ဗိုလ်ပီတာ

ဗိုလ်ပီတာ (၁၉၃၄ - ၁၉၆၁) သည် မြန်မာနိုင်ငံ၏ ပထမဆုံး လေကြောင်းတိုက်ပွဲတွင် ပါဝင်ကာ အသက်စွန့်သွားသော လေသူရဲတဦး ဖြစ်သည်။

ငယ်ဘဝနှင့် ပညာရေး

၁၉၃၄ ခု၊ နိုဝင်ဘာလ ၂၆ ရက်တွင် ကျိုင်းတုံအထက ကျောင်းအုပ် ဂျီပီတာ (George Peter) နှင့် တောင်ကြီး စိန့်အန်နီမိန်းခလေးအထက်တန်းကျောင်းမှ အထက်တန်းပြ လီအိုနီပီတာတို့မှ တောင်ကြီး၌ မွေးသည်။ မောင်နှမ ၃ ယောက်အနက် အကြီးဆုံးဖြစ်၏။ မွေးချင်းများမှာ ညီ အာရ်အီးပီတာ (R E Peter)၊ ညီမ အေပီတာ (A Peter) တို့ ဖြစ်သည်။

တောင်ကြီး စိန့်အန်နီကျောင်းတွင် ပညာသင်သည်။

ဝမ်ပန်ဆန်း လေကြောင်းတိုက်ပွဲ

၁၉၆၁ ခု၊ ဖေဖေါ်ဝါရီလ ၁၅ ရက်တွင် အမှတ် ၅၀၁ လေတပ်စခန်းနှင့် အမှတ် ၁ တိုက်‌လေယာဉ်အုပ်မှူး ဗိုလ်မှူး တင်မောင်အေး၏ အမိန့်အရ တရုပ်ဖြူတို့အား လက်နက်ရိက္ခာထောက်ပံ့ရန်လာသော အမျိုးအမည်မသိလေယာဉ်ကို ဟန့်တားဖျက်ဆီးရန် ဗိုလ် မောင်သိန်း (လေ ၁၂၀၁)၊ ဗိုလ် ချစ်ခိုင် (လေ ၁၂၁၆)၊ ဒုတိယဗိုလ် ပီတာ (လေ ၁၂၉၂) တို့ ဆီးဖျူရီလေယာဉ် (Hawker Sea Fury) ကိုယ်စီဖြင့် ပျံတက်သည်။ လေထုတွင် အတန်ကြာနေသည်နောက် ဗုံးကျဲလေယာဉ်တစီး (B24 Liberator) ကို တွေ့ရ၍ အုပ်ဖွဲ့တိုက်ခိုက်ရာ ပီတာ၏ လေယာဉ် ပစ်ချခံရပြီး ချစ်ခိုင်၏လေယာဉ် အမြီးပိုင်း ထိခိုက်သည်။ မောင်သိန်းက တရုပ်ဖြူလေယာဉ်ကို အပြီးသတ်ပစ်ချနိုင်ခဲ့၏။