ဂေလ်ဂါမက်ရှ် ၏ မော်ကွန်း

ဂေလ်ဂါမက်ရှ်၏ မော်ကွန်းကို ရေးသားထားသော ရွှံ့ချပ်

ဂေလ်ဂါမက်ရှက်၏ မော်ကွန်း ( /ˈɡɪlɡəmɛʃ/ ) သည် ရှေးခေတ် မက်ဆိုပိုတေးမီးယား မှ မော်ကွန်းကဗျာ တစ်ပုဒ် ဖြစ်ပြီး ထင်ရှားသော စာပေများတွင် အစောဆုံး ကြွင်းကျန်ရစ်သော စာပေ အဖြစ်နှင့် ပိရမစ်မှစာများပြီးလျှင် ဒုတိယမြောက် အစောဆုံး ကြွင်းကျန်ရစ်သော ဘာသာရေးကျမ်းစာ များအဖြစ် သတ်မှတ် ကြသည်။ ဂေလ်ဂါမက်ရှ်၏ စာပေသမိုင်းသည် တတိယမြောက် အူရ်မင်းဆက်ခေတ် (ဘီစီ ၂၁၀၀) မှ အူရွတ်၏ ဘုရင် ဖြစ်သော ဘေလ်ဂါမက်ရှ် (ဆူမာရီးယန်းဘာသာဖြင့် ဂေဂါလ်မက်ရှ်) ၏ အကြောင်းကို ရေးဖွဲ့ထားသော ဆူမာရီးယန်း ကဗျာ ၅ ပုဒ်ဖြင့် စတင်ခဲ့သည်။ ထိုသို့ သီးခြားဖြစ်သော ဇာတ်လမ်းများကို အကေဒီယန် ဘာသာဖြင့် ရေးသားထားသော ပေါင်းစပ် မော်ကွန်းဇာတ်လမ်းကို ဖွဲ့တည်ရန် ရင်းမြစ် အဖြစ် နောင်တွင် အသုံးချကြသည်။ ထိုသို့ ပေါင်းစပ်ထားသော မော်ကွန်းဇာတ်လမ်း၏ ပထမဆုံး ကြွင်းကျန်ရစ်သောမူ အား "ဘေဘီလုံခေတ်ဟောင်း" မူ ဟု သိရှိကြပြီး ဘီစီ ၁၈ ရာစု တွင် ရေးသားခဲ့ခြင်း ဖြစ်ကာ သူ၏ ခေါင်းစဉ်စာသားပေါ် မူတည်၍ ရှူးတာ အယ်လီ ရှားရီ ("အခြားဘုရင်များထက် သာလွန်သူ") ဟု ခေါင်းစဉ်တပ်ကြသည်။ ထိုမူတွင် ရွှံ့ ချပ်ပြား အနည်းငယ်သာ ကြွင်းကျန်ရစ်သည်။ နောက်ပိုင်းမူကွဲ ဖြစ်သော ၁၃ ရာစု ဘီစီ နှင့် ၁၀ ရာစု ဘီစီ အတွင်း ရေးသားခဲ့ပြီး စင်း-လဲကီ-အူနင်နီ ပေါင်းစပ်ခဲ့သော ဘေဘီလုံစံနှုန်းမူ ဖြစ်သည့်မူတွင်မူ ရှား နက်ဘာ အိုင်မူရူး ("ချောက်ကမ်းပါး အနက်ကို မြင်သူ" ခေတ်စကားဖြင့် "မသိနိုင်သော အရာများကို မြင်သူ") ဟု ခေါင်းစဉ်တပ်ထားသည်။ ရွှံ့ချပ် ၁၂ ချပ်ရှိသော ထူမူတွင် သုံးပုံနှစ်ပုံခန့်ကို ရှာဖွေတွေ့ရှိခဲ့သည်။ အကောင်းဆုံး ထုတ်လုပ်သော မူ အဖြစ် ရှာဖွေ တွေ့ရှိခဲ့သည်မှာ ဘီစီ ၇ ရာစု အဆီးရီးယားဘုရင် အက်ရှာဘာနီပေါလ် ၏ စာကြည့်တိုက် အပျက်အစီးများမှ ဖြစ်သည်။

ဇာတ်လမ်း၏ ပထမတစ်ဝက်တွင် အူရွတ်၏ ဘုရင် ဂေလ်ဂါမက်ရှ်အား အူရွတ်ရှိ ပြည်သူများကို ညှဉ်းပန်းနှိပ်စက်ခြင်းမှ ရပ်တန့်စေရန် အတွက် နတ်ဘုရားများက ဖန်တီးထားသော လူရိုင်း အန်ကီဒူး အကြောင်းဖြင့် စတင်ဆွေးနွေး တင်ပြထားသည်။ အန်ကီဒူးအား ပြည့်တန်ဆာမတစ်ဦးနှင့် လိင်ဆက်ဆံစေကာ လူဇာတ်သွင်းပြီးနောက် သူသည် အူရွတ်သို့ သွားရောက်ကာ ဂေလ်ဂါမက်ရှ်အား ခွန်အားစမ်းသပ်ရန် စိန်ခေါ်ခဲ့သည်။ ထိုပြိုင်ပွဲတွင် ဂေလ်ဂါမက်ရှ် အနိုင်ရခဲ့သည်။ မည်သို့ပင်ဆိုစေကာမူ သူတို့နှစ်ဦးသည် သူငယ်ချင်းဖြစ်ခဲ့ကြသည်။ သူတို့သည် ဒဏ္ဍာရီဆန်သော စီဒါသစ်တောသို့ ခြောက်ရက်တာ ခရီးရှည် အတူတူ ထွက်ခဲ့ကြပြီး ထိုနေရာတွင် အစောင့်အရှောက် အဖြစ်နေထိုင်သော ကြောက်မက်ဖွယ် ဟမ်ဘာဘာကို သတ်ရန် နှင့် မြင့်မြတ်သော စီဒါသစ်ပင်များကို ခုတ်လှဲရန် အတွက် ဖြစ်သည်။ နတ်ဘုရားမ အစ်ရှတာသည် သူမအား နှောင့်ယှက်သောကြောင့် ဂေလ်ဂါမက်ရှ် ကိုအပြစ်ပေးရန် ကောင်းကင်ဘုံ ၏ နွားသိုးကို စေလွှတ်ခဲ့သည်။ ဂေလ်ဂါမက်ရှ်နှင့် အန်ကီဒူး တို့က ကောင်းကင်ဘုံ ၏ နွားသိုး ကို သတ်ခဲ့ပြီးသည့်နောက် နတ်ဘုရားများက အန်ကီဒူးအား သေဒဏ်ချမှတ်၍ သတ်ပစ်ရန် ဆုံးဖြတ်ခဲ့ကြသည်။

ဇာတ်လမ်း၏ ဒုတိယတစ်ဝက်တွင် အန်ကီဒူး ၏သေဆုံးမှုကြောင့် စိတ်ဓာတ်ကျဆင်းနေသော ဂေလ်ဂါမက်ရှ် သည် ထာဝရအသက်၏ လျှို့ဝှက်ချက်ကို ရှာဖွေတွေ့ရှိရန် ရှည်လျားပြီး အန္တရာယ်များသော ခရီးကို လျှောက်လှမ်းခဲ့သည်။ နောက်ဆုံးတွင် သူသည် "သင်ရှာနေသည့် ဘဝအား သင်ဘယ်တော့မှ ရှာမတွေ့နိုင်တော့ကြောင်း။ အကြောင်းမှာ ဘုရားတို့သည် လူကို ဖန်ဆင်းသောအခါ သေခြင်းတရားကို သူ၏ ရှယ်ယာ အဖြစ် ရယူထားပြီး ဘဝကို သူတို့၏ လက်ထဲတွင် ဆုပ်ကိုင်ထားသည်" ဆိုသည့် အကြောင်းကို သိရှိခဲ့သည်။ မည်သို့ပင်ဆိုစေကာမူ၊ သူ၏ကြီးမားသော အဆောက်အဦး စီမံကိန်းများကြောင့် လည်းကောင်း၊ စီဒူရီ၏ အကြံပေးချက်နှင့် ပတ်သက်သော သူ၏ မှတ်တမ်းနှင့် မသေနိုင်သောလူသား အုနပ်ပစ်ရှ်တင်က သူ့ကို ပြောပြခဲ့သော မဟာ ရေလွှမ်းမိုးမှုကြီး အကြောင်းတို့ကြောင့် ဂေလ်ဂါမက်ရှ် ၏ကျော်ကြားမှုသည် သူသေဆုံးပြီးနောက် အထိ ကျန်ရစ်ခဲ့ပြီး ဂေလ်ဂါမက်ရှ် ၏ ဇာတ်လမ်းကို စိတ်ဝင်စားမှုများ တိုးပွားလာခဲ့ကာ ဘာသာစကား များစွာသို့ ပြန်ဆိုခဲ့ပြီး လူကြိုက်များသော စိတ်ကူးယဉ်ဝတ္တုများတွင် ထည့်သွင်း ဖော်ပြခဲ့ကြသည်။

ထိုဇာတ်လမ်းသည် သူရဲကောင်းဇာတ်လမ်းများ၏ ထုံးစံ အဖြစ် အုတ်မြစ်ချပေးခဲ့သော လက်ရာတစ်ခုဟု သတ်မှတ်ခဲ့ကြပြီး ဂေလ်ဂါမက်ရှ်သည် နောက်ပိုင်းတွင် ထွက်ပေါ်လာသော ဟာကျူလီ ကဲ့သို့သော သူရဲကောင်းများ အတွက် နမူနာပုံစံ ဖြစ်ခဲ့ပြီး ဇာတ်လမ်းကိုယ်တိုင်ကပင် ဟိုးမား၏ မော်ကွန်းဇာတ်လမ်းများ အထိ လွှမ်းမိုးမှု ရှိခဲ့သည်။