ကမ္ဘာမကြေဘူး
ကမ္ဘာမကြေဘူး သီချင်းသည် တေးရေးဆရာ နိုင်မြန်မာ (နိုင်မြင့်ဦး)က အမေရိကန် ရော့ဂီတဝိုင်း "ကန်ဇာ့စ်" အဖွဲ့၏ နာမည်ကျော် ၁၉၇၇ ခုနှစ်တွင်ထွက်ရှိခဲ့သော Dust in the Wind သီချင်းသံစဉ်ကို မြန်မာစာသားသွင်းရေးသားခဲ့ပြီး[၁] ရှစ်လေးလုံးအရေးတော်ပုံမှ စတင်ကာ မြန်မာနိုင်ငံ၏ ဒီမိုကရေစီတက်ကြွလှုပ်ရှားမှုဖြစ်စဉ်များတွင် အရေးပါထင်ရှားလာခဲ့သည့် သီချင်းတစ်ပုဒ် ဖြစ်သည်။[၂] ၂၀၂၁ မြန်မာနိုင်ငံစစ်အာဏာသိမ်းခံရခြင်းဖြစ်စဉ်တွင် အာဏာရှင်ကိုဆန့်ကျင်ရာ၌ တကျော့ပြန်ခေတ်စားလာခဲ့သော သီချင်းလည်းဖြစ်သည်။[၃]
ရေးသားခြင်း[ပြင်ဆင်ရန်]
ကမ္ဘာမကြေဘူးသီချင်းကို တေးရေးဆရာနိုင်မြန်မာက Dust in the Wind သီချင်း၏ သံစဉ်ကိုယူ၍ စာသားသွင်းရေးသားခဲ့သည်။ ဂီတပုံစံသည် ရော့ခ်အပျော့စားပုံစံဖြစ်၏ ။[၄] တေးရေးဆရာက သီချင်းကို ဖော်ပြရာ၌ ကိုယ်ပိုင်သံစဉ်ဖြစ်သင့်သော်လည်း ထိုခေတ်အခါက စိတ်အေးအေးလူလူဖြင့် သီချင်းအသစ်တစ်ပုဒ်ဖန်တီးရန် အချိန်မရနိုင်ခဲ့ပါဟု ဆိုသည်။ ၁၉၈၈ စက်တင်ဘာ ၁၈ မတိုင်မီ ရက်အနည်းငယ်တွင် ဤသီချင်းပေါ်ထွက်လာခဲ့ကာ မူရင်းသီဆိုသောသူများမှာ ဂီတလောကမှ အနုပညာရှင်များမဟုတ်ဘဲ ကျောင်းသူကျောင်းသား (၁၃) ဦးဖြစ်သည်။ ဂီတတီးခတ်သူများမှာလည်း ကျွမ်းကျင်ဂစ်တာသမားမဟုတ်သော သူသုံးဦးသာဖြစ်သည်။ အသံသွင်းရာတွင် ငွေကြေးအခက်အခဲကြောင့် ရန်ကုန်မြို့ရှိ ဈေးအပေါဆုံးစတူဒီယိုတွင် သွားရောက်အသံသွင်းခဲ့ကြ၏ ။ ထိုခုနှစ်များက ခေတ်စားသည့်ဂီတမီဒီယာပုံစံမှာ ကက်ဆက်ခွေများသာဖြစ်သောကြောင့် အသုံးပြုပြီးထားသော ကက်ဆက်ခွေများကို သုံးစွဲ၍ အသံကူးယူ၍ ပွားခဲ့ရသည်။ ကက်ဆက်ခွေများရရှိလာသောအခါ အခွေများကို ဆန္ဒပြရာနေရာများသို့ယူသွားပြီး အလကားဖြန့်ချိပေးခဲ့သည်။[၅]
အကြောင်းအရာ[ပြင်ဆင်ရန်]
ကမ္ဘာမကြေဘူးသီချင်းသည် ကိုယ်ပိုင်သံစဉ်မဟုတ်သော်လည်း ၁၉၈၈ ဆန္ဒပြသူသန်းပေါင်းများစွာ၏ တိုင်တည်ရွတ်ဆိုကြသော ပြယုတ်သီချင်းတစ်ပုဒ်ဖြစ်လာသည်။[၅] သီချင်းစာသားများသည် စိတ်ဓာတ်ကျသူများကို သွေးများဆူဝေစေ၍ စိတ်ခွန်အားကိုပေးစွမ်းသည်။ ဆန္ဒပြသူများအား စိတ်ဓာတ်အညွန့်ကျိုးမသွားစေရန်၊ မကြောက်ကြစေရန် ၊ နောက်မဆုတ်ကြစေရန် စသည့် ရည်ရွယ်ချက်များပါဝင်သည်။[၁]
သီချင်းကို ဂီတာသံဖြင့်စတင်ကာ သံပြိုင်သီဆိုမှုကနောက်ကလာသည်။ ရှေ့ပိုင်းစာသားအချို့မှာ :
ကမ္ဘာမကြေဘူး… ငါတို့သွေးနဲ့ ရေးခဲ့ကြတဲ့ မော်ကွန်းတွေ… တော်လှန်ရေး… ဒီမိုကရေစီတိုက်ပွဲအတွင်းမှာ ကျဆုံးသော… ဪ… သူရဲကောင်းတို့ရေ...အာဇာနည်တွေ နေတဲ့ တိုင်းပြည်… ကမ္ဘာမကြေဘူး ..... ......
ထို့နောက် သီချင်းစာသားတွင် လွတ်လပ်ရေးတိုက်ပွဲတွင် အာဇာနည်ပုဂ္ဂိုလ်ကြီးများဖြစ်ကြသော သခင်ကိုယ်တော်မှိုင်း၊ ဗိုလ်ချုပ်အောင်ဆန်း တို့အား အဘိုး နှင့် အဖ ဟူ၍သုံးနှုန်းပြီး မကျေနပ်ချက်များကို တိုင်တည်ပြောဆိုသည့် စာသားများပါဝင်သည်။ ထို့နောက် "ညီအကိုတို့" ဟူသောပုဒ်ကို သုံးစွဲ၍ နှိပ်ကွပ်သောကြောင့် ပြည်သူများသွေးထွက်သံယိုဖြစ်ရပုံ၊ သေကြေပျက်စီးရပုံများကို ဖော်ကျူးထားကာ ဒီမိုကရေစီတိုက်ပွဲအတွက် တော်လှန်ရန် တောင်းဆိုပုံများပါဝင်သည်။
ကိုးကား[ပြင်ဆင်ရန်]
- ↑ ၁.၀ ၁.၁ အာဏာရှင်ကို ကိုင်လှုပ်ခဲ့တဲ့ ၈၈ သီချင်း, ဘီဘီစီ (မြန်မာပိုင်း)
- ↑ ကမ္ဘာမကြေဘူး – Nyang Media။ 26 January 2021 တွင် မူရင်းအား မော်ကွန်းတင်ပြီး။ 3 February 2021 တွင် ပြန်စစ်ပြီး။
- ↑ 'Driving evil out': Myanmar people kick up din to protest coup (in en) (2021-02-04)။ 2021-02-04 တွင် ပြန်စစ်ပြီး။
- ↑ VH1's 40 Most Softsational Soft-Rock Songs။ SpinMedia (May 31, 2007)။ July 31, 2016 တွင် ပြန်စစ်ပြီး။
- ↑ ၅.၀ ၅.၁ Songwriter Who Provided ‘Theme Song’ to 8888 Uprising Finally Honored (in en-US) (2018-08-09)။ 2021-02-04 တွင် ပြန်စစ်ပြီး။