၂၀၂၆ ဗင်နီဇွဲလား-အမေရိကန် ပဋိပက္ခ

၂၀၂၆ ဗင်နီဇွဲလား–အမေရိကန် ပဋိပက္ခ
ဗင်နီဇွဲလား-အမေရိကန် ပဋိပက္ခ၏ တစ်စိတ်တစ်ပိုင်း
ဖမ်းဆီးခံ ဗင်နီဇွဲလားသမ္မတ နီကိုးလပ်စ် မဒူရို(ဘယ်ဘက်) သမ္မတ ဒေါ်နယ်လ် ထရမ့် (ညာဘက်)
ရက်စွဲ ၃ ဇန်နဝါရီ ၂၀၂၆ နေရာ ကာရာကပ်စ်မြို့၊ ဗင်နီဇွဲလား အခြေအနေ ဆက်လက်ဖြစ်ပွားနေဆဲ နယ်နမိတ် ပြောင်းလဲမှုများ ဗင်နီဇွဲလားသမ္မတ ဖမ်းဆီးခံရပြီး နိုင်ငံပြင်ပသို့ ခေါ်ထုတ်ခံရ
စစ်ရင်ဆိုင်သူများ
အမေရိကန်	ဗင်နီဇွဲလား
တပ်မှူးများနှင့် ခေါင်းဆောင်များ
ဒေါ်နယ်လ် ထရမ့်	နီကိုးလပ်စ် မဒူရို

၂၀၂၆ ဗင်နီဇွဲလား-အမေရိကန် ပဋိပက္ခ (တနည်းအားဖြင့် အလုံးစုံဖြေရှင်းရေး စစ်ဆင်ရေး၊ အင်္ဂလိပ်: Operation Absolute Resolve) သည် ၂၀၂၆ ခုနှစ်၊ဇန်နဝါရီ ၃ ရက်တွင် အမေရိကန်ပြည်ထောင်စု က ဗင်နီဇွဲလားနိုင်ငံ သမ္မတအား မြို့တော် ကာရာကပ်စ်မြို့ အထိ စစ်ရေးဝင်ရောက် တိုက်ခိုက်မှု ပြုလုပ်ကာ ဖမ်းဆီးခေါ်ဆောင်သွားခဲ့သည့် ဖြစ်စဉ်ပဋိပက္ခဖြစ်သည်။

အကျယ်တဝင့် ဖော်ပြထားသောဆောင်းပါး - တောင်ပိုင်းလှံ စစ်ဆင်ရေး

အမေရိကန်ပြည်ထောင်စုသည် မူးယစ်ဆေးဝါး အကြမ်းဖက်ဝါဒကို တိုက်ဖျက်ရန် ကြိုးပမ်းမှုတစ်ရပ်အဖြစ် စစ်ဆင်ရေးဖြင့် ဗင်နီဇွဲလားအနီးရှိ ကာရေဘီယံရေပြင်တွင် အကြီးစားလေကြောင်းနှင့် ရေတပ်တပ်ဖွဲ့များကို လအတော်ကြာ တပ်ဖြန့်ချထားသည်။  

ကာရေဘီယံနှင့် ပစိဖိတ်အရှေ့ပိုင်းတွင် အမေရိကန်တပ်ဖွဲ့ဝင်များသည် မူးယစ်ဆေးဝါးကုန်ကူးသည့် သင်္ဘော ၃၀ ခန့်ကို တိုက်ခိုက်နစ်မြုပ်စေခဲ့ပြီး၊ လူပေါင်း ၁၀၀ ကျော် သေဆုံးခဲ့သည်။

၂၀၂၆ ခုနှစ်၊ဇန်နဝါရီ ၃ ရက်တွင် တောင်ပိုင်းလှံ စစ်ဆင်ရေး အင်္ဂလိပ်: Operation Southern Spear ဟု အမည်ပေးထားသည့် အမေရိကန်၏ စစ်ဆင်ရေး၏ တစ်စိတ်တစ်ပိုင်းဖြစ်သော အလုံးစုံဖြေရှင်းရေးစစ်ဆင်ရေးဖြင့် ကာရာကက်စ်မြို့ကို အမေရိကန်တပ်များသည် တိုက်ခိုက်ပြီး ဗင်နီဇွဲလားသမ္မတ နီကိုလက်စ် မဒူရိုကို ပြည်ပသို့ ဖမ်းဆီးခေါ်ဆောင် ခဲ့သည်။

အလုံးစုံဖြေရှင်းရေး စစ်ဆင်ရေး

အမေရိကန်ပြည်ထောင်စု သည် အထူးတပ်ဖွဲ့ဝင်များအတွက် ကရာကက်စ်မြို့ရှိ နီကိုလက်စ် မဒူရို ၏ လုံခြုံရေးအိမ်ပုံစံတူ တစ်ခုကို ဖန်တီးကာ လအတန်ကြာ အထူးလျှို့ဝှက် လေ့ကျင့်မှုများ ပြုလုပ်ခဲ့သည်။

စစ်အေးကာလနောက်ပိုင်း လက်တင်အမေရိကနိုင်ငံတစ်နိုင်ငံအတွင်း စစ်ရေးအရ ကြားဝင်ဆောင်ရွက်မှုဖြစ်သည့်အတွက် သတင်းလုံခြုံရေးကို ထိန်းသိမ်းရန် အဆိုပါအစီအစဉ်ကို အမေရိကန်ပြည်ထောင်စု ကွန်ကရက် သို့ အကြောင်းကြားခြင်း၊ တိုင်ပင်ဆွေးနွေးခြင်း မပြုဘဲ လျှို့ဝှက်ထားခဲ့ကြသည်။

၂၀၂၆ ခုနှစ် ဇန်နဝါရီ ၃ ရက်တွင် ဝါရှင်တန် အပါအဝင် ကမ္ဘာတစ်ဝန်းကို အံ့အားသင့်စေခဲ့သော ညသန်းခေါင်ကျော် အချိန်တွင် ၂ နာရီ ၂၀ မိနစ်ကြာ ကြည်း–ရေ–လေ ပူးပေါင်းစစ်ဆင်ရေးဖြင့် မဒူရိုနှင့် ၎င်း၏ ဇနီးကို ကျူးဘားသက်တော်စောင့်များကြားမှ ဖမ်းဆီးခေါ်ထုတ်ခဲ့ကြသည်။

အဆိုပါစစ်ဆင်ရေးကို ဒေါ်လ်နယ် ထရမ့် သည် အိမ်ဖြူတော် အတွင်းရှိ အိမ်ဖြူတော် ကွပ်ကဲရေးရုံးခန်းမှ မဟုတ်ဘဲ Floridaပြည်နယ် Palm Beach မြို့ရှိ Mar-a-Lago ကလပ်မှနေ၍ စီအိုင်အေ ညွှန်ကြားရေးမှူး John Ratcliffe နှင့် နိုင်ငံခြားရေးဝန်ကြီး Marco Rubio တို့နှင့်အတူ တိုက်ရိုက် စောင့်ကြည့်ခဲ့သည်။

ဒေသစံတော်ချိန် စနေနေ့ မနက် ၄ နာရီ ၂၀ မိနစ်တွင် မဒူရိုနှင့် ၎င်း၏ ဇနီးကို ရဟတ်ယာဉ်ဖြင့် ဗင်နီဇွဲလားနိုင်ငံ လေပိုင်နက်အတွင်းမှ ဖမ်းဆီး ခေါ်ထုတ်ခဲ့ကြသည်။