ဘုန်းတောက်မယ့်မင်း
ဘုန်းတောက်မယ့်မင်း ကဗျာကို မောင်းထောင်းဦးကျော်လှ ရေးသားခဲ့သည်။ သံချို ကဗျာအမျိုးအစားဖြစ်သည်။
အကြောင်းအရာ[ပြင်ဆင်ရန်]
ဘုရားသိုက်၊ နိမိတ်၊ တဘောင် စသည်တို့ကို ကိုးကား၍ မြန်မာများချမ်းသာရန် ခေတ်တစ်နှစ်မျှလိုတော့သည့် အကြောင်းကို ဖွဲ့ဆိုထားသည့် နဂါးဂဠုန်သုတ်ကိန်းသံချို ဖြစ်သည်။
ဘုန်းတောက်မယ့်မင်း[ပြင်ဆင်ရန်]
စောသတ္တာ မြတ်ဘုရားနှင့်၊ သိကြားဂဝံပတေ့ငဲ့ပြင် ရသေ့ဈာန်ပျံဧ၊ ငမှန်ကန်ဆိုတဲ့သိုက်နှင့်၊ ကိန်းဆိုက်ပြီ မိန့်ဗျာဒိတ်၊ နိမိတ်တဘောင် စနည်းဘို့၊ ကမ္ဗည်းမှန် ဓာတ်နေတင့်ပါလို့၊ ကျိန်းဆင်သင့်ရောက်တော့ပြီ။
နဂါးဂဠုန်သုတ်တုန်လှုပ်ကာ၊ ဝသုန်မြေနှင့် သမုဒ္ဒရာ ရေဆူကာလောတော့ ဥရောဝါဂေါယာရပ်တွင်ဖြင့်၊ ရွတ်ရွပ်ကယ် ဂျပန်တို့၊ တတ္တရရှန် သေပျက်စီးရှာကြ၊ မြေကြိးသွေးရေပေါင်းတွေက၊ ဒီချောင်းကိုလျှံ၍သွားသည်ဟု၊ စကားအမှန်တဲ့၊ ကြားပြန်လျှင်ကြံ၍ ကြောက်မိငဲ့၊ နောက်ကျိကျိစိတ်မသတီ။
ဓာတ်လေးပြာဆရာတို့ထားခဲ့၊ နဂါးရေ နာဂပါယ္ခုလျှင်ဖြစ်ပါငဲ့၊ သူရဇ္ဇာတပုံပြင်လို့၊ ဂဠုန်မင်းအဟုန်နှင့် ဖြတ်ပါလိမ့်၊ လောကဓာတ်ဇမ္ဗုဒီ၊ တုအညီသစ်လင်း။
ချမ်းသာရန် မြန်မာခေတ်မှာ၊ ဘနှစ်ဆီကာခြားတော့၊ နဂါးဂဠုန်သုတ်၊ တုန်လှုပ်ကာ သမုဒ္ဒရာပတ်ပါလို့၊ ရွတ်ရှပ်ကယ် ဂျပန်တို့၊ တိုက်ကြပြန်ခိုက်ရန်အတွင်း၊ မယွင်းပေါင်သည်အမှု မည်သူ့မည်သို့ဖြစ်စေဟု၊ စိတ်မစ္ဆေ အပိုဝင်၍၊ ငြိုငြင်ကာ မေတ္တာမတုံးကြပါနှင့်၊ နောက်ဆုံးတွင် တို့ပြည်သားဘို့မှာ၊ ကြေသွားကာ ဘာသာပျောက်ပါလို့၊ ငါတို့သခင် မချိုပလ္လင်သို့ ရောက်ပါလိမ့်မယ်ကွယ်၊ ဘုန်းတောက်တဲ့မင်း။
ခက်ဆစ်[ပြင်ဆင်ရန်]
၁။ နဂါး = နဂါးတည်းဟူသော စနေနံ အင်္ဂလိပ်မင်း။
၂။ ဂဠုန် = နဂါးကိုနိုင်သည့် ဂဠုန်နံမင်း။
၃။ ဂေါယာရပ် = အနောက်အရပ်။
၄။ သတ္တရရန် = လက်နက်ဘေးရန်။
၅။ သုရဇ္ဇ = တနင်္ဂနွေဂြိုဟ်။
၆။ စိတ်မစ္ဆေ = ဝန်တိုသောစိတ်။
မှတ်ချက်[ပြင်ဆင်ရန်]
ဤကဗျာခေါင်းစဉ်သည် မောင်းထောင်းဦးကျော်လှ ကိုယ်တိုင် နာမည်ပေးခဲ့ခြင်း မဟုတ်ပါ။ သင့်တော်မည်ထင်သော နာမည်ကို ပေးထားခြင်း ဖြစ်သည်။
ကိုးကား[ပြင်ဆင်ရန်]
- ↑ မောင်းထောင်းဦးကျော်လှ၏ သံချိုကဗျာပေါင်းချုပ်။ ယဉ်ကျေးမှုဝန်ကြီးဌာန၊ ယဉ်ကျေးမှုဗိမာန်ဌာန။ နိုဝင်ဘာ ၁၉၈၃။