ အကြောင်းပြကာ သူအလွန် ချစ်မြတ်နိုးသော မိဖုရားကြီး ဂျိုးဇဖင်းကို ကွာရှင်း၍ ဩစတြီးယားမင်းသမီး မာရီလွီနှင့် လက်ထပ် ထိမ်းမြားလေသည်။ နပိုလီယန်နှင့် ကွာရှင်းခဲ့ပြီးနောက် ဂျိုးဇဖင်းသည် ပါရစ်မြို့အနီးရှိ လာမား မေဆွန်၌ နေထိုင်ခဲ့လေသည်။ နပိုလီယန်သည် ဂျိုးဇဖင်း၏ ထံသို့ တစ်ခါတစ်ရံ လာရောက်၍ အကြံကောင်းဉာဏ်ကောင်း များ တောင်းတတ်လေသည်။ နပိုလီယန်ကို အယ်လဗားကျွန်း သို့ ပို့ထားခဲ့သောကြောင့် ဂျိုးဇဖင်းက သူ့ကို နပိုလီယန်နှင့် အတူလာရောက် နေထိုင်ခွင့်ပြုပါမည့်အကြောင်း နပိုလီယန်ထံ စာရေးလိုက်လေသည်။ နပိုလီယန်က ထိုသို့ နေထိုင်ရန် မဖြစ် ကြောင်း စာပြန်လိုက်၏။ သို့သော် ဂျိုးဇဖင်းကား ထိုစာ မရောက်မီ ၁၈၁၄ ခုနှစ် မေလ ၂၉ ရက်နေ့တွင် ကွယ်လွန် လေသည်။


သားတော်ယူဂျင်းမှာ နပိုလီယန်လက်အောက်တွင် ဗိုလ်ချုပ် မှူးအဖြစ် သစ္စာရှိစွာ အမှုတော်ထမ်း၍ အီတလီပြည်၏ ဘုရင်ခံ ခေတ္တဖြစ်ခဲ့ဘူးလေသည်။ သမီးတော်ကား နပိုလီယန်၏ နောင် တော် ဟော်လန်ဘုရင် လူဝီနှင့် ထိမ်းမြား၍ တတိယမြောက် နပိုလီယန်ကို ဖွားမြင်လေသည်။

[၁]

ကိုးကား[ပြင်ဆင်ရန်]

  1. မြန်မာ့စွယ်စုံကျမ်း၊ အတွဲ(၃)