ဖက်ဇ် အယ်လ် ဘာလီ

ဖက်ဇ်မြို့ဟောင်း*
UNESCO ကမ္ဘာ့အမွေအနှစ်နေရာများ
တည်ရှိသည့် နိုင်ငံ	မော်ရိုကို
အမျိုးအစား	ယဉ်ကျေးမှု
ရွေးချယ်သည့်စံနှုန်း	ii , v
ကိုးကား	၁၇၀
ဒေသ**	အာဖရိက
သတ်မှတ်ခြင်း မှတ်တမ်း
စတင်သတ်မှတ်ခြင်း	၁၉၈၁  (ပဉ္စမအကြိမ်)
* ယူနက်စကိုကမ္ဘာ့အမွေခံစာရင်းတွင် ရေးထိုးထားသောအမည် ** ယူနက်စကိုမှ ခွဲခြားသတ်မှတ်ထားသောဒေသ

ဖက်ဇ် အယ်လ် ဘာလီ သည် မော်ရိုကိုနိုင်ငံ ဖက်ဇ်မြို့ရှိ ရှေးအကျဆုံး တံတိုင်းကာရံထားသော အစိတ်အပိုင်း ဖြစ်သည်။ ဖက်ဇ်အယ်လ်ဘာလီသည် အေဒီ ၇၈၉ မှ ၈၀၈ ခုနှစ်အတွင်း အိုင်ဒရီဇစ် မင်းဆက်၏ မြို့တော် အဖြစ် တည်ထောင်ခဲ့ခြင်း ဖြစ်သည်။ ကမ္ဘာပေါ်တွင် ရှေးအကျဆုံး တက္ကသိုလ် ဖြစ်သော အယ်လ် ကာရိုရင်း တက္ကသိုလ် ရှိသည့် အတွက် ထင်ရှားသည်သာမက ဖက်ဇ်အယ်လ်ဘာလီသည် စုစုပေါင်း လူဦးရေ ၁၅၆,၀၀၀ ဦး ရှိသော ကမ္ဘာပေါ်တွင် အကြီးဆုံး ကားမရှိသည့် မြို့ပြ အဖြစ်လည်း ထင်ရှားသည်။

ယူနက်စကိုမှ ၁၉၈၁ ခုနှစ်တွင် ဖက်ဇ်အယ်လ်ဘာလီအား ဖက်ဇ်မြို့ဟောင်း (မယ်ဒီနာအော့ဖ် ဖက်ဇ်) အမည်ဖြင့် ကမ္ဘာ့အမွေအနှစ် စာရင်းတွင် ထည့်သွင်းခဲ့သည်။ ကမ္ဘာ့အမွေအနှစ်နေရာ သတ်မှတ်မှုတွင် ဖက်ဇ်အယ်လ်ဘာလီ၏ မြို့ပြ အဆောက်အဦးများသာ မကပဲ တံတိုင်း အပြင်ဘက်ရှိ ထိုနေရာအား ကောင်းမွန်စွာ မြင်နိုင်မည့် ကြားခံဒေသကို ထိန်းသိမ်းရန် အတွက်ပါ ထည့်သွင်း သတ်မှတ်ခဲ့သည်။

ဖက်ဇ်အယ်လ်ဘာလီ၊ ဖက်ဇ် ဂျေဒစ် နှင့် ပြင်သစ်တို့ တည်ဆောက်ခဲ့သော ဗေးလ်နိုဘယ် သို့မဟုတ် မြို့သစ်သည် ဖက်ဇ်၏ အဓိက ဒေသ ၃ ခု ဖြစ်သည်။