ဟန်ရွှေ

ဦး ဟန်ရွှေ
တိုင်းရင်းသားစည်းလုံးညီညွတ်ရေးပါတီ ဥက္ကဋ္ဌ
တာဝန်ထမ်းဆောင်ဆဲ
တာဝန် စတင် ၁၅ ဇန်နဝါရီ ၂၀၂၁
ယခင်လူ	ဦးသန်းတင်
ကိုယ်ရေး အချက်အလက်များ
မွေးဖွား	(1941-05-09) ၉ မေ၊ ၁၉၄၁ ဒိုက်ဦးမြို့၊ပဲခူး
နိုင်ငံရေးပါတီ	မြန်မာ့ဆိုရှယ်လစ်လမ်းစဉ်ပါတီ (ယခင်) တိုင်းရင်းသားစည်းလုံးညွတ်ရေးပါတီ (ယခု)
မိဘ	ဦးချစ်မောင် + ဒေါ်သိန်းကျော့
မိခင်ကျောင်း	ရန်ကုန်တက္ကသိုလ်

ဦးဟန်ရွှေ (၉ မေ ၁၉၄၁ မွေးဖွား) သည် မြန်မာ့နိုင်ငံရေးသမား တစ်ဦး ဖြစ်ပြီး၊ မြန်မာ့ဆိုရှယ်လစ်လမ်းစဉ်ပါတီ၏ အမွေကိုဆက်ခံယူထားသည့် တိုင်းရင်းသားစည်းလုံးညီညွတ်ရေးပါတီ၏ လက်ရှိ ဥက္ကဋ္ဌ ဖြစ်သည်။စစ်ဗိုလ်ချုပ်ဟောင်းများသာဦးဆောင်ခဲ့သည့် ထိုပါတီတွင် သူသည် အရပ်သားအနေဖြင့် ပထမဦးဆုံးဦးဆောင်သူဖြစ်ခဲ့ပြီး၊ပါတီ၏ စတုတ္ထမြောက် ဥက္ကဋ္ဌ လည်း ဖြစ်သည်။

ငယ်ဘဝ နှင့် ပညာရေး

ဦးဟန်ရွှေကို ပဲခူးတိုင်းဒေသကြီး၊ဒိုက်ဦးမြို့၌ ဦးချစ်မောင်၊အမိဒေါ်သိန်းကျော့တို့က မွေးဖွားခဲ့သည်။၁၉၅၈ ခုနှစ် တွင် တက္ကသိုလ်ဝင်စာမေးပွဲအောင်မြင်ပြီး၊ ၁၉၆၂ ခုနှစ် တွင် ရန်ကုန်တက္ကသိုလ် မှ ဝိဇ္ဇာဘွဲ့ရရှိခဲ့သည်။

လမ်းစဉ်ပါတီနိုင်ငံရေးဘဝ

၁၉၆၅ ခုနှစ်၊ မြန်မာ့ဆိုရှယ်လစ်လမ်းစဉ်ပါတီခေတ် ကာလတွင် သူသည် ပဲခူးမြို့နယ် ပါတီယူနစ်အတွင်းရေးမှူး၊၁၉၆၈ ခုနှစ် တွင် သန်လျင်မြို့နယ် ပါတီယူနစ် ဥက္ကဋ္ဌအဖြစ် တာဝန်ထမ်းဆောင်ခဲ့သည်။

၁၉၇၇ ခုနှစ် အရောက်တွင် ပါတီဌာနချုပ် ၏ ညီလာခံမှတဆင့် ပါတီဗဟိုကော်မတီဝင် တစ်ဦး ဖြစ်လာခဲ့သည်။ထိုတာဝန်ကို ၁၉၈၈ ခုနှစ် အထိ ထမ်းဆောင်ခဲ့သည်။သူ၏ လမ်းစဉ်ပါတီနိုင်ငံရေး ဖြတ်သန်းမှုသည် ပါတီဗဟိုကော်မတီဌာနချုပ်၌သာ အများဆုံးကုန်ဆုံးခဲ့သည်။

ပါတီနိုင်ငံရေးဘဝ

၁၉၈၈ ခုနှစ် တွင် မဆလပါတီမှ တိုင်းရင်းသား စည်းလုံးညီညွတ်ရေးပါတီသို့ အမည်ပြောင်းလဲခဲ့ပြီးနောက်၊သူသည် တစညပါတီ၏ ဗဟိုအလုပ်အမှုဆောင် ကော်မ တီ၊ စည်းရုံးရေး ကော်မတီကြီး တာဝန်ခံအဖြစ် တာဝန်ယူ ဆောင်ရွက်ခဲ့သည်။

၂၀၁၀ပြည့်နှစ်၊အထွေထွေရွေးကောက်ပွဲ အပြီးနောက်ပိုင်းတွင် သူသည် တစညပါတီ ၏ ပြောရေးဆိုခွင့်ရှိသူ ဖြစ်လာခဲ့ပြီး၊ပါတီ၏ သတင်းများအား အများသိအောင် ထုတ်ပြန်သူ အဖြစ် ထင်ရှားလာသည်။၂၀၁၄ ခုနှစ် တွင် တစညပါတီ ၏ ဒုတိယမြောက် ဥက္ကဋ္ဌ ဦးထွန်းရီ ကွယ်လွန်ပြီး၊တိုင်းရင်းသားစည်းလုံးညီညွတ်ရေးပါတီ ၏ ဥက္ကဋ္ဌ အသစ် အဖြစ် အသက် ၈၉ နှစ် အရွယ် အငြိမ်းစား ဗိုလ်မှူးချုပ်ဟောင်း ဦးသန်းတင်ကို ပါတီဗဟိုအလုပ်အမှုဆောင်အဖွဲ့က ရွေးချယ်တင်မြှောက်ခဲ့သည်။

ဤနောက်ပိုင်းတွင် ဦးဟန်ရွှေ သည် ပါတီ၏ ဒုတိယဥက္ကဋ္ဌ ဖြစ်လာခဲ့သည်။သူသည် ထိုတာဝန်ကို ပါတီပြောရေးဆိုခွင့်ရှိသူအဖြစ်နှင့်ပါ ပူးတွဲထမ်းဆောင်ခဲ့သည်။

၂၀၂၁ ခုနှစ်၊ဇန်နဝါရီ ၁၄ ရက် တွင် တိုင်းရင်းသားစည်းလုံးညီညွတ်ရေးပါတီဥက္ကဋ္ဌ ဦးသန်းတင် ကွယ်လွန်ခဲ့သည်။သူသည် ယင်းပါတီ၏ ဒုတိယဥက္ကဋ္ဌ အဖြစ်မှ ယာယီဥက္ကဋ္ဌ ဖြစ်လာပြီး၊ဆက်လက်၍ ဥက္ကဋ္ဌ အဖြစ် တင်မြှောက်ခံခဲ့ရသည်။