ကြောင်တစ်သက် ကြက်တစ်မြုံ

ကြောင်တစ်သက် ကြက်တစ်မြုံ ဟူသည်မှာ မြန်မာစကားပုံတစ်ခု ဖြစ်သည်။

ရှင်းလင်းချက်

ကြောင်တစ်ကောင်ကြောင့် ကြက်တစ်မြုံလုံး ပျက်စီးရသကဲ့သို့ အနိုင်အထက်ပြုသူတစ်ဦးကြောင့် အားမဲ့သူများ ပျက်စီးဆုံးရှုံးသည်။

ရှေးအခါက သူကြွယ်မတစ်ဦးသည် အရွယ်ရောက်လာသော သားအား သင့်လျော်သော အမျိုးသမီးတစ်ဦးနှင့် လက်ထပ်ထိမ်းမြားပေးရာ ကာလအတန်ကြာသည့်တိုင် သားသမီးမထွန်းကားသဖြင့် အခြားအမျိုးသမီးတစ်ဦးနှင့် လက်ဆက်စေပြန်သည်။ ပထမဇနီးက ဒုတိယဇနီးအား သားသမီးမထွန်းကားစေလိုသဖြင့် ပဋိသန္ဓေပျက်စီးအောင် အကြိမ်ကြိမ် ပြုလေသည်။ ထို့ကြောင့် ဒုတိယဇနီးသည် သေဆုံးရလေသည်။ မသေဆုံးမီ ဒုတိယဇနီးသည် ပထမဇနီးအား လက်စားချေနိုင်စေကြောင်း ဆုတောင်းခဲ့ရာ ကြောင်မ ဖြစ်သောဘဝ၌ ပထမဇနီးသည်က ကြက်မ ဖြစ်၍ ပေါက်သမျှ ကြက်ကလေးများကို ကြောင်က စားပစ်လေ၏။ ကြက်က တစ်ဖန် လက်စားချေနိုင်ကြောင်း ဆုတောင်းပြန်ရာ ကျားမဖြစ်လာ၍ ၎င်း၏ငြိုးဘက်သမင်မ မွေးသမျှ သမင်များကို စားပြန်လေ၏။ သမင်မက တစ်ဖန် လက်စားချေနိုင်ရန် ဆုတောင်းပြန်ရာ နောင်ဘဝတွင် ဘီလူးမဖြစ်၍ ငြိုးဘက်မိန်းမ မွေးလာသမျှ သားများကို လုယူစားပြန်လေသည်။

အခြားအသုံးအနှုန်း

• ကြောင်တစ်သက် ကြွက်တစ်မြုံ ဟူ၍လည်း အသုံးရှိသည်။

မူလရင်းမြစ်

• "မျက်မာန်မရှေး၊ ဘ ရင်သွေးအား၊ လုပ်ပေးကြံရှာ၊ လျာကာသို့အောင်၊ ညှာတာရှောင်လည်း။ ကြောင်နှင့် ကြက်မြုံ၊ ပမာတုံသား၊ ထုံးပုံပြင်ကို၊ နတ်ရှင်မှတ်ပြီး၊" [၈၃၄] ပြည်စုန် * ၈။
• "ကြောင်တစ်သက်ပုံ၊ ကြွက်တစ်မြုံသို့၊ ကြုံလာချေမင့်၊ သင်းသေမှမြန်စွာ၊ ပြည်ထဲရေး သာတော့မည်။" [၁၂၂၅ ခန့်] ဝိဇယ။ ၁၅။