ယောတပ်တော်

ယောကာကွယ်ရေးတပ် နှင့် မရောထွေးပါနှင့်။

ယောတပ်တော် Yaw Army
ယောတပ်တော်၏ အမှတ်တံဆိပ်
ခေါင်းဆောင်	ယောမြေတိုးတက်ရေးပါတီ စစ်ဦးစီးချုပ်
စတင်လှုပ်ရှားခြင်း	၂ ဇန်နဝါရီ ၂၀၂၄ (၂၀၂၄-၀၁-၀၂) – လက်ရှိ
ဌာနချုပ်	လျှို့ဝှက်
လှုပ်ရှားနယ်မြေ	ယောဒေသနှင့်ဆက်စပ်ဧရိယာ
နိုင်ငံရေးအယူဝါဒ	စစ်အာဏာရှင်စနစ်ချုပ်ငြိမ်းရေး
အရွယ်အစား	မသိရှိရ
မဟာမိတ်	အာရက္ခတပ်တော် ကချင်လွတ်လပ်ရေးတပ်မတော် ဗမာပြည်သူ့လွတ်မြောက်ရေးတပ်တော် နွေဦးတော်လှန်ရေးမဟာမိတ်တပ်ပေါင်းစု အမျိုးသားညီညွတ်ရေးအစိုးရ ပြည်သူ့ကာကွယ်ရေးတပ်မတော် မြိုင်မြို့နယ်ပြည်သူ့ကာကွယ်ရေးအဖွဲ့ မကွေးပြည်သူ့ကာကွယ်ရေးတပ်မတော်
ပြိုင်ဘက်များ	မြန်မာနိုင်ငံ နိုင်ငံတော်စီမံအုပ်ချုပ်ရေးကောင်စီ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် တပ်မတော်
စစ်ပွဲနှင့် တိုက်ပွဲများ	မြန်မာ့ပြည်တွင်းပဋိပက္ခများ မတူပီမြို့သိမ်းတိုက်ပွဲ မင်းတပ်မြို့သိမ်းတိုက်ပွဲ အမ်းမြို့သိမ်းတိုက်ပွဲ ယောဒေသတွင်းတိုက်ပွဲများ

ယောတပ်တော် (အင်္ဂလိပ်: Yaw Army; အတိုကောက် YM)သည် ယောဒေသအခြေပြု မြန်မာနိုင်ငံရှိ တိုင်းရင်းသား လက်နက်ကိုင်အဖွဲ့အစည်းတစ်ခုဖြစ်သည်။

သမိုင်းအကျဉ်း

၂၀၂၁ ခုနှစ် ဖေဖော်ဝါရီလ ၁ ရက်နေ့တွင် မြန်မာနိုင်ငံ၌ ဖြစ်ပွားခဲ့သည့် စစ်အာဏာသိမ်းမှုကို လက်မခံသည့် ယောဒေသရှိ ပြည်သူလူထုအချို့သည် ရရှိနိုင်သမျှ လက်နက်များကို ကိုင်ဆောင်ကာ လက်နက်ကိုင် တော်လှန်ရေးတွင် ပါဝင်ခဲ့ကြသည်။

ထိုသို့ တော်လှန်ရေးလုပ်ငန်းများ ဆောင်ရွက်ရာတွင် နီးစပ်ရာ တိုင်းရင်းသား လက်နက်ကိုင်အဖွဲ့အစည်းများထံမှ စစ်ရေးသင်တန်းများ တက်ရောက်ခဲ့ကြသည့် ကျောင်းသားလူငယ်များက ဦးဆောင်၍ ဒေသအလိုက် ဒေသကာကွယ်ရေးအဖွဲ့များကို ထူထောင်ခဲ့ကြသည်။

၂၀၂၂ ခုနှစ် မတ်လတွင် ဒေသကာကွယ်ရေးအဖွဲ့များ စုပေါင်း၍ ယောဒေသပြည်သူ့ကာကွယ်ရေးတပ်ပေါင်းစု (Yaw Region People’s Army — YRPA) ကို ထူထောင်ခဲ့ကြသည်။ထိုတပ်ပေါင်းစုသည် ကရင်အမျိုးသားအစည်းအရုံး (KNU) နှင့် ချိတ်ဆက်၍ နိုင်ငံရေးပိုင်းနှင့် တပ်စုဖွဲ့စည်းရေးဆိုင်ရာ အကြံဉာဏ်များကို ရယူခဲ့ကြသည်။

၂၀၂၃ ခုနှစ် နှစ်ကုန်ပိုင်းတွင် တပ်ပေါင်းစုအား တော်လှန်ရေးအဖွဲ့အစည်းတစ်ခုအဖြစ် ဖွဲ့စည်းရန် ဆွေးနွေးကြပြီးနောက်၊၂၀၂၄ ခုနှစ် ဇန်နဝါရီလ ၂ ရက်နေ့တွင် ယောတပ်တော် အဖြစ် တည်ထောင်ဖွဲ့စည်းလိုက်ကြသည်။

ပါဝင်ဆင်နွဲခဲ့သည့် တိုက်ပွဲများနှင့်မဟာမိတ်များ

ယောတပ်တော်သည် ရခိုင်ပြည်၊ ချင်းပြည် နှင့် ယောဒေသတွင်းရှိ မြို့သိမ်းတိုက်ပွဲများတွင် ပါဝင်ဆင်နွှဲသည်။ ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA)၏ အနီးကပ် ထောက်ပံ့ကူညီမှုကို ရရှိခဲ့ပြီး၊ကချင်လွတ်လပ်ရေးအဖွဲ့/ကချင်လွတ်လပ်ရေး တပ်မတော် (KIO/KIA)သည် စစ်ရေးနိုင်ငံရေးအကြံဉာဏ်များနှင့် အခြားအကူအညီများအား ပေးအပ်သည်။

ထို့ပြင် မြိုင်မြို့နယ်ပြည်သူ့ကာကွယ်ရေးအဖွဲ့ (မြိုင် - ပကဖ) နှင့် မကွေးပြည်သူ့ကာကွယ်ရေးတပ်မတော် (Magway PDF)တို့နှင့် မဟာမိတ်ပြုထားသည်။

၂၀၂၅ ခုနှစ်၊နိုဝင်ဘာ ၂၁ ရက် တွင် ယောတပ်တော် သည် ဗမာပြည်သူ့လွတ်မြောက်ရေးတပ်တော် (BPLA) နှင့် Force for Federal Democracy (FFD) တပ်ဖွဲ့တို့အပါအဝင် တော်လှန်ရေးတပ် ၁၉ ဖွဲ့စုဖွဲ့ထားသည့် နွေဦးတော်လှန်ရေး မဟာမိတ်တပ်ပေါင်းစုသို့ ဝင်ရောက်ခဲ့သည်။

ထင်ရှားဖြစ်ရပ်

၂၀၂၅ ခုနှစ်၊ဖေဖော်ဝါရီ ၁၉ရက် တွင် မကွေးတိုင်းဒေသကြီးမြောက်ပိုင်း၊ ယောဒေသ၊ ဂန့်ဂေါခရိုင်ရှိ အမျိုးသားညီညွတ်ရေးအစိုးရလက်အောက်ခံ ဂန့်ဂေါခရိုင် အမှတ် (၁၂) PDF တပ်ရင်းမှ တပ်ရင်းမှူးအပါအဝင် ရဲဘော်အဆင့်အထိ ၉၀ ရာခိုင်နှုန်းခန့်သည် နုတ်ထွက်ခဲ့ကြပြီး ယောတပ်တော် နှင့်ပူးပေါင်းခဲ့ကြသည်။ဂန့်ဂေါခရိုင် အမှတ် (၁၂) သည် ၂၀၂၁ ခုနှစ် ဇူလိုင်အတွင်း ဂန့်ဂေါ မြို့နယ်အခြေစိုက် ပြည်သူ့ကာကွယ်ရေးတပ်ဖွဲ့ – ဂန့်ဂေါတပ်ရင်း (ယောဒေသ) PDF Gangaw Battalion (Yaw Region) အဖြစ် ဖွဲ့စည်းကာ လက်နက်ကိုင်တော်လှန်ခဲ့ကြပြီး၊၂၀၂၂ခုနှစ် ဧပြီလတွင် ဒေသကာကွယ်ရေးအဖွဲ့မှ NUG လက်အောက်ခံ အနောက်ပိုင်းတိုင်း တပ်မဟာ (၇)၊ အမှတ် (၇၀၁) တပ်ရင်း အဖြစ် ပြောင်းလဲခဲ့သည့် အဖွဲ့ဖြစ်သည်။

၂၀၂၂ ခုနှစ် နှစ်ကုန်ပိုင်းတွင် NUG ကာကွယ်ရေးဝန်ကြီးဌာန၏ စစ်တိုင်းအစီအစဉ်မှ စစ်ဒေသအစီအစဉ်သို့ ပြောင်းလဲ ပြင်ဆင်မှုကြောင့် အမှတ် (၁) စစ်ဒေသ၊ ဂန့်ဂေါခရိုင် အမှတ် (၁၂) တပ်ရင်းအဖြစ် ပြောင်းလဲသွားခဲ့သည့် တပ်ရင်းလည်း ဖြစ်သည်။

၂၀၂၅ ခုနှစ်၊မတ် ၃ရက်တွင် ယောတပ်တော် (YA)အဖွဲ့ထံ ယောပြည်သူ့ကာကွယ်ရေးတပ်ဖွဲ့ (YPDF) ပေါင်းစည်းလာခဲ့သည်။