ရှင်ဆံတော်စေတီတော်

ရှင်ဆံတော်စေတီတော် (ကလိန်အောင် ဆံတော်ရှင်စေတီတော် ဟုလည်း ခေါ်) ထားဝယ်မြို့မှ မြောက်ဘက် ထားဝယ်-ရေး ကားလမ်းမှ ၄၇ မိုင်အကွာ ရေဖြူမြို့နယ်၊ ကလိန်အောင်မြို့တောင်ပေါ်တွင် တည်ရှိသည့် စေတီတော်တစ်ဆူ ဖြစ်သည်။

သမိုင်းကြောင်း

ဂေါတမမြတ်စွာဘုရားသည် ၁၁ ဝါမြောက်တွင် မြောက်ဥတ္တရကုရုကျွန်းမှ ဆွမ်းခံပြန်လာချိန် ဝေမိဿကတောင်အရောက်၌ ဂဝံပတေ့ရသေ့၊ ဒူရကနတ်သား၊ ကုမ္ဘဏ္ဍနတ်ဘီလူးတို့နှင့် တွေ့ခဲ့သည်။ ဘုရားရှင်သည် ဆံတော်သုံးဆူ ပေးသနားခဲ့သည်။ ထို့နောက် ရသေ့၊ နတ်နှင့် ဘီလူးသုံးဦးတို့အား ဝေဿဝဏ္ဏတောင်ကုန်း၌ ရှေးဘုရားသုံးဆူဖြစ်သည့် ကကုသန်၊ ကောဏာဂုံ၊ ကဿပဘုရားတို့၏ ဆံတော်မူတည်ရှိပြီး ထိုဆံတော်များနှင့်အတူ မိမိဆံတော်သုံးဆူကိုပါဌာပနာရန် ဗျာဒိတ်ထားခဲ့သည်။

ဘုရားရှင်၏ ဗျာဒိတ်အတိုင်းပင် ဝေဿဝဏ္ဏတောင်ကုန်းတွင် စောက် အတောင် ၄၀၊ အနံအလျား အတောင် ၃၀ တူး၍ အင်္ဂတေဖြင့် ချောမွေ့သေသပ်စွာ ပြုလုပ်ကာ ဆံတော်သုံးဆူကို ဌာပနာ၍ ဉာဏ်တော် ၁၅ တောင်ရှိသည့် ကျောက်စေတီကို တည်ခဲ့သည်။ စေတီတော်သည် ဆုတောင်းပြည့်သည့်အတွက် “ဆုတောင်းပြည့်ဆံတော်ရှင်” ဟုလည်း တွင်သည်။

သမိုင်းမူကွဲ

ပွင့်တော်မူပြီးသော ဘုရားရှင်များ ဖြစ်ကြသည့် ကကုသန်၊ ကောဏာဂုံ၊ ကဿပ၊ ဂေါတမ ဘုရားလေးဆူ၏ ဆံတော်များ (၃) ဆူစီကိန်းအောင်းစံပယ်လျက်ရှိပြီး တစ်ဆယ့်နှစ်ဆူသော ဆံတော်မြတ်များ ကိန်းအောင်းနေသည့် “ကလိန်အောင်ဆံတော်ရှင်စေတီတော်မြတ်ကြီ” ဖြစ်သည်ဟုလည်း အဆိုရှိ၏။

အခြားသိမှတ်ဖွယ်များ

• ဘုရားပွဲတော်ကို တပေါင်းလပြည့်နေ့တွင် နှစ်စဉ်နှစ်တိုင်း ကျင်းပသည်။
• ဘုရားပွဲတော်ရက် နီးကပ်လာပါက စေတီတော်သည် နှစ်စဉ် ရောင်ခြည်တော်များ ကွန့်မြူးလေ့ရှိသည်။
• စေတီတော်ပေါ်ရှိ ကျောက်တုံးပေါ်မှ အံ့ဩဖွယ် ရေထွက်လျက်ရှိသည်။
• ရှင်ဆံတော် (ခ) ကလိန်အောင်ဆံတော်ရှင်စေတီတော်သည် ရှင်ကိုးရှင်ဘုရားများတွင် နံပါတ် ၉ ဖြစ်သည်။