ဗမာအမျိုးသားတော်လှန်ရေးတပ်မတော်

ဗမာအမျိုးသားတော်လှန်ရေးတပ်မတော်် Burma National Revolution Army
အလံတော်
ခေါင်းဆောင်	ဗိုလ်နဂါး
စတင်လှုပ်ရှားခြင်း	ဇန်နဝါရီ ၁၊ ၂၀၂၂ (၂၀၂၂-၀၁-၀၁)
ဖျက်သိမ်းခြင်း	ဖေဖော်ဝါရီ ၁၈၊ ၂၀၂၆ (၂၀၂၆-၀၂-၁၈)
ပေါင်းစည်းခဲ့မှု	ဗမာအမျိုးသားတော်လှန်ရေးတပ်မတော်
နိုင်ငံ	မြန်မာနိုင်ငံ
သစ္စာခံ	မြန်မာ
အုပ်စု(များ)	မြန်မာ့တော်ဝင်နဂါးတပ်တော်(ရန်ကုန်)
လှုပ်ရှားနယ်မြေ	ပုလဲမြို့နယ်၊ စစ်ကိုင်းတိုင်းဒေသကြီး
မဟာမိတ်	မြန်မာ့အမျိုးသားကာကွယ်ရေးတပ်မတော်
ပြိုင်ဘက်များ	မြန်မာ (SAC) တပ်မတော် အမျိုးသားညီညွတ်ရေးအစိုးရ
စစ်ပွဲနှင့် တိုက်ပွဲများ	မြန်မာ့ပြည်တွင်းပဋိပက္ခများ ပြည်သူ့ခုခံတော်လှန်စစ်

ဗမာအမျိုးသားတော်လှန်ရေးတပ်မတော် (အင်္ဂလိပ်: Burma National Revolution Army, အတိုကောက် BNRA) သည် စစ်ကိုင်းတိုင်းဒေသကြီး၊ ပုလဲမြို့နယ်တွင် အခြေစိုက်သော လက်နက်ကိုင် တော်လှန်ရေးအဖွဲ့အစည်းတစ်ခု ဖြစ်သည်။ ဗိုလ်နဂါးက ဦးဆောင်ခဲ့သည်။ ဇန်နဝါရီလ ၁ ရက်နေ့၊ ၂၀၂၂ ခုနှစ်တွင် မြန်မာ့တော်ဝင်နဂါးတပ်တော် အမည်ဖြင့် စတင်တည်ထောင်ခဲ့သည်။

အမည်ပြောင်းလဲခြင်း

၂၀၂၃ ခုနှစ် စက်တင်ဘာလ ၉ ရက်နေ့တွင် မြန်မာ့တော်ဝင်နဂါးတပ်တော် အပါအဝင် အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန လက်အောက်ခံမဟုတ်သော ဒေသအခြေစိုက်ပြည်သူ့ကာကွယ်ရေးအဖွဲ့များကို ပူးပေါင်းကာ ဗမာအမျိုးသားတော်လှန်ရေးတပ်မတော် (Burma National Revolution Army) အဖြစ် ဖွဲ့စည်းကြောင်း ထုတ်ပြန်ခဲ့သည်။

သမိုင်းကြောင်း

၂၀၂၂ ခုနှစ်၊ ဖေဖော်ဝါရီလတွင် မြန်မာ့တော်ဝင်နဂါးတပ်တော် အခြားတော်လှန်ရေးအုပ်စုများနှင့်ပူးပေါင်းကာ ဇီးဖြူကုန်းရွာနှင် အင်မထီးရွာအနီးရှိ စခန်းနှစ်ခုကို တိုက်ခိုက်ခဲ့သည်။ စစ်ကောင်စိစစ်သားနှင့် ပျူစောထီး ၄၀ ဝန်းကျင် သေဆုံးခဲ့သည်ဟု မြန်မာ့တော်ဝင်နဂါးတပ်တော်က ထုတ်ပြန်ခဲ့သည်။

၂၀၂၂ ခုနှစ်၊ ဧပြီလအကုန်တွင် တပ်မတော်နှင့် ပျူစောထီးများ၏ ရှေ့ပြေးစခန်းအနည်းငယ်ကို တိုက်ခိုက်ခဲ့သည်။ မြန်မာ့တော်ဝင်နဂါးတပ်တော်သည် ရွာများအား ဝင်ရောက်စီးနင်းခြင်း၊ ရွာသားများ၏ နေအိမ်များကို မီးရှို့ဖျက်ဆီးနေသော စစ်ကောင်စီတပ်သားများကိုလည်း အလစ်အငိုက် ဝင်ရောက်တိုက်ခိုက်ခဲ့သေးသည်။

လက်နက်ချခြင်း

၂၀၂၆ ခုနှစ်၊ ဇန်နဝါရီ ၉ ရက်တွင် အမျိုးသားညီညွတ်ရေးအစိုးရ လက်အောက်ခံ ကာကွယ်ရေးဝန်ကြီးဌာနနှင့် ယင်းမာပင်ခရိုင် ကွပ်ကဲရေးတပ်များသည် စစ်ကိုင်းတိုင်း၊ ပုလဲမြို့နယ်အတွင်းရှိ ဗမာအမျိုးသားတော်လှန်ရေးတပ်မတော် (BNRA) ၏ တပ်စခန်းနှစ်ခုကို တရားမဝင်ဂိတ်များ ဖွင့်လှစ်ထားသည်ဟု စွပ်စွဲကာ ဝင်ရောက်စီးနင်းခဲ့ကြသည်။ ယင်းဖြစ်ရပ်၏ နောက်ဆက်တွဲအနေဖြင့် နှစ်ဖက်တပ်ဖွဲ့များအကြား တင်းမာမှုများ ဖြစ်ပွားခဲ့သည်။

၂၀၂၆ ခုနှစ်၊ ဖေဖော်ဝါရီ ၁၇ ရက် နံနက် ၇ နာရီခွဲအချိန်တွင် စစ်ကိုင်းတိုင်း၊ ပုလဲမြို့နယ်အခြေစိုက် BNRA တပ်ကို အမျိုးသားညီညွတ်ရေးအစိုးရ လက်အောက်ခံ တပ်ဖွဲ့များက ဝိုင်းဝန်းပိတ်ဆို့ တိုက်ခိုက်ခဲ့ကြသည်။ ယင်းဖြစ်ရပ်နှင့် ပတ်သက်၍ NUG ဝန်ကြီးချုပ်ရုံး ပြောရေးဆိုခွင့်ရှိသူ နေဘုန်းလတ် က BNRA မှ ကျူးလွန်ခဲ့သည်ဟု ဆိုသော ရာဇဝတ်မှုများအပါအဝင် အမှုအခင်းများကို ဖမ်းဆီးထိန်းသိမ်း စစ်ဆေးနိုင်ရေးအတွက် အမျိုးသားညီညွတ်ရေးအစိုးရ၊ ပြည်ထဲရေးဝန်ကြီးဌာနနှင့် ကာကွယ်ရေးဝန်ကြီးဌာနတို့ ပူးပေါင်းဆောင်ရွက်နေကြောင်း မီဒီယာများအားဖြေကြားခဲ့သည်။

ထို့နောက် ၂၀၂၆ ခုနှစ်၊ ဖေဖော်ဝါရီ ၁၈ ရက် ညနေ ၄ နာရီ ၅၀ မိနစ်တွင် BNRA ခေါင်းဆောင်တစ်ဦးဖြစ်သည့် ဗိုလ်နဂါးသည် မိသားစုဝင်များနှင့်အတူ လက်နက်များကို ကိုင်ဆောင်ကာ စစ်ကိုင်းတိုင်း၊ ပုလဲမြို့နယ်အတွင်းရှိ တပ်မတော်တပ်စခန်းတစ်ခုသို့ လက်နက်ချခဲ့သည်။