ရုရှားကျူးကျော်စစ်ကာလ ယူကရိန်း ယဉ်ကျေးမှု

ဝိုင်းရံခြင်းမခံရမီ Chernihiv ရှိ ပြည်သူ့ စာကြည့်တိုက် ။

ရုရှားနိုင်ငံသည် ယူကရိန်းနိုင်ငံအပေါ် ကျူးကျော်စစ်ကို ၂၀၂၂ ဖေဖော်ဝါရီ ၂၄ ရက်နေ့တွင် စတင်ခဲ့သည်။ ယင်းသည် ၂၀၁၄ ခုနှစ်တွင် စတင်ခဲ့သော ရုရှား-ယူကရိန်း စစ်ပွဲ၏ အကြီးမားဆုံး အရှိန်မြှင့်တင်မှု ဖြစ်သည်။ ဤစစ်ပွဲသည် ဒုတိယကမ္ဘာစစ်နောက်ပိုင်း ဥရောပတိုက်တွင် အကြီးမားဆုံး ထိုးစစ်ဆင်မှုတစ်ခု ဖြစ်သည်။ တိုက်ပွဲအတွင်း ယူကရိန်းနိုင်ငံတစ်ဝှမ်း အထိခိုက်အပျက်အစီး များပြားခဲ့ကာ ယူကရိန်း ယဉ်ကျေးမှုအမွေအနှစ်များလည်း ပါဝင်သည်။ ဤသို့ ယဉ်ကျေးမှုအမွေအနှစ်‌နေရာ ၅၀၀ ကျော်ကို ရည်ရွယ်ချက်ရှိရှိ ဖျက်ဆီးခြင်းနှင့် လုယက်ခြင်းတို့ကို စစ်ရာဇဝတ်မှု အနေဖြင့် သတ်မှတ်သည်။ ယူကရိန်းယဉ်ကျေးမှုဝန်ကြီးကလည်း ထိုလုပ်ရပ်များကို ယဉ်ကျေးမှုဆိုင်ရာ လူမျိုးတုံးသတ်ဖြတ်မှု အဖြစ် ဖော်ပြခဲ့သည်။

ဥပဒေပိုင်းဆိုင်ရာ အကာအကွယ်များ

ယဉ်ကျေးမှုဆိုင်ရာ ပိုင်ဆိုင်မှုသည် နိုင်ငံတကာ လူသားချင်းစာနာထောက်ထားမှုဆိုင်ရာ ဥပဒေအောက်တွင် အထူးကာကွယ်မှု ရရှိသည်။ ဂျနီဗာကွန်ဗင်းရှင်းနှင့် လက်နက်ကိုင်ပဋိပက္ခဖြစ်ပွားမှုတွင် ယဉ်ကျေးမှုဆိုင်ရာ အကာအကွယ်ပေးရေးဆိုင်ရာ Hague သဘောတူညီချက် (ယူကရိန်းနှင့် ရုရှားနှစ်နိုင်ငံစလုံးတွင် အကျုံးဝင်သည်) အရ အဖွဲ့ဝင်နိုင်ငံများသည် ၎င်းတို့၏ စစ်ရေးအားထုတ်မှုကို ပံ့ပိုးရန်အတွက် သမိုင်းဝင် အထိမ်းအမှတ်အဆောက်အအုံများကို အသုံးပြုခြင်း၊ သို့မဟုတ် ထိုအဆောက်အအုံများကို ရန်ငြိုးဖွဲ့စရာ လက်တုံ့ပြန်စရာအရာများအဖြစ် ပြုလုပ်ခြင်းမပြုရန် တားမြစ်ထားသည်။ Hague ကွန်ဗင်းရှင်း၏ ဒုတိယပရိုတိုကောသည် အခြားရွေးချယ်စရာနည်းလမ်း မရှိသောအခါမှ "မဖြစ်မနေလိုအပ်သော စစ်ရေးလိုအပ်ချက်" အတွက်သာ ယဉ်ကျေးမှုဆိုင်ရာ ပိုင်ဆိုင်မှုများအပေါ် တိုက်ခိုက်ခြင်းကို ခွင့်ပြုပါသည်။ ယဉ်ကျေးမှုအမွေအနှစ်များကို တိုက်ခိုက်ခြင်းသည် စစ်ရာဇ၀တ်မှုမြောက်ပြီး နိုင်ငံတကာရာဇ၀တ်ခုံရုံးတွင် တရားစွဲဆိုနိုင်သည်။

ထင်ရှားသော အထိမ်းအမှတ်နေရာများ

Chernihiv ရှိ Trinity ဘုန်းတော်ကြီးကျောင်းသည် ရုရှားနိုင်ငံ၏ ကျူးကျော်စစ်အတွင်း ပျက်စီးသွားခဲ့သည်။

ယူကရိန်းတွင် Kyiv ရှိ စိန့်ဆိုဖီယာဘုရားကျောင်း၊ Kyiv-Pechersk Lavra နှင့် Lviv လေးပုံတစ်ပုံတစ်ခုလုံး အပါအဝင် United Nations Educational, Scientific, and Cultural Organization (UNESCO) ကမ္ဘာ့အမွေအနှစ်စာရင်းဝင်နေရာ ခုနစ်ခုရှိသည်။ Kharkiv၊ Mykolaiv နှင့် Chernihiv ရှိ နောက်ထပ်နေရာများကို ကမ္ဘာ့အမွေအနှစ်စာရင်းသွင်းရန် ထည့်သွင်းစဉ်းစားထားသော်လည်း ကျူးကျော်မှုမတိုင်မီအထိ မထည့်သွင်းရသေးပါ။

2022 ခုနှစ် ဧပြီလနှောင်းပိုင်းတွင် ယူကရိန်းမှ ရေအောက်နစ်မြုပ်ပျက်စီးသွားသည့် ရုရှား ကရူဇာစစ်သင်္ဘောကြီး Moskva ကို "ရေအောက်ယဉ်ကျေးမှုအမွေအနှစ်" နေရာအဖြစ် စာရင်းသွင်းခဲ့ကြောင်း Politico မှ အစီရင်ခံခဲ့သည်။

ထိန်းသိမ်းရေး ကြိုးပမ်းမှုများ

ပြည်တွင်း

Kyiv ရှိ ယူကရိန်းနိုင်ငံသမိုင်းပြတိုက်၏ ဒါရိုက်တာ Fedir Androshchuk သည် ပြတိုက်အား တိုက်ခိုက်ခြင်းနှင့် လုယက်ခြင်းမှ ကာကွယ်ရန် လုပ်ဖော်ကိုင်ဖက်နှစ်ဦးနှင့်အတူ လုပ်ဆောင်ခဲ့သည်။ Vinnytsia၊ Zhytomyr၊ Sumy နှင့် Chernihiv ရှိ ပြတိုက်လေးခုမှ အဓိက ပြပွဲများကိုလည်း ဖယ်ရှား၊ သိမ်းဆည်းကာ ကာကွယ်နိုင်ခဲ့ကြောင်း Androschuck မှ အစီရင်ခံတင်ပြခဲ့သည်။ Vinnytsia ရှိ ပြတိုက်ကိုမူ ရွှေ့ပြောင်းနေထိုင်သူများအတွက် အိမ်ရာအဖြစ် ပြောင်းလဲအသုံးပြုထားသည်။ ယူကရိန်းအနောက်ပိုင်းရှိ Ivano-Frankivsk ခေတ်ပြိုင်အနုပညာစင်တာတွင် အခြေစိုက်သည့် အနုပညာရှင်စုပေါင်းအဖွဲ့တစ်ဖွဲ့သည် ပံ့ပိုးမှုအနည်းငယ်ဖြင့် အခြေခံလူတန်းစား အနုပညာနေရာများမှ လက်ရာများကို ဘေးလွတ်ရာသို့ ရွှေ့ပြောင်းထိန်းသိမ်းရန် ကြိုးပမ်းခဲ့သည်။ ထိုစုပေါင်းအဖွဲ့သည် လျှို့ဝှက်နေရာများတွင် သိုလှောင်ရုံအများအပြားကို ဖန်တီးခဲ့ပြီး Kyiv၊ Mariupol၊ Odesa၊ Zaporizhzhya နှင့် အခြားသောမြို့များရှိ ပြခန်းများမှ အနုပညာလက်ရာများကို ရွေ့ပြောင်းပေးခဲ့သည်။