ဘန်နီဖြိုး

Bunny Phyoe ဘန်နီဖြိုး
အမည်ရင်း	ပြည့်ဖြိုးပိုင်
မွေးဖွား	(1992-07-09) ၉ ဇူလိုင်၊ ၁၉၉၂ ရန်ကုန်၊ မြန်မာ။
ဂီတဟန်	R&B, Hip hop
အလုပ်အကိုင်	သီချင်းရေးဆရာ, ရုပ်ရှင်သရုပ်ဆောင်
တက်ကြွသည့်နှစ်များ	၂၀၀၈–လက်ရှိ
ပူးတွဲ ပါဝင်မှု	Sai Sai,G Fatt,Snare,Theinn Linn,Mi Sandi,Amera Phone
ဝက်ဘ်ဆိုက်	bunnyphyoe.com

ဘန်နီဖြိုးသည် မြန်မာနိုင်ငံ၌ လူသိများထင်ရှားသည့် အဆိုတော်ဖြစ်ပြီး ၁၉၉၂ ခုနှစ်၊ ဇူလိုင်လ ၉ ရက်နေ့တွင်မွေးဖွားခဲ့သည်။ အမည်ရင်းမှာ ပြည့်ဖြိုးပိုင်ဖြစ်ပြီး အဆိုတော်၊ တေးရေးဆရာဖြစ်သည့်အပြင် သရုပ်ဆောင်တစ်ယောက်လည်းဖြစ်သည်။

ငယ်ဘဝနှင့်ပညာရေး

ဘန်နီဖြိုးကို ၁၉၉၂ ခုနှစ်၊ ဇူလိုင်လ ၉ ရက်နေ့၌ ရန်ကုန်မြို့တွင် မွေးဖွားခဲ့သည်။ မွေးချင်း ၂ ယောက်ရှိသည့်အနက် အကြီးဆုံးသားဖြစ်သည်။ ဗိုလ်တစ်ထောင်မြို့နယ်၊ အမှတ် ၆ အခြေခံပညာ မူလတန်းကျောင်း၌ ပညာသင်ကြားခဲ့ပြီး ၂၀၀၈ ခုနှစ်တွင် ၁၀ တန်းစာမေးပွဲအောင်မြင်ခဲ့သည်။ ရန်ကုန်အရှေ့ပိုင်းတက္ကသိုလ်မှ အင်္ဂလိပ်စာအထူးပြုဖြင့် ဘွဲ့ရခဲ့သည်။

အနုပညာလုပ်ငန်းများ

အဆိုတော်ဘဝ

ဘန်နီဖြိုးသည် ငယ်စဉ်ကတည်းက ဂီတကိုခုံမင်ရူးသွပ်ခဲ့သူဖြစ်ပြီး ၄ တန်းအရွယ်၌ အဆိုတော် Rဇာနည်၏ ငါ့ကိုချစ်မယ့်သူ သီချင်းအယ်လ်ဘမ်မှ တစ်ယောက်တည်းသီချင်းအား Rap စာသားအချို့ထည့်သွင်းကာ ကိုယ်ပိုင်ဟန်ဖြင့် ပြန်လည်ရေးသားခဲ့သည်။ သူသည် ၂၀၀၀ ခုနှစ်နှင့် ၂၀၁၂ ခုနှစ်များတွင် မြန်မာ့ရိုးရာယဉ်ကျေးမှု၊ ဆို၊ က၊ ရေး၊ တီးပြိုင်ပွဲ၌ ပါဝင်ယှဉ်ပြိုင်ခဲ့သည်။