မာတိကာသို့ ခုန်သွားရန်

အာသဝက္ခယသုတ်

ဝီကီပီးဒီးယား မှ

(၈)သုတ် ရှိပါသည်။

[၁] သဒ္ဓါ၊ ဝီရိယ၊ သတိ၊ သမာဓိ၊ ပညာ-ဟူသော ဣန္ဒြေငါးပါးကိုပွားများခြင်း ကြိမ်ဖန်များစွာ အလေ့အလာပြုခြင်းကြောင့် အာသဝေါတရားများ ကုန်ခမ်းပြီး အနာသဝ စေတောဝိမုတ္တိ, ပညာဝိမုတ္တိဖြစ်သည့် အရဟတ္တဖိုလ်ကို မျက်မှောက်ဘဝ၌ပင် ကိုယ်တိုင်သိရှိ မျက်မှောက်ပြု၍ နေနိုင်၏-ဟု ဟောတော်မူသည့်သုတ်။


[၂] အထက်သုတ်ပါ ဣန္ဒြေငါးပါးတို့ကို ပွားများအပ်, ကြိမ်ဖန်များစွာ အလေ့ အလာပြုအပ်သည်ရှိသော် သံယောဇဉ်တို့ကို ပယ်စွန့်ရန်၊ အနုသယတို့ကို အကြွင်းမဲ့ ပယ်ခွါရန်၊ သံသရာခရီးကို ပိုင်းခြား၍ သိနိုင်ရန်၊ အာသဝေါတရားတို့ ကုန်ခမ်းရန် ဖြစ်ကုန်၏-ဟု ဟောတော်မူသည့်သုတ်။


[၃] သတိပဋ္ဌာန်လေးပါးကို ပွားများခြင်း၊ ကြိမ်ဖန်များစွာ အလေ့အလာပြုခြင်း အာသဝေါတရားတို့ ကုန်ခမ်းခြင်းကြောင့် အနာသဝ စေတောဝိမုတ္တိ, ပညာဝိမုတ္တိကို မျက်မှောက်ဘဝမှာပင် ကိုယ်တိုင်သိရှိ မျက်မှောက်ပြု၍ နေနိုင်၏-ဟု အရှင်အနုရုဒ္ဓါက သမ္ဗဟုလရဟန်းတို့အား ကောသလနိုင်ငံ သာဝတ္ထိမြို့ ဇေတဝန်ကျောင်းတော်၌ ဟောတော်မူသည့်သုတ်။


[၄] အာနာပါနဿတိသမာဓိကို ပွားများခြင်းသည် အာသဝေါတရားတို့ ကုန်ခမ်းရန် ဖြစ်၏-ဟု အာနာပါနဿတိသမာဓိ ပွားများပုံကို ဟောတော်မူသည့်သုတ်။


[၅] သစ္စာလေးပါးကိုသိမြင်သောသူအား အာသဝေါတရားတို့ ကုန်ခြင်းကို ဟောတော်မူ၏၊ သစ္စာလေးပါးကို သိမြင်အောင် အားထုတ်ကြရမည်-ဟု ဟောတော်မူသည့်သုတ်။


[၆] (၁) ကာယေ အသုဘာနုပဿီ၊ (၂) အာဟာရေ ပဋိကူလသညီ၊ (၃) သဗ္ဗလောကေ အနဘိရတသညီ၊ (၄) သဗ္ဗသင်္ခါရေသု အနိစ္စာနုပဿီ၊ (၅) အဇ္ဈတ္တံ မရဏသညာ သုပဋ္ဌိတာ-ဟူသော တရားငါးပါးကို ပွားများ, ကြိမ်ဖန်များစွာ အလေ့အလာပြုသည် ရှိသော် အာသဝေါတရားတို့ ကုန်ခမ်းရန် ဖြစ်ကုန်၏-ဟု ဟောတော်မူသည့်သုတ်။


[၇] မဂ္ဂင်ရှစ်ပါး၊ သမ္မာဉာဏ၊ သမ္မာဝိမုတ္တိ-ဟူသော တရား ၁၀-ပါးကို ပွားများ, ကြိမ်ဖန်များစွာ ပွားများသည်ရှိသော် အာသဝေါတရားတို့ ကုန်ခမ်းရန် ဖြစ်ကုန်၏ဟု ဟောတော်မူသည့်သုတ်။


[၈] သစ္စာလေးပါးကို သိမြင်သောရဟန်းအား အာသဝေါတရားတို့ ကုန်ခမ်းခြင်းကို ဘုရားရှင် ဟောတော်မူ၏-ဟု ခုဇ္ဇုတ္တရာက သာမာဝတီအမှူးရှိသော မိဖုရား ငါးရာတို့အား ပြန်လည်ဟောပြသည့်သုတ်။ [၉]


အာသဝက္ခယသုတ် သည် မြတ်စွာဘုရားဟောကြားတော်မူခဲ့သည့် သုတ္တန်တစ်ခု ဖြစ်သည်။ ဤသုတ္တန်တွင် မြတ်စွာဘုရားသည် တရားငါးမျိုးတို့ကို ပွားများအပ် ကြိမ်ဖန်များစွာ အာသဝေါတရားတို့ ကုန်ခြင်းငှါ ဖြစ်ကြောင်းကို ဟောကြားတော်မူခဲ့သည်။[၁၀]

အာသဝက္ခယသုတ်[ပြင်ဆင်ရန်]

ရဟန်းတို့ ဤတရားငါးမျိုးတို့ကို ပွားများအပ် ကြိမ်ဖန်များစွာ ပြုအပ်ကုန်သည်ရှိသော် အာသဝေါတရားတို့၏ ကုန်ခြင်းငှါ ဖြစ်ကုန်၏။ အဘယ်တရားငါးမျိုးတို့နည်း ဟူမူ -

  • ရဟန်းတို့ ဤသာသနာတော်၌ ရဟန်းသည် ခန္ဓာကိုယ်၌ မတင့်တယ်ဟု ရှုလေ့ရှိသည်ဖြစ်၍ နေ၏။
  • မျိုအပ်သောအစာ ‘အာဟာရ’၌ စက်ဆုပ်ရွံရှာဖွယ်ဟု အမှတ်ရှိ၏။
  • လောကအားလုံး၌ မွေ့လျော်ဖွယ်မရှိဟု အမှတ်ရှိ၏။
  • အလုံးစုံသော သင်္ခါရတို့၌ မမြဲဟု ရှုလေ့ရှိ၏။
  • ထိုရဟန်းအား သေခြင်း၌ ဖြစ်သောအမှတ် ‘မရဏသညာ’ သည် ထိုရဟန်း၏ အတွင်းသန္တာန်၌ ကောင်းစွာတည်၏။

ရဟန်းတို့ ဤတရားငါးမျိုးတို့ကို ပွားများအပ် ကြိမ်ဖန်များစွာ ပြုအပ်ကုန်သည်ရှိသော် အာသဝေါတရားတို့၏ ကုန်ခြင်းငှါ ဖြစ်ကုန်၏ဟု (မိန့်တော်မူ၏)။[၁၀]


ကိုးကား[ပြင်ဆင်ရန်]

  1. -သံ၊၃၊၁၇၈။ သံ၊မြန်၊၃၊၁၈၅။ -သံယုတ္တနိကာယ၊ မဟာဝဂ္ဂသံယုတ္တ၊ ၄-ဣန္ဒြိယသံယုတ္တ၊ ၂-မုဒုတရဝဂ္ဂ၊ ဒသမသုတ်။
  2. -သံ၊၃၊၂၀၇။ သံ၊မြန်၊၃၊၂၁၃။ -သံယုတ္တနိကာယ၊ ... ၇-ဗောဓိပက္ခိယဝဂ္ဂ၊ စတုတ္ထသုတ်။
  3. -သံ၊၃၊၂၆၇။ သံ၊မြန်၊၃၊၂၇၀။ -သံယုတ္တနိကာယ၊ မဟာဝဂ္ဂသံယုတ္တ၊ ၈-အနုရုဒ္ဓသံယုတ္တ၊ ဒုတိယဝဂ္ဂ၊ စုဒ္ဒသမသုတ်။
  4. -သံ၊၃၊၂၉၇။ သံ၊မြန်၊၃၊၂၉၈။ -သံယုတ္တနိကာယ၊ မဟာဝဂ္ဂသံယုတ္တ၊ ၁၀-အာနာပါနသံယုတ္တ၊ ဒုတိယဝဂ္ဂ၊ ဒသမသုတ်။
  5. -သံ၊၃၊၃၈၀။ သံ၊မြန်၊၃၊၃၈၆-၇။ -သံယုတ္တနိကာယ၊ မဟာဝဂ္ဂသံယုတ္တ၊ ၁၂-သစ္စသံယုတ္တ၊ ၃-ကောဋိဂါမဝဂ္ဂ၊ ပဉ္စမသုတ်။
  6. -အံ၊၂၊၇၃။ အံ၊မြန်၊၂၊၈၉-၉၀။ အံ၊ဋ္ဌ၊၃၊၃၁။ -အင်္ဂုတ္တရနိကာယ၊ ပဉ္စကနိပါတ၊ ဒုတိယပဏ္ဏာသက၊ (၇) ၂-သညာဝဂ္ဂ၊ ဒသမသုတ်။
  7. -အံ၊၃၊၄၅၀။ အံ၊မြန်၊၃၊၄၄၂။ -အင်္ဂုတ္တရနိကာယ၊ ဒသကနိပါတ၊ တတိယပဏ္ဏာသက၊ (၁၂) ၂-ပစ္စုရောဟနီဝဂ္ဂ၊ ဒသမသုတ်။
  8. ဣတိဝုတ်၊၂၆၅။ ဣတိဝုတ်၊မြန်၊၂၅၁-၂။ ဣတိဝုတ်၊ဋ္ဌ၊၃၁၀။ -ခုဒ္ဒကနိကာယ၊ ဣတိဝုတ္တက၊ စတုက္ကနိပါတ၊ တတိယသုတ်။
  9. ပခုက္ကူမြို့ မဟာဝိသုတာရာမတိုက်၊ သာသနဓဇ သိရီပဝရ ဓမ္မာစရိယ၊ B.A (ဝိဇ္ဇာဂုဏ်ထူး-သီရိလင်္ကာ)၊ အဂ္ဂမဟာပဏ္ဍိတ ဘဒ္ဒန္တ ကေလာသမဟာထေရ် တိပိဋကသူစိကျမ်း နှင့် နိုင်ငံတော်ပရိယတ္တိသာသနာ့ တက္ကသိုလ် (ရန်ကုန်) ဒုတိယပါမောက္ခချုပ်၊ အဂ္ဂမဟာပဏ္ဍိတ ဘဒ္ဒန္တကုမာရထေရ် တိပိဋက သုတ္တသူစိ ဝိဘာဝိနီ
  10. ၁၀.၀ ၁၀.၁ အင်္ဂုတ္တရနိကာယ်၊ အင်္ဂုတ္တိုရ်ပါဠိတော် မြန်မာပြန်၊ ပဉ္စကနိပါတ်၊ ၂-ဒုတိယပဏ္ဏာသက (ဒုတိယသုတ်ငါးဆယ်)၊ (၇) ၂-သညာဝဂ် ၁၀- အာသဝက္ခယသုတ်