အမေကျော်ဒွေးတော်မလွမ်းနှင့်
အမေကျော်ဒွေးတော်မလွမ်းနှင့် ကဗျာကို မောင်းထောင်းဦးကျော်လှ ရေးသားခဲ့သည်။ သံချို ကဗျာအမျိုးအစားဖြစ်သည်။
အကြောင်းအရာ
[ပြင်ဆင်ရန်](၁) ပါပါ၊ (၂) သူရဇ္ဇျံ၊ (၃) အမြိုတ္တ၊ (၄) ကောလီ ဟူသော ဓာတ်လေးပါးအနက် ပါပဓာတ်ကိန်းကြုံပါက ကောင်းကင်တွင် သွေးကဲ့သို့ နီရဲခြင်းဖြစ်ပြီး မင်းပြောင်းမင်းလွှဲ ဖြစ်တတ်သည်ဟု လူများ ပြောကြသည်။ အင်္ဂလိပ်ဘုရင်မကြီး လက်ထက်တွင် ထိုနမိတ်ပြသဖြင့် မင်းပြောင်းမင်းလွှဲ မျှော်လင့်သူများအား အကျိုးအကြောင်းပြကာ ဖွဲ့ဆိုခဲ့သည်။
အမေကျော်ဒွေးတော်မလွမ်းနှင့်
[ပြင်ဆင်ရန်]ကပ်မသမာဓာတ်ပါပတွင်မှ၊ ကာလတကြိမ်ပျက်စဉ်က၊ တိမ်တက်ခါနီလို့ရဲခဲ့၊ ဤနဲတူသွင်နီညှိမို့၊ ယခင်လိုပျက်လိမ့်အုံးမည်လို့၊ ပြည်လုံးကုန်ပြောရှာကြပေငဲ့၊ ကောလာဟလဝစနံ။
ယိုးဒယားရယ်နှင့်၊ မျိုးခြားသူဘုရင်ဖြစ်လိမ့်မတဲ့၊ ပြင်သစ်မျှော်ကာတမ်းသူနှင့်၊ ဟော်နန်းစံဉဒည်ဘွာငဲ့ပြင်၊ ရွတ်ရှားတွေလာပြီကောရယ်လို့၊ ဇွတ်သမားတွေမြန်ပြည်တကျောမှာ၊ ပြောရှာကြဆူလို့ညံ။'
နွယ်မတူဘယ်လူမျိုးသော်မှ၊ အုပ်စိုးကာနိုင်ငံချဲ့စေတော့၊ ကံမဲ့လူပျက်ပြိုယွင်းလို့၊ ကံရှိသူ ဂုဏ်ထင်လင်းပါလိမ့်၊ အရင်းဖြင့်ကံသာကံ၊ ဓမ္မခန်စီကုံး။
ကျောင်းကြီးစံမထေရ်ရှင်က၊ ခေါင်းကျင်အောင် ကျောင်းတွင်မျောက်ကိုလ၊ တချက်ပင် ရက်စဉ်ခေါက်သတဲ့၊ ထိုမျောက်ငယ်စိတ်နာသီးလို့၊ ခင်ကြီးကို သေဆုတောင်းပြန်ခဲ့၊ နောက်ကျောင်းတိုင် ဦးပဉ္ဇင်းငယက၊ မြင်ပြင်းကာ နားထင်အပ်အောင်ပ၊ နှစ်ချက်ပင်ရက်စဉ် ခေါက်ပြန်သတဲ့၊ ထိုနောက်မောင် ရှင်လာခဲ့လျှင် မြန်မကြာခန္ဓာ ကြွေမည်ကြောင့်၊ မာပါစေ မေတ္တာပို့သည့်နှယ်၊ မြို့ဥဒည်ဂန္ဓာချုပ်ပေတဲ့၊ တရုပ်တွေခွေဆံကျစ်ရယ်နှင့်၊ ပြင်သစ်လူ ဘယ်ရွတ်ရှားသော်မှ၊ တပါးဘုရင်သခင်မလိုဖြင့်၊ သနားမည်မထင်မှတ်ပါနှင့်၊ ဘိလပ်စံရှင်ဘုရင်ငဲ့ပြင်၊ မျောက်နာအသွင်၊ နောက်လာအရှင်ကိုမတကြနှင့်၊ နှစ်ချက်ဆရာပင် သက်သာလှပြီလို့ကွယ်၊ အောက်မေ့ကြအုံး။
ခက်ဆစ်
[ပြင်ဆင်ရန်]၁။ ကောလာဟလဝစနံ = အခြေအမြစ်မရှိ ပြောကြားသော စကား။
၂။ ဓမ္မခန် = ဓမ္မခန္ဓာ၊ ဘုရားဟောတရားအစုံ။
မှတ်ချက်
[ပြင်ဆင်ရန်]ဤကဗျာခေါင်းစဉ်သည် မောင်းထောင်းဦးကျော်လှ ကိုယ်တိုင် နာမည်ပေးခဲ့ခြင်း မဟုတ်ပါ။ သင့်တော်မည်ထင်သော နာမည်ကို ပေးထားခြင်း ဖြစ်သည်။
ကိုးကား
[ပြင်ဆင်ရန်]- ↑ မောင်းထောင်းဦးကျော်လှ၏ သံချိုကဗျာပေါင်းချုပ်။ ယဉ်ကျေးမှုဝန်ကြီးဌာန၊ ယဉ်ကျေးမှုဗိမာန်ဌာန။ နိုဝင်ဘာ ၁၉၈၃။