ရေသူမကလေး (ရုပ်တု)

ရေသူမကလေး (ဒိန်းနစ်ဘာသာ Den lille havfrue) သည် ကြေးဝါဖြင့် ပြုလုပ်ထားသော ရေသူမရုပ်တုတစ်ခုဖြစ်ပြီး ကိုပင်ဟေဂင်မြို့ တွင် တည်ရှိသည်။

ဤရုပ်တုကို ဒိန်းနစ် အနုပညာရှင် အက်ဒဗတ် အဲရစ်ဆင် (Edvard Eriksen) က ဖန်တီးခဲ့ပြီး၊ လန်ဂလီနီ ကမ်းရိုးတန်းလမ်းလျှောက်လမ်း (Langelinie) တွင်၊ ကိုပင်ဟေဂင် ဆိပ်ကမ်း၏ ပင်လယ်အော်အတွင်း တည်ထားသည်။ အဆိုပါ ဆိပ်ကမ်းသည် ဘော်လတစ် ပင်လယ် သို့ ဆက်သွယ်နေပြီး၊ အာမေလီယန်ဘော့ဂ် နန်းတော် (Amalienborg Palace) အနီးတွင်လည်း ရှိသည်။ ရုပ်တုကို ပင်လယ်ထဲသို့ ထိုးထွက်နေသော ကျောက်တုံးများပေါ်တွင် တင်ထားသည်။ ယနေ့အချိန်တွင် ဤရုပ်တုသည် မြို့၏ အထင်ရှားဆုံး သင်္ကေတဖြစ်သည်။

ဤရုပ်တုသည် ၁၈၃၇ ခုနှစ်တွင် ဒိန်းနစ် စာရေးဆရာ ဟန် ခရစ်ရှန် အင်န်ဒါဆင် ရေးသားခဲ့သော အမည်တူ ဒဏ္ဍာရီပုံပြင်ကို အခြေခံထားသည်။ အရွယ်အစားသေးငယ်ပြီး ထင်ပေါ်ခမ်းနားမှု မများသော်လည်း၊ ၁၉၁၃ ခုနှစ်တွင် ဖွင့်လှစ်ခဲ့ပြီးနောက်မှစ၍ ကိုပင်ဟေဂင်မြို့၏ အမှတ်အသားတစ်ခုအဖြစ် လူသိများလာကာ အရေးပါသော ခရီးသွားဆွဲဆောင်မှုတစ်ခု ဖြစ်လာခဲ့သည်။ နောက်ဆုံး ဆယ်စုနှစ်များအတွင်းတွင်တော့ အဖျက်အဆီးလုပ်သူများနှင့် နိုင်ငံရေး လှုပ်ရှားသူများ၏ ပစ်မှတ်ဖြစ်လာခဲ့သည်။