မဲပလီစခန်းတိုက်ပွဲ

မဲပလီစခန်းတိုက်ပွဲ မြန်မာ့ပြည်တွင်းစစ် (၂၀၂၁-လက်ရှိ)၏ တစ်စိတ်တစ်ပိုင်း ရက်စွဲ ၁ ဇန်နဝါရီ ၂၀၂၅ - ၁ ဖေဖော်ဝါရီ ၂၀၂၅ နေရာ မဲပလီရွာ၊ ဘီးလင်းမြို့နယ် ရလဒ် တော်လှန်ရေးတပ်များ အနိုင်ရ စစ်ရင်ဆိုင်သူများ နိုင်ငံတော်စီမံအုပ်ချုပ်ရေးကောင်စီ ကရင်အမျိုးသားအစည်းအရုံး အမျိုးသားညီညွတ်ရေးအစိုးရ ဗမာပြည်သူ့လွတ်မြောက်ရေးတပ်တော် Force for Federal Democracy ပါဝင်သည့် တပ်ဖွဲ့များ တောင်ပိုင်းတိုင်းစစ်ဌာနချုပ် အမှတ် ၄၀၅ ခြေမြန်တပ်ရင်း ကရင်အမျိုးသား လွတ်မြောက်ရေး တပ်မတော်: KNLA တပ်မဟာ ၁ ပြည်သူ့ကာကွယ်ရေးတပ်မတော်: တောင်ပိုင်းတိုင်းစစ်ဒေသ အမှတ် ၂၇ စစ်ဗျူဟာ ဗမာပြည်သူ့လွတ်မြောက်ရေးတပ်တော် Force for Federal Democracy စစ်အင်အား ၁၀၀ ခန့် မသိရှိရ အသေအပျောက် ၄၀ ဦးသေဆုံး၊ ၅၂ ဦး ဖမ်းမိ ၂ ဦးသေဆုံး

မဲပလီစခန်းတိုက်ပွဲသည် ကရင်အမျိုးသား လွတ်မြောက်ရေး တပ်မတော် (KNLA)၊ ပြည်သူ့ကာကွယ်ရေးတပ်မတော် (PDF)၊ ဗမာပြည်သူ့လွတ်မြောက်ရေးတပ်တော် (BPLA) နှင့် ဖက်ဒရယ်ဒီမိုကရေစီ အင်အားစု (Force for Federal Democracy) အပါအဝင် ခုခံရေးပူးပေါင်းတပ်ဖွဲ့များက ဘီးလင်းမြို့နယ်၊ မဲပလီရွာရှိ မြန်မာ့တပ်မတော်၏ မဟာဗျူဟာမြောက်စခန်းကို တိုက်ခိုက်ခဲ့ခြင်းဖြစ်သည်။

နောက်ခံအခြေအနေ

မဲပလီမဟာဗျူဟာစခန်းတွင် တပ်စွဲထားသော အရာရှိနှင့် စစ်သည်အချို့သည် ဒေသခံအရပ်သားများကို အလွဲသုံးစားပြုမှုများတွင် ပါဝင်ခဲ့ကြောင်း သတင်းရရှိသည်။ ၂၀၂၄ ခုနှစ်၊ အောက်တိုဘာလ ၁၁ ရက်နေ့တွင် အမှတ် (၄၀၅) တပ်ရင်းမှူး (ဒုတိယဗိုလ်မှူးကြီး) အပါအဝင် ဗိုလ်ကြီးတစ်ဦး၊ တပ်ကြပ်ကြီးတစ်ဦးနှင့် တပ်သားတစ်ဦးတို့သည် မဲပလီကျေးရွာ၌ အရက်သေစာသောက်စားမူးယစ်ကာ ရွာသား ၈ ဦးကို အကြောင်းမဲ့ ပြင်းပြင်းထန်ထန် ရိုက်နှက်ပြီး ရွာဆေးရုံတွင် ပစ်ထားခဲ့သည်။ ရွာသားတစ်ဦးမှာ နောက်တစ်နေ့တွင် ဒဏ်ရာများဖြင့် သေဆုံးခဲ့သည်။ ဒုတိယဗိုလ်မှူးကြီးသည် အမျိုးသမီးနှစ်ဦးအား အဓမ္မပြုကျင့်မည်ဟုလည်း ခြိမ်းခြောက်ခဲ့သည်။

တိုက်ပွဲ

ဗမာပြည်သူ့လွတ်မြောက်ရေးတပ်တော် GoPro ဗီဒီယိုမှတ်တမ်း မဲပလီစခန်းတိုက်ပွဲ.

ဇန်နဝါရီလ ပထမပတ်မှစတင်၍ ခုခံရေးပူးပေါင်းတပ်ဖွဲ့များသည် မဲပလီမဟာဗျူဟာစခန်းကို ဝိုင်းရံပြီး မော်တာများနှင့် ခြေလျင်တပ်၏ ထိုးစစ်များဖြင့် တိုက်ခိုက်ခဲ့သည်။ ကျိုက်ထိုမြို့နယ်တွင် တပ်စွဲထားသော SAC တပ်ဖွဲ့များသည် လက်နက်ကြီးများ ပစ်ခတ်ခြင်းနှင့် လေကြောင်းတိုက်ခိုက်မှုများ ပြုလုပ်ခဲ့သော်လည်း တော်လှန်ရေးတပ်ဖွဲ့များကို မောင်းထုတ်ရန် မအောင်မြင်ခဲ့ပေ။ သို့သော် လက်နက်ကြီးများ အသုံးပြုမှုကြောင့် မဲပလီနှင့် အစူးချောင်းကျေးရွာအုပ်စုတို့မှ အရပ်သား ၃,၀၀၀ ခန့် နေရပ်စွန့်ခွာခဲ့ရသည်။ ဖေဖော်ဝါရီလ ၁ ရက်နေ့၊ နံနက် ၁၁ နာရီတွင် ပူးပေါင်းတပ်ဖွဲ့ဝင် အသီးသီးသည် စခန်းအတွင်းသို့ ထိုးစစ်စတင်ခဲ့သည်။ စခန်း၏ ပတ်ပတ်လည် ခြံစည်းရိုးကို ဖောက်ထွင်းဝင်ရောက်ပြီး တော်လှန်ရေးတပ်ဖွဲ့များသည် စခန်း၏ ကျင်းများအတွင်းသို့ အလျင်အမြန်ပြေးဝင်ကာ စစ်ကောင်စီတပ်သားများနှင့် အနီးကပ်တိုက်ပွဲများ ဆင်နွှဲခဲ့သည်။ တော်လှန်ရေးတပ်ဖွဲ့များသည် စခန်းနှင့် ကျင်းအားလုံးကို ထိန်းချုပ်လိုက်သည်နှင့် စခန်းပတ်ဝန်းကျင်ရှိ သစ်ပင်တန်းများအတွင်းသို့ ဆက်လက်ပစ်ခတ်ခဲ့ရာ ကျန်ရှိသောတပ်ဖွဲ့ဝင်များ လက်နက်ချပြီး ခုခံရေးအဖွဲ့များက ထိန်းသိမ်းခဲ့သည်။ တိုက်ပွဲအတွင်း စစ်ကောင်စီမှ ၄၀ ဦး သေဆုံးခဲ့သည်။ တိုက်ပွဲအပြီးတွင် စစ်သုံ့ပန်း ၂၉ ဦးကို ချက်ချင်း ဖမ်းဆီးရမိခဲ့သည်။

၂၀၂၅ ခုနှစ် ဖေဖော်ဝါရီ ၁ ရက်နေ့တွင် ကရင်အမျိုးသားကာကွယ်ရေးတပ်မတော် (KNDO) ဦးဆောင်သည့် တော်လှန်ရေးတပ်များက သိမ်းပိုက်ရရှိခဲ့သော ဘီးလင်းမြို့နယ်ရှိ မယ်ပရေခီး (မဲပလီ) စခန်းကို ပြန်လည်ရယူရန် စစ်ကောင်စီက ကြိုးပမ်းလျက်ရှိသည်။ မေ ၂၈ ရက်နေ့တွင် KNU-တပ်မဟာ (၁) တပ်မဟာမှူး ဗိုလ်မှူးချုပ် စောစိုးမြင့်ထွေး၏ ပြောကြားချက်အရ စစ်ကောင်စီသည် မယ်ပရေခီးစခန်းကို ပြန်တိုက်ရန်အတွက် နတ်ကြီးရွာနှင့် ဘီးလင်းမြို့နယ်တို့တွင် စစ်အင်အား ၄၀၀ ဝန်းကျင်အထိ ဖြည့်တင်းနေသည်ကို တွေ့ရသည်။ ထို့အပြင် KNU-ဒူးသထူခရိုင်၊ တပ်မဟာ (၁) နယ်မြေအတွင်းရှိ ဝင်းတာပန်နှင့် လေးကေစခန်းများကိုလည်း ပြန်လည်ထိန်းချုပ်နိုင်ရန် စစ်ကောင်စီက အင်အား ၂၀၀ ဝန်းကျင် ဖြည့်တင်းလျက်ရှိသည်။ ဧပြီ ၂၃ ရက်နေ့နောက်ဆုံးထား၍ ဆုတ်ခွာရန် KNDO တပ်ရင်း (၁) က ကြေညာခဲ့သော်လည်း စစ်ကောင်စီတပ်များ ဆုတ်ခွာခြင်းမရှိ၍ အဆိုပါဒေသများတွင် တိုက်ပွဲများ မကြာခဏ ဖြစ်ပွားလျက်ရှိသည်။

နောက်ဆက်တွဲနှင့် အရေးပါမှု

တော်လှန်ရေးတပ်ဖွဲ့များသည် မဲပလီမဟာဗျူဟာစခန်းကို သိမ်းပိုက်ပြီးနောက် ၁၂၂ မီလီမီတာ ဟောင်ဝစ်ဇာအမြောက်တစ်လက်၊ မော်တာအမျိုးမျိုး၊ ရိုင်ဖယ်များနှင့် ခဲယမ်းမီးကျောက်များကို သိမ်းဆည်းရမိခဲ့သည်။ ဖမ်းဆီးရမိသော စစ်သုံ့ပန်းများတွင် ရာထူးအဆင့်အမျိုးမျိုးရှိသော အရာရှိများ ပါဝင်ခဲ့သည်။ မဲပလီစခန်းတွင် တပ်စွဲထားသော စစ်သည်များနှင့် အရာရှိအချို့မှာ တိုက်ပွဲအတွင်း ထွက်ပြေးလွတ်မြောက်ခဲ့ပြီး ၎င်းတို့ထဲတွင် တပ်ရင်းမှူးတစ်ဦးလည်း ပါဝင်သည်။ ဖေဖော်ဝါရီလ ၉ ရက်နေ့တွင် ပြည်သူ့ကာကွယ်ရေးတပ်မတော် တောင်ပိုင်းတိုင်းစစ်ဌာနချုပ်မှ အရာရှိတစ်ဦးက တိုက်ပွဲမှ ထွက်ပြေးလာသော စစ်သည် ၂၅ ဦးကို ဖမ်းဆီးခဲ့ပြီး စစ်သုံ့ပန်းစုစုပေါင်း ၅၂ ဦးအထိ တိုးလာကြောင်း ပြောကြားခဲ့သည်။ အဆိုပါအောင်ပွဲသည် မြန်မာနိုင်ငံ၏ ၂၀၂၁ ခုနှစ် အာဏာသိမ်းမှု နှစ်ပတ်လည်နေ့နှင့် တိုက်ဆိုင်ခဲ့သည်။