ဣတ္ထိဘာဝရုပ်
| တစ်စိတ်တစ်ပိုင်း ဖော်ပြချက် |
| ဗုဒ္ဓဘာသာ |
|---|
 |
ဣတ္ထိဘာဝရုပ် သို့မဟုတ် ဣတ္ထိန္ဒြေ (အမျိုးသမီး ဖြစ်ကြောင်း အစိုးရသော တရား) အကြောင်းကို အဘိဓမ္မာ ရှုထောင့်မှ အောက်ပါအတိုင်း ရှင်းလင်းတင်ပြနိုင်ပါသည်-
ဣတ္ထိန္ဒြေ၏ လက္ခဏာစသည် လေးမျိုး (လက္ခဏာဒိ စတုက္က)
[ပြင်ဆင်ရန်]- လက္ခဏာ (သဘာဝ အမှတ်အသား): ဣတ္ထိ = အမျိုးသမီး ဖြစ်ခြင်း၏ အကြောင်း သဘော။
- ရသ (ကိစ္စ၊ အလုပ်): ဤသူကား အမျိုးသမီး ဖြစ်သည်ဟု ထင်ရှားစေခြင်း။
- ပစ္စုပဋ္ဌာန် (ထင်ရှားလာပုံ၊ အကျိုး):
- (က) ဣတ္ထိလိင်္ဂ (အမျိုးသမီးတို့၏ ရုပ်ပိုင်းဆိုင်ရာ အသွင်သဏ္ဌာန် - ဥပမာ လက်၊ ခြေ၊ ကိုယ်၊ မျက်နှာ ပုံသဏ္ဌာန်)၊
- (ခ) ဣတ္ထိနိမိတ္တ (အမျိုးသမီးဟု သိနိုင်သော အမှတ်အသား - ဥပမာ ရင်သား၊ မုတ်ဆိတ်မွေး မရှိခြင်း၊ ဆံထုံးပုံ၊ အဝတ်ကိုင်ပုံ)၊
- (ဂ) ဣတ္ထိကုတ္တ (အမျိုးသမီးတို့၏ အပြုအမူ၊ အလေ့အထ - ဥပမာ ငယ်စဉ်က ကစားပုံ)၊
- (ဃ) ဣတ္ထိအာကပ္ပ (အမျိုးသမီးတို့၏ အမူအရာ၊ အသွင်အပြင် - ဥပမာ သွားပုံ၊ ရပ်ပုံ၊ ထိုင်ပုံ၊ စားပုံ) တို့၏ အကြောင်းရင်း ဖြစ်ခြင်း သဘော။
၄။ ပဒဋ္ဌာန် (နီးသော အကြောင်း): မိမိ (ဣတ္ထိန္ဒြေ) နှင့်အတူ ဘာဝဒသကကလာပ် အတွင်း၌ ဖြစ်သော၊ ကံကြောင့်ဖြစ်သော မှီရာ မဟာဘုတ် ဓာတ်ကြီးလေးပါး။
ဣတ္ထိဘာဝရုပ်၏ ဖြစ်ပေါ်လာပုံနှင့် အစိုးရပုံ
[ပြင်ဆင်ရန်]- ဣတ္ထိဘာဝရုပ် (ပုရိသဘာဝရုပ် ကဲ့သို့ပင်) သည် ကံကြောင့်ဖြစ်သော (ကမ္မဇ) ရုပ် တစ်မျိုး ဖြစ်သည်။ ၎င်းသည် ပဋိသန္ဓေအခါမှ စ၍ ကံအရှိန် မကုန်သမျှ ဘဝတစ်လျှောက်လုံး ဖြစ်-တည်-ပျက် အနေဖြင့် ဖြစ်ပေါ်နေသည်။
- ဤရုပ်ကို ဖြစ်စေသော ကံသည် အတိတ်ဘဝက အမျိုးသမီးဘဝကို နှစ်သက် တပ်မက်သော (ဣတ္ထိလိင်္ဂ၊ နိမိတ္တ စသည်တို့ကို သဘောကျသော) တဏှာကို အရင်းခံ၍ ပြုခဲ့သော ကံ ဖြစ်သည်။ (ထိုတဏှာသည်လည်း အဝိဇ္ဇာကို အခြေခံသည်)။
- ဘာဝရုပ်သည် ပဋိသန္ဓေကတည်းက ပါလာသော်လည်း၊ ၎င်း၏ အကျိုးဆက်များ ဖြစ်သော ဣတ္ထိလိင်္ဂ၊ နိမိတ္တ၊ ကုတ္တ၊ အာကပ္ပ တို့သည် ပဝတ္တိအခါ (ဘဝဖြစ်စဉ်အတွင်း) ကျမှသာ တဖြည်းဖြည်း ထင်ရှား ဖြစ်ပေါ်လာသည်။
- ဣတ္ထိဘာဝရုပ်သည် အမျိုးသမီးတို့၏ ခန္ဓာကိုယ် အသွင်အပြင်၊ အမှတ်အသား၊ အပြုအမူ၊ အမူအရာတို့ကို "အမျိုးသမီး ပုံစံ" အတိုင်း ဖြစ်ပေါ်လာစေရန် စိုးမိုး ချယ်လှယ် ထားသည်။ ပုရိသဘာဝရုပ်ကလည်း ထိုနည်းတူ "အမျိုးသား ပုံစံ" အတိုင်း ဖြစ်စေရန် စိုးမိုးထားသည်။ ဤသို့ စိုးမိုးအုပ်ချုပ်တတ်သောကြောင့် ဣန္ဒြေ (ဣတ္ထိန္ဒြေ၊ ပုရိသိန္ဒြေ) ဟု ခေါ်ဆိုခြင်း ဖြစ်သည်။
- ဥပမာအားဖြင့် မျိုးစေ့ (ဗီဇ) ရှိမှ အပင်ပေါက်ပြီး အခက်အရွက်များ ဝေဆာလာသကဲ့သို့၊ ဣတ္ထိဘာဝရုပ် (မျိုးစေ့) ရှိမှ ဣတ္ထိလိင်္ဂ စသော အသွင်အပြင်များ (အပင်) ဖြစ်ပေါ်လာရသည်။
ဣန္ဒြိယပစ္စည်း မထိုက်ခြင်း
[ပြင်ဆင်ရန်]- ဘာဝရုပ်သည် ဣတ္ထိလိင်္ဂ စသော ရုပ်များကို ဖြစ်ပေါ်စေရာ၌ အကြောင်းခံ ဖြစ်သော်လည်း၊ ပဋ္ဌာန်းတရားတော်လာ ဣန္ဒြိယပစ္စည်း၊ အတ္ထိပစ္စည်း၊ အဝိဂတပစ္စည်း အဖြစ်ဖြင့် ကျေးဇူးမပြုပါ။
- အကြောင်းမှာ ပစ္စည်းမြောက်ရန် တိုက်ရိုက်ဖြစ်စေနိုင်သော ဇနကသတ္တိ သို့မဟုတ် ထောက်ပံ့စောင့်ရှောက်သော ဥပတ္ထမ္ဘက/အနုပါလကသတ္တိ ရှိရမည် ဖြစ်သော်လည်း၊ ဘာဝရုပ်၌ ထိုသတ္တိများ မရှိသောကြောင့် ဖြစ်သည်။ (ဘာဝဒသက ကလာပ်ရှိ ရုပ်အားလုံးကို ကံကသာ တိုက်ရိုက်ဖြစ်စေသည်၊ ရုပ်ဇီဝိတိန္ဒြေကသာ စောင့်ရှောက်သည်၊ အာဟာရကသာ ထောက်ပံ့သည်)။ ဘာဝရုပ်၏ အစိုးရမှုမှာ ပုံစံကို ချယ်လှယ်ခြင်းသာ ဖြစ်သည်။
သိရှိနိုင်ပုံ (ဝိညေယျ)
[ပြင်ဆင်ရန်]- ဣတ္ထိဘာဝရုပ်: ဤပရမတ္ထရုပ် သဘာဝတရား ကိုယ်တိုင်ကို စက္ခုဝိညာဏ် (မျက်စိအသိ) ဖြင့် မမြင်နိုင်၊ မသိနိုင်ပါ။ မနောဝိညာဏ် (စိတ်အသိ) ဖြင့် ဝိပဿနာဉာဏ်ဖြင့်သာ ပိုင်းခြား သိမြင်နိုင်သော မနောဝိညေယျ တရား ဖြစ်သည်။
- ဣတ္ထိလိင်္ဂ၊ နိမိတ္တ၊ ကုတ္တ၊ အာကပ္ပ: ဤအမျိုးသမီးတို့၏ အသွင်အပြင်၊ အမှတ်အသား၊ အပြုအမူ၊ အမူအရာ များမှာမူ ရုပ်ကလာပ် အစုအဝေးများ ဖြစ်ပြီး ၎င်းတို့တွင် မြင်နိုင်သော ရူပါရုံများ ပါဝင်သောကြောင့် စက္ခုဝိညာဏ်ဖြင့်လည်း သိနိုင် မြင်နိုင်သည် (စက္ခုဝိညေယျ)။ မနောဝိညာဏ်ဖြင့်လည်း သိနိုင်သည် (မနောဝိညေယျ)။[၁]
ဆက်စပ်ဖတ်ရှုရန်
ကိုးကား
- ↑ နိဗ္ဗာနဂါမိနိပဋိပဒါ - စတုတ္ထတွဲ - ဖားအောက်တောရဆရာတော်