ရှင်သုမန

ရှင်သုမန (၁၁၉၅ − ၁၂၇၆) သည် မင်းတုန်းမင်းလက်ထက်တော်အခါက ထင်ရှားခဲ့သည့် ကျမ်းပြုဆရာတော် ဖြစ်သည်။ ဆရာတော်သည် ခင်ကြီးဖျော်၏ မြေးဖြစ်သည်။

ဘဝ

ဆရာတော်ကို သက္ကရာဇ် ၁၁၉၅ ခုနှစ်၊ သီတင်းကျွတ်လဆန်း ၇ ရက်နေ့တွင် တောင်တွင်းကြီးမြို့နယ်၊ မြို့လုလင်ရွာတွင် ဖွားမြင်ခဲ့သည်။ မိဘနှစ်ပါးမှာ ဦးကုလားနှင့် ဒေါ်ရွက်တို့ ဖြစ်သည်။

ငယ်စဉ်အခါက တောင်တွင်းကြီး အရှေ့မြောက် ဒန့်ဒလွန်ပင်ရွာ မင်္ဂလာရာမလေသာတိုက်တွင် ရဟန်းပြုခဲ့သည်။ ထို့နောက် မန္တလေးမြို့၊ အမရပူရမြို့များတွင် စာပေများ သင်ကြားခဲ့ပြီး မန္တလေးမြို့ စံကျောင်းတွင် ခေတ္တသီတင်းသုံးကာ တောင်တွင်းကြီးမြို့သို့ ပြန်၍ သီတင်းသုံးတော်မူခဲ့သည်။

မင်းတုန်းမင်းကြီးသည် ဆရာတော်အား ဓမ္မစရိယဂိုဏ်းထောက်ဆရာတော်အဖြစ် ပူဇော်ချီးမြှောက်ခဲ့သည်။

ပျံလွန်တော်မူခြင်း

ဆရာတော်သည် ၁၂၇၆ ခုနှစ်တွင် ပျံလွန်တော်မူခဲ့သည်။

ကျမ်းဂန်ပြုစုတော်မူခြင်း

ဆရာတော်သည် ကျမ်းပေါင်း ၃၀ ကျော် ပြုစုတော်မူခဲ့သည်။ ထိုကျမ်းများထဲတွင် ကင်းဝန်မင်းကြီး၏ ပုစ္ဆာဆယ်ချက်ကို ဖြေဆိုတော်မူသည့် “ပုစ္ဆာဝိသဇ္ဇနာဒီပနီ” သည် ထင်ရှားသည်။