နန်းမတော်မယ်နု

ဝီကီပီးဒီးယား မှ
ဤနေရာသို့သွားရန် - အ​ညွှန်း​, ရှာ​ဖွေ​ရန်​
နန်းမတော် မယ်နု
Nanmadaw Mae Nu.jpg
မိဖုရားခေါင်
နန်းသက် ၅ ဇွန် ၁၈၁၉ – ၁၅ ဧပြီ ၁၈၃၇
မွေးဖွား (1783-06-18)၁၈ ဇွန်၊ ၁၇၈၃
ဖလံဂုဏ်ရွာ
ကွယ်လွန် ၁၂ မေ၊ ၁၈၄၀(1840-05-12) (အသက် ၅၆)
အမရပူရ
အိမ်ထောင်ဖက် ဘကြီးတော်
သားသမီးများ Prince of Palaing
Princess Supayagale
အမည် အပြည့်အစုံ
သီရိပဝရ မဟာရာဇိန္ဒာ ရတနာဒေဝီ
စံအိမ် ကုန်းဘောင်
ခမည်းတော် Prince Thiha Kyawswa of Shwedaung
ကိုးကွယ်မှု ထေရဝါဒ ဗုဒ္ဓဘာသာ

မယ်နုဟု လူသိများသည့် ဘကြီးတော်(စစ်ကိုင်းမင်း) ၏မိဖုရားခေါင်ကြီးသည် မြတောင်မြို့စား စုဖုရား (သီပေါမင်း၏ မိဖုရား စုဖုရားလတ်)၏အဘွားပင် ဖြစ်ပါသည်။

ငယ်ဘဝ[ပြင်​ဆင်​ရန်​]

နန်းမတော်မယ်နု သည် ၁၁၄၆ ခုနှစ် ဝါဆိုလပြည့်ကျော် ၅ ရက်နေ့ တွင် ထောင်သင်းမှုး ဦးလှုပ်၊ဇနီး ဒေါ်ငယ် တို့မှ မွေးသော ဖလံဂုဏ်ရွာ သူ ဖြစ်သည်။အပျိုဖြန်းအရွယ် မယ်နုမြစ်ဆိပ်၌ရေချိုးစဉ် ကမ်းပေါ်တွင်ချန်ရစ်သည့် ထမီကို ငှက်ကချီယူပြီး ဘုရင့်နန်းတော် မှန်ကင်းတွင်ထားရာမှ ထင်ရှားလာပြီးနောက်တွင် ဘုရင့်မိဖုရားအဖြစ်ကောက်ယူခံခြင်းဖြစ်သည်ဟု ဆိုကြပါသည်။ မိဘုရားခေါင်ကြီးကွယ်လွန်ပြီးနောက်တွင် မယ်နု၏ဩဇာမှာ နန်းတွင်းတွင်ပင် ဘုရင့်ကိုကျော်လွန်ကာ ကြီးထွားလာပြီး မောင်တော်စပ်သူ ဦးအိုအား မင်းဆွေမင်းမျိုးအဆောင်အယောင်ဖြင့် မင်းသားတစ်ပါးကဲ့သို့ ချီးမြှောက်စေသည်။ ဘကြီးတော်ဘုရား၏ ညီတော် သာယာဝတီမင်းသားမှ ပုန်ကန်ရာအောင်မြင်ခဲ့ပြီး နောင်တော်ဖြစ်သူ ဘကြီးတော်ဘုရားနှင့် နန်းမတော်မယ်နုတို့နှစ်ဦးအား အကျယ်ချုပ်ဖြင့်နေစေသော်လည်း မကြာမီ စိတ်မချသဖြင့် မယ်နုနှင့် အပေါင်းအပါများအား ကွပ်မျက်ခဲ့သည်။

ဘဝနိဂုံး[ပြင်​ဆင်​ရန်​]

သံတော်ဆင့် ငရွှေသားကို တောင်ဥယျာဉ်တော် အတွင်း ရှေ့တော်တွင် စစ်မေးကာလ နောင်တော်မင်းတရား မိဖုရားကြီးက မောင်တော်သူ “စလင်းမင်းသားကြီးမောင်အိုနှင့် အကျဉ်းခံနေရသူ မှူးတော် မတ်ဟောင်းတို့ကို တိတ်တဆိတ် တိုင်ပင် စည်းကြပ်ရကြောင်း စည်းကြပ်ရာတွင် ပါဝင်သူ မှူးဟောင်း မတ်ဟောင်းတို့ကလည်း မင်းဧရာဇ် ရန်ကင်းတောင်သို့ ထွက်တော်မူသည့် အတွင်း ညဉ့်အခါ အမရပူရ ရွှေနန်းတော်သို့ ဝင်၍ တိုက်ခိုက် စီးနင်းမည့် သူပုန်တို့နှင့် စကားချိန်းချက်၍ လာစေကြောင်းများကို အစစ်ခံချက် ရသည်ဖြစ်၍ နောင်တော် မင်းတရား မိဖုရားကြီးကိုလည်း တောင် ဥယျာဉ်တော် အတွင်း သံတော်ဆင့် ငရွှေသားနှင့် တိုက်ဆိုင် စစ်မေးရာ ဖြောင့်ဆို စစ်မေးချက်ရ၍ မိဖုရားကြီးကိုလည်း ထုံးစံနှင့်အညီ ၁၂ဝ၂ ကဆုန်လဆန်း ၁၂ ရက်နေ့ (၁၂ မေ ၁၈၄ဝ) ရေတွင် ဖျောက်တော်မူ၏။[၁] ရေတွင်ဖျောက်ဖျက်သည်ဟုဆိုသည်ကို ကြည့်ခြင်းအားဖြင့် မင်းမျိုးနွယ်အဖြစ် လက်ခံကြောင်းထင်ရှားပါသည်။ နန်းတက်ဘွဲ့အမည်အားဖြင့် သီရိပဝရ မဟာရာဇိန္ဒာ ရတနာဒေဝီ[၂] ဖြစ်ကာ မိဖုရားကြီးရဲ့သမီးတော်မှာ နောင်မင်းတုန်းမင်းလက်ထက်တွင် ဆင်ဖြူမရှင်မိဖုရားဟု ထင်ရှားလာမည့် သီရိပဝရတိလာက မဟာရတနာဒေဝီ (ကုန်းဘောင်ဆက်၊ ဒုတိယတွဲ၊ ၁၉၆၇၊ ၄၈၄) ဖြစ်ပါတယ်။ မင်းတုန်းမင်းက ၂၆ မတ် ၁၈၅၃မှာ အလယ်နန်းတော်မိဖုရား အဖြစ် ဆင်ဖြူမရှင်အား တင်မြှောက်ခဲ့ရာမှ ကုန်းဘောင်ခေတ်ဇာတ်သိမ်းကို ဖော်ဆောင်သူများအနက် တစ်ဦးဖြစ်သည့် ဆင်ဖြူမရှင်သည် မိဖုရားအရာသို့ရောက်ခဲ့သည်။ [၃] [၄]

ကိုးကား[ပြင်​ဆင်​ရန်​]

  1. (ကုန်းဘောင်ဆက်၊ ဒုတိယတွဲ၊ ၁၉၆၇၊ ၅၉၈။)
  2. (ကုန်းဘောင်ဆက်၊ ဒုတိယတွဲ၊ ၁၉၆၇၊ ၂၃ဝ)
  3. (ကုန်းဘောင်ဆက်၊ တတိယတွဲ၊ ၁၉၆၈၊ ၁၅ဝ)။
  4. သန်းထွန်း M.A., B.L., Ph.D., D,Lit., (London)' ရဲ့ 'မြန်မာ ထွေထွေရာရာ သမိုင်း စာအုပ်' မှ