အာချီဗား ဂျိုးဇက် ကရိုနင်

ဝီကီပီးဒီးယား မှ
(ကရိုနင်၊ အာချီဗား ဂျိုးဇက် မှ ပြန်ညွှန်းထားသည်)
အေ ဂျေ ကရိုနင်
၁၉၃၁ ခုနှစ်ကတွေ့ရသော ကရိုနင်
မွေးဖွားArchibald Joseph Cronin
(1896-07-19)၁၉ ဇူလိုင်၊ ၁၈၉၆
Cardross,Dunbartonshire,[၁] စကော့တလန်
ကွယ်လွန်၆ ဇန်နဝါရီ၊ ၁၉၈၁(1981-01-06) (အသက် ၈၄)
Montreux, ဆွစ်ဇာလန်
အလုပ်အကိုင်ဆရာဝန်၊ စာရေးဆရဦ

နာမည်ကျော် ဗြိတိသျှ စာရေးဆရာကြီး အေ၊ ဂျေ၊ ကရိုနင် (အင်္ဂလိပ်: Archibald Joseph Cronin) ကို စကော့တလန်ရှိ ဒန်ဘာတန်ပြည်နယ်၊ ဟယ်လင်ဘတ်မြို့ လေးတွင် ၁၈၉၆ ခုနှစ် ဇူလိုင်လ ၁၉ ရက်နေ့တွင် မွေးဖွားသည်။ ကရိုနင်သည် ဂလစ်စဂိုတက္ကသိုလ်တွင် ဆေးပညာကို ဆည်းပူး၍ ခွဲစိတ်ဆရာဝန် အဖြစ်လည်းကောင်း၊ သတ္တုတွင်း ဆိုင်ရာ ဆေးမှူးတာဝန်ကိုလည်းကောင်း ၁၉၃ဝ ပြည့်နှစ်အထိ ထမ်းဆောင်သည်။ ၁၉၃ဝ ပြည့်နှစ်မှစတင်၍ စာရေးဆရာ ဖြစ်လာသည်။

ကရိုင်နင်သည် ကုန်သည်တစ်ဦး၏ တဏှာလောဘဇောကို ရေးဖွဲ့ထားသည့် 'ဟက်တာ၏ ရဲတိုက်ကြီး' ဝတ္ထု(၁၉၃၁)ကို ပထမဆုံးထုတ်ဝေခဲ့ရာ တစ်ဟုန်ထိုးကျော်ကြားခဲ့သည်။ အများ အကျိုးပြုလုပ်ငန်းများ ဆောင်ရွက်ရန် လှုံ့ဆော်ထားသော 'ဧကရာဇ်နိုင်ငံတော်၏ သော့ချက်များ'(၁၉၄၁)ဝတ္ထုတွင်တရုတ် ပြည်၌ သာသနာပြုခဲ့သူ ကက်သလစ်ဘုန်းတော်ကြီးတစ်ပါး၏ ကိုယ်ကျိုးစွန့်လျက် သာသနာရေးကိစ္စဆောင်ရွက်ပုံများကို ရေးသားခဲ့သည်။

'စပိန်ဥယျာဉ်မှူး' (The Spanish Gardener) ဝတ္ထု (၁၉၅ဝ)တွင် အဖေတစ်ခု၊ သားတစ်ခုဖြစ်နေသော အမေရိကန်စစ်ကောင်ဝန် သားအဖနှင့် သံယောဇဉ် ငြိတွယ်လာခဲ့ရသည့် စပိန်ပြည်သား ဥယျာဉ်မှူး လူငယ်တစ်ယောက်၏ သနားဖွယ်ကောင်းသော ဘဝကို ဖော်ကျူးထားသည်။

အေ၊ ဂျေ၊ ကရိုနင်၏ ကိုယ်ရေးအတ္ထုပ္ပတ္တိဟု ဆိုစမှတ်ပြု ကြသည့် 'နှစ်လောကမှ စွန့်စားခန်းများ' (The Adventures in the two worlds) ဝတ္ထု (၁၉၅၂)တွင် ကျောင်းစရိတ်ရအောင် အသက်မွေးဝမ်းကျောင်းပြုခဲ့ရသည့် ဆေးခန်းစာရေးဘဝ၊ လီဗာပူမြို့မှ ကာလကတ္တားမြို့သို့သွားသော ရာဝင်ပင်ဒါသင်္ဘောပေါ်မှ ယာယီသင်္ဘောဆရာဝန်ဘဝ၊ စကော့ တလန်ရွာငယ် တန်နော့ဘရေးတွင် လက်ထောက်ဆရာဝန်ဘဝ၊ ပျားရည်ဆမ်းခရီး ပထမဆုံးညမှာပင် တာဝန်စတင်ထမ်းဆောင် ရသည့် ထရီဂျင်နီကျောက်မီးသွေးမိုင်းတွင်း ဆရာဝန် ဘဝ၊ လန်ဒန်မြို့ပေါ်တွင် ထင်ပေါ်ကျော်ကြားလာသော ဆရာဝန်ဘဝ တို့တွင် တွေ့ကြုံရသမျှကို စိတ်လှုပ်ရှားဖွယ်၊ ကြည်နူးဖွယ်၊ လေးစားဖွယ်၊ စက်ဆုပ်ဖွယ် ရသစုံဖြင့် ခြယ်မှုန်း တင်ပြထား သည်ကို တွေ့ရသည်။ ဆရာဝန်ဘဝတလျှောက် တွေ့ကြုံသိခဲ့ရ သော လူ့စရိုက်၊ လူ့သဘာဝကို ဝတ္ထုများရေးဖွဲ့လိုသော ဆန္ဒကြောင့်ပင် စာရေးဆရာဖြစ်လာရသည်ဟု ဖွင့်ဟထားသည်။ ထိုစာအုပ်တွင် ဆရာဝန်လောကနှင့် စာပေလောကဟူသော နှစ်လောက၌ လှုပ်ရှား ရုန်းကန်ခဲ့ရသည့် မိမိဘဝခရီးကို မှတ်တမ်းပြု ထားသည်။

'စိမ်းလန်းသောနှစ်များ'၊ 'ဤနေရာမှအလွန်' (Beyond This Place)၊ 'ဂီတစာဆိုလေး'၊ 'ကရူးဆိတ်သူရဲကောင်းများ၏ သင်္ချိုင်းဂူ' 'ကြက်သွေးရောင်ပန်းများနှင့် မိန်းမပျို'ဝတ္ထုများသည်လည်း ထင်ရှားသည်။ 'ဂျူပီတာ ရယ်သည်'အမည်ရှိ ပြဇာတ်ကို ရေးခဲ့သည်။ သတ္တုတွင်း အလုပ်သမားများ၏ ဘဝနှင့် အလုပ်ခွင်၊ မေတ္တာရေးရာ ဖြစ်ရပ်များ၊ တိုက်ပွဲများနှင့် နာကြည်းဖွယ် အတွေ့အကြုံများကို ဖော်ကျူးထားသည့် 'ကြယ်အပေါင်းတို့ငုံ့ကြည့်သည်'ဝတ္ထု ဆေးကျောင်းဆင်းစ၌ သတ္တုတွင်းဆရာဝန်ဖြစ်လာသော ဒေါက်တာ အင်ဒရူးမန်စင်ဆိုသူ၏ ယောင်ချာချာဘဝနှင့် လန်ဒန်မြို့လူတန်း စားတွင် ဝင်ဆံ့ခွင့်ရလာသော ဆရာဝန်ဘဝတို့ကို နှိုင်းယှဉ် ရေးဖွဲ့ထားသည့် 'နန်းမြို့ရိုး' (Citadel) ဝတ္ထုစသည်တို့ကို ရုပ်ရှင်ရိုက်ကူးခဲ့ ရသည်။

အေ၊ ဂျေ၊ ကရိုနင်ရေးသော 'ယုဒသစ်ပင်'ဝတ္ထုတွင် ငယ်စဉ်က မိဘသေဆုံးခဲ့၍၊ ချို့ငဲ့စွာ ပညာသင်ခဲ့ရသော စိတ်ကောင်းရှိသည့် ဆရာဝန်လူတော်ကလေးတစ်ယောက်က မွန်မြတ်သော ရည်မှန်းချက်ဖြင့် ရိုးသားစွာ အလုပ်လုပ်လိုပါ သော်လည်း၊ စည်းစိမ်ဥစ္စာ၊ လောကီအာရုံ ကာမဂုဏ်တို့၏ ဖြားယောင်းမှုကို ခံရသောအခါ သစ္စာယွင်းပျက်၍ ကြေကွဲဖွယ် ဇာတ်လမ်းသွားရပုံကို စွဲမက်စရာ ရေးသားခဲ့သည်။၁၉၂ဝ ပြည့်နှစ်များတွင် ဗြိတိန်နိုင်ငံ သတ္တုတွင်းလုပ်သား များ၏ ကျန်းမာရေးဆိုင်ရာ ပြန်တမ်းနှစ်စောင်ကို အစိုးရ အတွက် ပြုစုထုတ်ဝေခဲ့သည်။ ပထမကမ္ဘာစစ်အတွင်းတွင် ကရိုနင်သည် ခွဲစိတ်ကုဆရာဝန်အဖြစ် အမှုထမ်းပြီး ဒုတိယကမ္ဘာစစ် အတွင်း၌ အမေရိကန်ပြည်ထောင်စုရှိ ဗြိတိသျှပြန်ကြားရေး ဌာန၌ အမှုထမ်းသည်။ ထို့နောက် ပြင်သစ်နိုင်ငံရီးဗီးယားရား၌ နေထိုင်သည်။ ၁၉၅၅ ခုနှစ်မှစ၍ ဆွစ်ဇာလန်နိုင်ငံသို့ ပြောင်း ရွှေ့ခဲ့သည်။ ကရိုနင်သည် ဗိုဒွိုင်းကောလိပ်နှင့် လာဖရက် ကောလိပ်တို့မှ စာပေပါရဂူဘွဲ့ အပ်နှင်းခြင်းခံရသည်။ ဓနဥစ္စာခုံမင်မှုမရှိပဲ ရိုးသားစွာနေတတ်သော ကရိုနင်သည် ဆွစ်ဇာလန်နိုင်ငံ မွန်ထရက်မြို့၌ ၁၉၈၁ ခုနှစ်၊ ဇန်နဝါရီလ ၆ ရက်နေ့တွင် ကွယ်လွန်သည်။ [၂]

မြန်မာ ဘာသာပြန်များ[ပြင်ဆင်ရန်]

အေဂျေကရိုနင်၏ အောက်ပါဝတ္ထုရှည်များကို မြန်မာဘာသာသို့ ပြန်ဆိုဖူးသည်။[၃]

စဉ် မူရင်း ဝတ္ထုအမည် မြန်မာပြန် ဝတ္ထုအမည် ဘာသာပြန်သူ ပြန်ဆိုနှစ် ပုံနှိပ်တိုက်
The Northern Light ဥတ္တရအလင်း ဝင်းတင် ၁၉၇၉
The Citadel ရဲတိုက် မောင်ထွန်းသူ
Beyond This Place တစ်ကျွန်းစံ၏ အပြန်လမ်း ထင်လင်း
The Judas Tree အဆိပ် ထင်လင်း ၁၉၈၁ စာပေဗိမာန်
The Spanish Gardener အကျဉ်းစံ မောင်ထွန်းသူ
The Stars Look Down ကြယ်စင်များက ကြည့်နေသည် မောင်ထွန်းသူ
Adventures in Two Worlds နှစ်လောက မောင်ထွန်းသူ
Three Loves အနန္တမေတ္တာ မောင်ထွန်းသူ
The Keys of the Kingdom သစ္စာရှင် မောင်ထွန်းသူ
၁၀ Grand Canary ချစ်သွေးသစ္စာ မောင်ထွန်းသူ
၁၁ The Green Years အစိမ်းရောင်နှစ်များ မောင်ထွန်းသူ

ကိုးကား[ပြင်ဆင်ရန်]

  1. Before 16 May 1975 Cardross was in Dunbartonshire
  2. မြန်မာ့စွယ်စုံကျမ်း၊ အတွဲ(၁)
  3. https://www.facebook.comstoryphp?story_fbid=227229461137569&id=100015515507251