ရှင်သီဝလိဂမုန်း

ရှင်သီဝလိဂမုန်းပင်

ဂမုန်းပင်အမျိုးအစား အများအပြား ရှိတဲ့အနက်မှ ရှင်သီဝလိဂမုန်း လို့ ခေါ်တွင်နေတဲ့ Mauna Loa ကိုမြန်မာလူမျိုးတွေက မြတ်မြတ်နိုးနိုး စိုက်ပျိုးထားရှိကြပါတယ်။ ရှင်သီဝလိဂမုန်း ရဲ့ ရုက္ခဗေဒအမည်ကတော့ Spathiphyllum wallisii ဖြစ်ပြီး peace lily၊ closet lily လို့လည်း ခေါ်ကြပါတယ်။ လူသိများတဲ့အမည်ကတော့ Mauna Loa ဖြစ်ပြီး အလင်းရောင် အနည်းငယ် ရှိရုံမျှနဲ့ ရှင်သန်နိုင်တဲ့ အပင်မျိုးဖြစ်ပါတယ်။ နေရောင်ခြည်ထိတွေ့ ရရှိဖို့ မလွယ်ကူတဲ့ ဟိုတယ် ဧည့်ခန်းမကြီးများ ၊ စူပါမားကက်များ နှင့် အဆောက်အဦး အကြီးကြီးတွေ အတွင်းမှာ ကောင်းမွန်စွာ ရှင်သန်ကြီးထွားနိုင်ပါတယ်။

မူလဇာတိ

ရှင်သီဝလိဂမုန်း ရဲ့ မူလဇာတိနေရာကတော့ ဟာဝိုင်ယီဒေသမှ တောင်တန်းများဖြစ်တဲ့ Mountains of Mauna Loa နေရာဒေသ မှဖြစ်ပါတယ်။ အရွက်များဟာ တောက်ပတဲ့ အစိမ်းရင့်ရောင်ရှိပြီး လှပပါတယ်။ ရှင်သီဝလိဂမုန်း ရဲ့ အပွင့်ဟာ အဖြူရောင်ရှိပြီး အနံ့အနည်းငယ်သင်းသင်းလေး မွှေးပါတယ်။ အစိမ်းရောင် ရိုးတံဖြောင့်ဖြောင့် အပေါ်မှာ အဖြူရောင်အပွင့် ငွားငွားစွင့်စွင့် ပွင့်နေတာဟာ အင်မတန်မှကို ကြည့်ကောင်းပါတယ်။ အစိမ်း နဲ့ အဖြူ ဆန့်ကျင်ဘက်အရောင်နှစ်ခု ကိုပေါင်းစည်းတားတဲ့ ပန်းပွင့် ရဲ့ အလှဟာ ပန်းချီဆန်လှပါတယ်။

စိုက်ပျိုးပုံ

ရှင်သီဝလိဂမုန်းပန်း

အိမ်ခန်းတွင်း မည်သည့်နေရာမှာမဆို လှပနေတဲ့ ပန်းပင်ဖြစ်ပါတယ်။ ရှင်သီဝလိဂမုန်းပင်ဟာ စိုက်ထားပြီးလျှင် အထွေအထူးပြုစုပျိုးထောင်ဂရုစိုက်နေစရာမလိုအပ်သလို ရေအများကြီးလောင်းပေးဘို့လည်း မလိုအပ်ပါဘူး။ မြေဆီလွှာကို ရေအနည်းငယ်စိုစွတ်စေရုံမျှဖြင့်သာ စိုက်ပျိုးနိုင်ပါတယ်။ အပွင့်များများပွင့်စေလိုလျှင် အပင်ကိုပူနွေးစွတ်စိုသောနေရာမျိုးမှာ စိုက်ပျိုးထားရှိရပါမယ်။ ပူအိုက်တဲ့နေရာ ဒေသမျိုးမှာ အပွင့်များများပွင့်တတ်ပါတယ်။ ရေများများလောင်းမိလျှင် အခြားအိမ်တွင်းပန်းပင်များကဲ့သို့ အပင်သေသွားပါလိမ့်မယ်။ ပန်းအိုးအတွင်း မြေကြီးခြောက်သွေ့စပြုမှသာ တစ်ခါရေလောင်းပေးရံမျှဖြင့် လုံလောက်ပါတယ်။ စိုထိုင်းပြီးရေစီးကောင်းတဲ့ မြေဆီလွှာအနေအထားမျိုးက ရှင်သီဝလိဂမုန်းအတွက် အကောင်းဆုံးဖြစ်ပါတယ်။ အိမ်ခန်းအတွင်းမှာ ပန်းအိုးနှင့်အလှဆင်ပြီးထားတော့မယ်ဆိုလျှင် တံခါးပေါက်ဘေးနားမှာထားလျှင် အသင့်တော်ဆုံးပါပဲ။ နွေးပြီးစိုထိုင်းတဲ့နေရာမျိုးဟာ ရှင်သီဝလိဂမုန်းပင်အတွက် အကောင်းဆုံးဖြစ်ပါတယ်။

ပန်းပင်ကြီးထွားလာပြီး ပန်းအိုးထဲမှာ အမြစ်တွေကျလာပြီဆိုလျှင် ပိုမိုကြီးမားတဲ့ ပန်းအိုးအတွက်ရွှေ့ပြောင်းစိုက်ပေးဖို့ လိုအပ်လာပါတယ်။ အမြစ်များ ကြပ်သိပ်နေမယ်ဆိုရင် ပန်းပင် ကြီးထွားမှုကို နှောင့်နှေးစေပြီး နောက်ဆုံးမှာ အပင်ဟာ ကျုံလှီပြီး သေသွားမှာ တတ်ပါတယ်။ ရှင်သီဝလိဂမုန်းကို စိုက်တော့မယ်ဆိုရင် အပင်ကိုကောင်းစွာ ရေဆေး ရေလောင်းပေးလျှင် အမြစ်နှင့်မြေဆီလွှာတို့ ကောင်းစွာတွယ်ကပ်နိုင်မှာ ဖြစ်ပါတယ်။ အိုးပြောင်းစိုက်တော့မယ်ဆိုရင် အပင်ဘေးပတ်ပတ်လည်မှာ မြေကြီးကိုဖြေးညှင်းစွာ ဖြည့်ပေးတာကောင်းပါတယ်။ မြေကြီးကို ပြည့်ကြပ်သိပ်နေအောင်ဖြည့်တာဟာ အမြစ်ဆီကို လေရောက်စေခြင်းကို အဟန့်အတားဖြစ်စေတာကြောင့် မြေကြီးမွမွလေးတွေကို အသုံးပြုတာအကောင်းဆုံးပါပဲ။

ရှင်သီဝလိဂမုန်းပင်ဟာ အပင်ပွားလွယ်တဲ့ ပန်းပင်မျိုးဖြစ်ပါတယ်။ အမြစ်များကြီးထွားပြိး နောက်ထပ်အပင်သစ်တစ်ပင်ကို ဖြစ်စေနိုင်သလို ပန်းပွင့်ရဲ့ ဝန်မှုန်တံ ကြီးထွားရင့်မှည့်လာပြီး မျိုးစေ့များမှလည်း အပင်သစ်ဖြစ်စေပါတယ်။ အလင်းရောင်အများကြီးလည်းမလို၊ ရေလည်းအများကြီး လောင်းစရာမလိုဘဲ အိမ်ခန်းတွင်းမှာ စိမ်းစိုကာ လှပပြီး ပန်းချီဆန်တဲ့ မွှေးရနံ့သင်းသော အပွင့်ဖြူဖြူလေးတွေ ပွင့်တဲ့ ရှင်သီဝလိဂမုန်းပင်ကို ရွေးချယ်စိုက်ပျိုးမယ်ဆိုရင် မိမိအိမ်ခန်း ၊ ရုံးခန်း အတွင်းမှာ လှပနေရုံတင်မကဘဲ လာဘ်လာဘလည်း တိုးပွားစေတယ်လို့ မြန်မာလူမျိုးများက အယူရှိကြပါတယ်။