ဘညိမ်း၊ ကျား

Wikipedia မှ
ဤနေရာသို့သွားရန် - အ​ညွှန်း​, ရှာ​ဖွေ​ရန်​
ကျား​ဘ​ညိမ်း
Ba Nyein 004.jpg
အမည် ကျား​ဘ​ညိမ်း
အမည်ရင်း ဘ​ညိမ်း
မွေးသက္ကရာဇ် ၁​၉​၂​၃ ခု​နှစ်၊ နိုဝင်ဘာ​လ ၂​၃ ရက်​
မွေးဖွားရာဒေသ ၈​၂ လမ်း​နှင့် ၈​၃​လမ်းကြား၊ ၂​၅ လမ်း၊ မန္တလေးမြို့
နိုင်ငံ Flag of Myanmar.png မြန်မာ
မိဘအမည် ဦး​ဘိုး​မင်း + ဒေါ်​မမ​ကြီး
ကိုးကွယ်သည့်ဘာသာ အစ္စ​လာမ်​ဘာသာ
အလုပ်အကိုင် လက်​ဝှေ့​သမား၊ လက်​ဝှေ့​နည်း​ပြ၊ စာရေး​ဆရာ
ကလောင် အမည်​ခွဲ​ ကျား​ကလေး
ထင်ရှားကျော်ကြားမှု လက်​ဝှေ့၊ စာရေးဆရာ
ဇနီး ဒေါ်​ကြည်​ကြည်
သားသမီး ၇ဦး​
ကွယ်လွန်ရက် ၁​၉​၇​၉ ခု​နှစ်၊ ဇူလိုင်​လ ၈ ရက်​နေ့
ကွယ်လွန်ရာဒေသ ပု​ဇွန်​တောင်​မြို့​နယ် အမှတ် (၃) ရပ်​ကွက်၊ ပြည်တော်​သစ်​အိမ်ရာ တိုက်​အမှတ် (၄)၊ အခန်း​အမှတ် (၁​၃)

ကျား​ဘ​ညိမ်း (၁​၉​၂​၃-၁​၉​၇​၉)[ပြင်​ဆင်​ရန်​]

ကိုယ်​ရေး​ဖြစ်​စဉ်[ပြင်​ဆင်​ရန်​]

ဦး​ဘ​ညိမ်း ခေါ် ကျား​ဘ​ညိမ်း​ကို ၈​၂ လမ်း​နှင့် ၈​၃ လမ်းကြား၊ ၂​၅ လမ်း မန္တလေးမြို့​တွင် ဦး​ဘိုး​မင်း​နှင့် ဒေါ်​မမ​ကြီး​တို့​က ၁​၉​၂​၃ ခု​နှစ်၊ နိုဝင်ဘာ​လ ၂​၃ ရက်​နေ့​တွင် မွေး​ဖွား​ခဲ့​သည်။ သူ့​ညီ​များ​မှာ ဦး​ဘ​သိမ်း (စာရေး​ဆရာ ချစ်​ညို)၊ ဦး​ဘ​စိမ်း​နှင့် ဦး​ဘ​ဟိန်း​တို့ ဖြစ်​ကြ​သည်။

ငယ်​စဉ်​အခါ​က မန္တလေးမြို့​ရှိ ဝက်​စ​လီ​ယံ သာသနာပြု ကျောင်း​တွင် ပညာ စတင်​သင်ကြား​ပြီး အမျိုးသား ခေါင်းဆောင်​ကြီး တ​ဦး​ဖြစ်​သည့် ဆရာ​ကြီး ဦး​ရာ​ဇာတ် ကျောင်း​အုပ် အဖြစ် တာဝန် ထမ်း​ဆောင်​သည့် အမျိုးသား အထက်​တန်း​ကျောင်း​တွင် ပြောင်းရွှေ့ ပညာသင်​ယူခဲ့​သည်။ ဦး​ရာ​ဇာတ်​က ကျောင်းသား​များ​၏ အား​ကစား လုပ်​ငန်း​အနေ​ဖြင့် အင်္ဂလိပ် လက်​ဝှေ့​ထိုး​ခြင်း အတတ်​ပညာ​ကို နိုင်ငံ​ခြား​သား ပညာ​ရှင်​တ​ဦး ဖြစ်​သည့် ဘီလ်​ဖစ်​ရှား​အား သင်ကြား ပို့ချ​စေ​ခဲ့​သည်။ အမျိုးသား​ကျောင်း​ထွက် အင်္ဂလိပ် လက်​ဝှေ့​သမား​များ​တွင် ဦး​ဘ​ညိမ်း​သည် နောင်​အခါ​တွင် မြန်မာ​နိုင်ငံ​၏ ဖယ်​သာ​ဝိတ်​တန်း လက်​ဝှေ့​ချန်​ပီ​ယံ အဖြစ် ထင်ရှား​ခဲ့​သည် သာ​မက ၁​၉​၅​၂ ခု​နှစ်​က ဖင်​လန်​နိုင်ငံ ဟယ်လ်​ဆင်​ကီး​မြို့​တွင် ကျင်းပ​သည့် ကမ္ဘာ့ အို​လံ​ပစ်​ပွဲတော်​၌ မြန်မာ​နိုင်ငံ​ကို ကိုယ်စား​ပြု​ပြီး လက်​ဝှေ့ ယှဉ်​ပြိုင်​ခဲ့​သည်။

ကျား​ဘ​ညိမ်း​သည် ၁​၉​၅​၃ မှ​စ​၍ မြန်​မာ့​လက်​ဝှေ့​ကို​မြေ​ဝိုင်း​လက်​ဝှေ့​အဆင့်​မှ​အမြင့်​စင်​အထိ​ဖြစ်​အောင်​အားထုတ်​ခဲ့​သူ​တစ်​ဦး​ဖြစ်​သည်။ လက်​ဝှေ့ကျော်​များ​စွာ​ကို​စင်​တင်​ပေး​ခဲ့​သူ​တစ်​ဦး​လည်း​ဖြစ်​သည်။ အချို့​တို​ကို​မူရင်း​နာမည်​ဖျောက်​ပြီး​လက်​ဝှေ့​အမည်​များ​ကိုယ်တိုင်​ပေး​ခဲ့​သည်။ သမန်းကျား၊ သ​မိန်​ဗ​ရမ်း​တို့​မှာ သူ​ပေး​ခဲ့​သော​နာမည်​များ​ပင်။ ၁​၉​၆​၀ ခု​နှစ်​အောက်တိုဘာ​တွင် ပီ​ကင်း ရှန်​ဟဲ​မြို့​များ​သို့ ဦး​တိုး​လုံ၊ ဦး​ဗိုလ်​စိန်၊ ဖြူ​ကြီး​စ​သည့်​ပညာ​သည်​လက်​ဝှေ့ကျော် ၁​၀ ဦး​တို့​ကို ဦး​ဆောင်ခေါ်​ယူ​၍ ရိုးရာ​လက်​ဝှေ့​ကို ထိုး​သတ်​ပြ​ခဲ့​သည်။

မန္တလေးမြို့​တွင် နေထိုင်​စဉ် ၁​၉​၄​ဝ ပြည့်​နှစ်​တွင် မန္တလေးမြို့​သူ ဒေါ်​ကြည်⁠ကြည်​နှင့် အိမ်ထောင် ကျ​ခဲ့​သည်။ မန္တလေး လူထု သတင်းစာ​တိုက် ပိုင်​ရှင် လူထု​ဦး​လှဒေါ်​အမာတို့​နှင့် ရင်းနှီး​သ​ဖြင့် လူထု သတင်းစာ​တွင် အား​ကစား သ​တင်း​များ ဝင်​ရောက် ရေးသား​ခဲ့​သည်။ ၁​၉​၅​၆ ခု​နှစ်​တွင် အမျိုးသား ကိုယ်​လက် ကြံ့ခိုင်​ရေး ကောင်​စီ​၌ လက်​ဝှေ့ နည်း​စနစ်​မှူး အဖြစ် ဝင်​ရောက် တာဝန် ထမ်း​ဆောင်​သ​ဖြင့် ရန်ကုန်မြို့​သို့ ပြောင်းရွှေ့​နေထိုင်​ခဲ့​ပြီး ရန်ကုန် စာပေ​လောက​နှင့် နီးစပ်​လာ​ခဲ့​သည်။

မြ​ဝ​တီ၊ ငွေ​တာ​ရီ၊ ရှု​မ​ဝ အစ​ရှိ​သည့် မဂ္ဂဇင်း​ကြီး​များ​တွင်​လည်း အား​ကစား ဆောင်းပါး​များ ဝင်​ရောက် ရေးသား​ခဲ့​သည်။ နောင်​အခါ​တွင် အား​ကစား​ဂျာနယ် တ​ခု ဖြစ်​သည့် တံခွန်​ဂျာနယ် ပေါ်ထွက်​လာ​သည့် အခါ​၌​လည်း ပင်တိုင် ဝင်​ရောက် ရေးသား​ခဲ့​သည်။ အထောက်တော် လှ​အောင်​၏ သ​တင်း​ဂျာနယ်​တွင် မြန်​မာ့​ရိုးရာ လက်​ဝှေ့​နှင့် ပတ်သက်​၍ ဆောင်းပါး​များ အဆက်​မ​ပြတ် ရေးသား​ခဲ့​သည်။

စာရေး​ဆရာ ရန်ကုန်​ဘ​ဆွေ​၏ ကူညီ​ပံ့ပိုး​မှု​ဖြင့် မင်း​ခေါင် အမည်​ရှိ လုံး​ချင်း ဝတ္ထု​တ​ပုဒ်​ကို ရေးသား ထုတ်​ဝေ​ခဲ့​သည်။ မင်း​ခေါင်​သည် ထို​ခေတ် အခါ​က အောင်မြင် ထင်ရှား​ခဲ့​သော မန္တလေး ရတနာ​ပုံ​ခေတ် နောက်​ခံ ဝတ္ထု​တ​ပုဒ် ဖြစ်​ခဲ့​သည်။ ကြေးစား​လက်​ဝှေ့ ထိုး​ခြင်း​အကြောင်း​ကို နောက်​ခံထား​ကာ ရေးသား​ခဲ့​သော သဲ​ခင်းပေါ်​မှ သွေး​တ​ကွက် ဝတ္ထု​ကို လည်းကောင်း၊ ရေးဖော် စာရေး​ဆရာ​များ ဖြစ်​ကြ​သော ဗိုလ်​မြင့်၊ ဗိုလ်​ဘသော်၊ မောင်​သင်တို့​နှင့် တွဲ​ဖက်​ကာ အတ္ထုပ္ပတ္တိလေး​ဦး စုစည်း​မှု​တွင်​၎င်း၊ ပါဝင် ရေးသား​ခဲ့​သည်။

ကမ္ဘာ့​လက်​ဝှေ့ ချန်​ပီ​ယံ လက်​ဝှေ့ကျော်​များ​၏ အတ္ထုပ္ပတ္တိ​များ ဖြစ်​သော ကမ္ဘာကျော် လက်သီး​မဲကြီး​များ၊ မို​ဟာ​မက်​အလီ၊ ကင်​ရှာ​ဆာ​မှ မ​နီလာ​သို့ လုံး​ချင်း စာအုပ်​များ​ကို​လည်း ရေးသား ထုတ်​ဝေ​ခဲ့​သည်။ ဦး​ဘ​ညိမ်း​သည် လက်​ဝှေ့ ထိုး​သတ်​စဉ် ကာလ​က ကျား​တ​ကောင်​ကဲ့သို့ ရဲ​ရဲရင့်​ရင့် ထိုး​သတ်​တတ်​ခြင်း အပြင် အင်္ဂလိပ် ဆယ့်​နှစ်​ကောင်​ကျား ကစား​ရာ​တွင်​လည်း ကျွမ်းကျင်​သူ ဖြစ်​ခြင်း​ကြောင့် ကျား​ဘ​ညိမ်း​ဟု တင်စား​ခဲ့​ကြ​သည်။ မန္တလေး သတင်းစာ​များ​က သူ့​အောင်မြင်​မှု​များ​ကို ရေးသား ဖော်​ပြ​ကြ​သူ​တိုင်း "ကျား​ကလေး" ဟု ရေးသား​ခဲ့​ကြ​သည်။

စာပေ​ကို ဝါသနာ​အရ ရေးသား​ခဲ့​သည့် အပြင် ကျား​ဘ​ညိမ်း​သည် ပန်းချီ​ကို​လည်း ကျွမ်း​ကျွမ်းကျင်​ကျင် ရေး​ဆွဲ​တတ်​သူ ဖြစ်​သည်။ မန္တလေး​တွင် နေထိုင်​စဉ် ကာလ​က စ​တိုး​ဆိုင်​ကြီး​များ​၏ သံဆိုင်း​ဘုတ်​ကြီး​များ​ကို တာဝန်​ယူ ရေး​ဆွဲ​ခဲ့​သူ ဖြစ်​သည်။ မြန်​မာ့​ရိုးရာ လက်​ဝှေ့​ကို အပတ်​တ​ကုတ် ကြိုးပမ်း ဖော်​ထုတ်​ခဲ့​သူ အဖြစ်​လည်း အား​ကစား ဝါသနာ​ရှင်​များ​က သိ​ထားခဲ့​ကြ​သည်။ သူ​တာဝန်​ယူ ကျင်းပ​သည့် ရိုးရာ လက်ဝှေ့ပွဲ​များ​တွင် ပါဝင် ယှဉ်​ပြိုင်​ကြ​သည့် လက်​ဝှေ့ကျော်​များ အား​မာန် တက်​စေ​ရန် လက်​တန်း​စပ်ဆို​ကာ ရွတ်​ခဲ့​သည့် လင်္ကာ​များ​မှာ​လည်း ယနေ့​ထက်​တိုင် ရိုးရာ လက်ဝှေ့ပွဲ​များ​တွင် ကြား​နေ​ရ​ဆဲ ဖြစ်​သည်။

ကျား​ဘ​ညိမ်း​သည် ၁​၉​၇​၉ ခု​နှစ်၊ ဇူလိုင်​လ ၈ ရက်​နေ့ နံနက် ၆ နာရီ မိ​နစ် ၄​ဝ အချိန်​တွင် အစာအိမ်​ကင်​ဆာ ရောဂါ​ဖြင့် ကွယ်​လွန်​ခဲ့​သည်။ ကွယ်​လွန်​ချိန်​တွင် မိသား​စု​နှင့်​အတူ ပု​ဇွန်​တောင်​မြို့​နယ် အမှတ် (၃) ရပ်​ကွက်၊ ပြည်တော်​သစ်​အိမ်ရာ တိုက်​အမှတ် (၄)၊ အခန်း​အမှတ် (၁​၃) တွင် နေထိုင်​လျက် ရှိ​သည်။ ကွယ်​လွန်​ချိန်​တွင် အသက် ၅​၆ နှစ်​ဖြစ်​ပြီး ဇနီး ဒေါ်​ကြည်​ကြည် သားသမီး​များ ဖြစ်​ကြ​သည့် ဝင်း​ငြိမ်းဆန်​နီ​ညိမ်း၊ ရဲ​မြင့်​ညိမ်း၊ မျိုး​မြင့်​ညိမ်း၊ မာလာ​ညိမ်း၊ ထွန်း​မောင်​ညိမ်း၊ ထွန်း​အောင်​ညိမ်း​တို့ ကျန်​ရစ်​ခဲ့​ကြ​သည်။

ကျား​ဘ​ငြိမ်း ရေးသား ပြုစု​ခဲ့​ပြီး​သော စာအုပ်​များ[ပြင်​ဆင်​ရန်​]

  1. ကမ္ဘာကျော် လက်သီး​မဲကြီး​များ ၁​၉​၆​၈
  2. မို​ဟာ​မက်​အလီ (သို့မဟုတ်) မဟူရာ​ဧကရာဇ် ၁​၉​၇​၄
  3. အလီ-ဖ​ရေ​ဇီ​ယာ ပွဲ​စဉ် အမှတ် (၃) ၁​၉​၇​၅
  4. ကင်​ရှာ​ဆာ​မှ မ​နီလာ​သို့ ၁​၉​၇​၅
  5. လူဆိုး​ကြီး မင်း​ခေါင် (ဒုတိယ​အကြိမ်) ၁​၉​၇​၇
  6. မို​ဟာ​မက်​အလီ​၏ နေဝင်​ဆည်းဆာ ၁​၉​၇​၈
  7. သဲ​ခင်ပေါ်​မှ သွေး​တ​ကွက် -
  8. ဤ​လေး​ဦး (ဗိုလ်​မြင့်၊ ဗိုလ်​ဘသော်၊ မောင်​သင်​တို့​နှင့် တွဲ​၍) -

[၁]

ကိုး​ကား[ပြင်​ဆင်​ရန်​]

  1. ပြန်ကြား​ရေး​နှင့် ပြည်​သူ့ ဆက်ဆံ​ရေး ဦးစီး​ဌာန (ရုံး​ချုပ်)၊ စာတည်း​အဖွဲ့ စုဆောင်း ပြုစု​ပြီး ရွှေ​ဟင်္သာ စာအုပ်​တိုက်​မှ ၂​၀​ဝ​၈ ဖေဖော်ဝါရီ​မှာ ပထမ​အကြိမ် ထုတ်​ဝေ ဖြန့်ချိ​ခဲ့​တဲ့ 'နှစ်​ဆယ်​ရာ​စု မြန်မာ စာရေး ဆရာ​များ​နှင့် စာ​စု​စာရင်း (စတုတ္ထ​တွဲ)'