ခါးတောင်းကျိုက်
ခါးတောင်းကျိုက်ဟူသည် ဝတ်ဆင်ထားသော ပုဆိုး၏ ရှေ့စကို အောက်မှယူ၍ ခါးနောက်၌ ညှပ်သည်ကို ခေါ်သည်။ ဤသို့ပြုလုပ်သည်ကို အောက်တောကျိုက်၊ အောက်ပိုးကျိုက် ဟုလည်း ခေါ်ဆိုသေးသည်။ ယင်းစကားတို့အနက် အောက်တောကျိုက်ကို ဝဏ္ဏဗောဓနသတ်အင်းတွင် အစောဆုံးတွေ့ရသည်။ ခါးတောင်းကျိုက်ကို ဘိုးတော်မင်းတရား လက်ထက်တွင်ရေးသော ဘလ္လတိယပျို့ တွင် တွေ့ရ၍ အောက်ပိုးကျိုက်မှာ နောက်ဆုံးပေါ် ဖြစ်ဟန်တူသည်။ ယုဒသန်အဘိဓာန်နှင့် တကွ ခေတ်အဘိဓာန်၊ သတ်ပုံကျမ်းဟူသ၍ တွင် ခါးတောင်းကျိုက် ဟူ၍ တညီတညွတ်တည်း အရေးနှင့် အနက်ကို ပြလျက် ရှိသော်လည်း ထိုစကား၏ ဇာစ်မြစ်ကို မည်သူမျှ သိခဲ့ပုံမပေါ်ပေ။ ခတောင်းကျိုက်သည် မွန်ဘာသာမှ လာသော စကားဖြစ်သည်။ မွန်ဘာသာတွင် ခ္ဍန် ဟုရေး၍ ခဒေါန်း ဟု ဖတ်ရွတ်သော စကားနှင့် က္ဍန် ဟုရေး၍ ကဒေါန် ဟု ဖတ်ရွတ်ရသော ပုဒ်တူပင်ဖြစ်၍ ကျဉ်းစေ၊ ကျုံ့စေ၊ ကျဉ်းမြောင်းစေ ဟုဖြစ်သည်။ ဂ္လိက် ဟုရေး၍ က္လိုတ် ဟု ဖတ်ရသော စကားမှာ ပုဆိုး ဖြစ်သည်။ ဤစကားတို့တွင် ခ္ဍန်(ခဒေါန်း) မှာ မြန်မာဘာသာ ခတောင်း ဖြစ်၍၊ ဂ္လိက်(က္လိုက်)မှ ကျိုက်သို့ဖြစ်လာသည်။ မွန်ဘာသာတွင် ကဒေါန်းကြိက် ဆိုသော ကျဉ်းမြောင်း၊ ကျပ်တည်း စကားရှိသေးသော်လည်း ယင်းစကားနှင့် မြန်မာဘာသာ ခတောင်းကျိုက် တို့မှာ အသံ၌ရော အနက်၌ပါ မကိုက်ညီဟု ဆိုရပေမည်။ ထို့ကြောင့် မြန်မာဘာသာ ခတောင်းကျိုက် ဆိုသောစကားသည် မွန်ဘာသာ ခ္ဍဂ္လိက် မှ လာ၍ တိုက်ရိုက်အနက်မှာ ပုဆိုးကို ကျဉ်းကျုံ့စေ ကျဉ်းမြောင်းစေ ဟုဖြစ်သည် ဆိုရာ၏။ [၁]
ပြင်ပလင့်ခ်များ[ပြင်ဆင်ရန်]
ကိုးကား[ပြင်ဆင်ရန်]
- ↑ ဦးဖိုးလတ် ရေး၊ မြန်မာစကား အဖွင့်ကျမ်း (ပတွဲ)၊ မြန်မာအဘိဓာန်ဋီကာ၊ စာ- ၁၃၀၊ ၁၉၆၂-ခု