ဒီပဲယင်းမြို့သိမ်းတိုက်ပွဲ

ဒီပဲယင်းမြို့သိမ်းတိုက်ပွဲ
မြန်မာ့ပြည်တွင်းစစ် (၂၀၂၁–လက်ရှိ)နှင့် အညာ စစ်မြေပြင်၏ တစ်စိတ်တစ်ပိုင်း
ဒီပဲယင်းမြို့ class=notpageimage| မြန်မာနိုင်ငံမြေပုံပေါ်ရှိ ဒီပဲယင်းမြို့ တည်နေရာ
ရက်စွဲ ၁၅ ဩဂုတ် – ၁၈ ဩဂုတ် ၂၀၂၄ နေရာ ဒီပဲယင်းမြို့၊ စစ်ကိုင်းတိုင်းဒေသကြီး 22.6483°N 95.2281°E / 22.6483; 95.2281 ရလဒ် တော်လှန်ရေးအင်အားစုများက မြို့ကို ခေတ္တထိန်းချုပ်နိုင်ခဲ့သော်လည်း စစ်ကောင်စီ၏ လေကြောင်းမှ အင်အားဖြည့်တင်းမှုကြောင့် ပြန်လည်ဆုတ်ခွာခဲ့ရသည်။
စစ်ရင်ဆိုင်သူများ
တပ်မတော် တပ်မတော်(လေ)	NUG / PDF အမှတ် (၁) စစ်ဒေသ ရွှေဘိုခရိုင် တပ်ရင်းများ ဒီပဲယင်းမြို့နယ် ပကဖ ဘုတလင်မြို့နယ် ပကဖ 96-Soldiers PDF (အညာတပ်ခွဲ)
တပ်မှူးများနှင့် ခေါင်းဆောင်များ
တပ်မတော် တပ်မတော်(လေ)	စုပေါင်းခေါင်းဆောင်မှု
စစ်အင်အား
အင်အား ၂၀၀ ကျော် (စစ်ကူအပါအဝင်)	ပူးပေါင်းအင်အားစုများ
အသေအပျောက်
၂၀ ဦးခန့် သေဆုံး (ဗိုလ်ကြီးတစ်ဦး အပါအဝင်) ၁၂၃ ဦး လက်နက်ချ/ဖမ်းဆီးခံရ	၃ ဦး သေဆုံး
စစ်ကိုင်းတိုင်းဒေသကြီးအောက်ပိုင်းတွင် ပထမဆုံးသိမ်းပိုက်နိုင်ခဲ့သည့် မြို့ဖြစ်ပြီး ၂၄ နာရီမပြည့်မီ ပြန်လည်စွန့်လွှတ်ခဲ့ရသည်။

ဒီပဲယင်းမြို့သိမ်းတိုက်ပွဲ သည် ၂၀၂၄ ခုနှစ်၊ ဩဂုတ်လ ၁၅ ရက်မှ ဩဂုတ်လ ၁၈ ရက်နေ့အထိ ဖြစ်ပွားခဲ့သော တိုက်ပွဲဖြစ်သည်။ မုံရွာမြို့ရှိ အနောက်မြောက်တိုင်းစစ်ဌာနချုပ် (နမခ) နှင့် မိုင် ၄၀ ကျော်သာ ကွာဝေးသော ဒီပဲယင်းမြို့ကို တော်လှန်ရေးအင်အားစုများက အင်အားအလုံးအရင်းဖြင့် ထိုးစစ်ဆင် တိုက်ခိုက်ခဲ့ခြင်းဖြစ်သည်။ ဤတိုက်ပွဲသည် စစ်ကိုင်းတိုင်းအောက်ပိုင်းတွင် တော်လှန်ရေးအင်အားစုများ ပထမဆုံး သိမ်းပိုက်နိုင်ခဲ့သည့် မြို့သိမ်းတိုက်ပွဲအဖြစ် မှတ်တမ်းဝင်ခဲ့သည်။

တိုက်ပွဲဖြစ်စဉ်

တော်လှန်ရေးပူးပေါင်းအဖွဲ့များသည် ၂၀၂၄ ခုနှစ် ဩဂုတ်လ ၁၅ ရက် ညနေပိုင်းမှစတင်ကာ ဒီပဲယင်းမြို့ရှိ မြို့နယ်အုပ်ချုပ်ရေးရုံး၊ ရဲစခန်းနှင့် အထက်တန်းကျောင်း အပါအဝင် စစ်ကောင်စီတပ်စွဲထားသည့် နေရာများကို စတင်တိုက်ခိုက်ခဲ့သည်။ သုံးရက်ကြာ တိုက်ပွဲဖြစ်ပွားပြီးနောက် ဩဂုတ်လ ၁၈ ရက် နံနက်ပိုင်းတွင် မြို့တစ်မြို့လုံးကို တော်လှန်ရေးတပ်များက ထိန်းချုပ်နိုင်ခဲ့သည်။

တိုက်ပွဲအတွင်း မြို့နယ်ရဲစခန်းရှိ အချုပ်ခန်းမှ နိုင်ငံရေးအကျဉ်းသား ၂၀ ခန့်ကိုလည်း ဘေးကင်းစွာ ကယ်ထုတ်နိုင်ခဲ့သည်။ သို့သော်လည်း မြို့ကို ထိန်းချုပ်ပြီး နာရီပိုင်းအကြာတွင်ပင် စစ်ကောင်စီက မုံရွာ နမခ နှင့် မန္တလေး (၇၀၄) တပ်ရင်းတို့မှ စစ်ကူအင်အား ၂၀၀ နီးပါးကို ရဟတ်ယာဉ်များဖြင့် ပို့ဆောင်ခဲ့သည်။ စစ်ကောင်စီသည် Mi-35 တိုက်ခိုက်ရေးရဟတ်ယာဉ်များ၊ ဂျက်ဖိုက်တာများဖြင့် တစ်နေကုန် ဗုံးကြဲတိုက်ခိုက်ခဲ့သဖြင့် တော်လှန်ရေးတပ်များသည် မြို့တွင်းမှ ပြန်လည်ဆုတ်ခွာပေးခဲ့ရသည်။

ထိခိုက်ကျဆုံးမှုနှင့် ဖမ်းဆီးရမိမှုများ

စစ်ကိုင်းတိုင်း ပြည်သူ့ကာကွယ်ရေးအဖွဲ့၏ ထုတ်ပြန်ချက်အရ စစ်ကောင်စီဘက်မှ ၂၀ ဦးခန့် သေဆုံးခဲ့ပြီး ယင်းအထဲတွင် ဗိုလ်ကြီးတစ်ဦး ပါဝင်သည်။ တော်လှန်ရေးအင်အားစုဘက်မှ ၃ ဦး ကျဆုံးခဲ့သည်။တိုက်ပွဲအတွင်း စစ်ကောင်စီတပ်ဖွဲ့ဝင် ၁၂၃ ဦး (လက်နက်ချ)၊ပြည်သူ့စစ် (ပျူစောထီး) ၂ ဦး၊Non-CDM ဝန်ထမ်း ၄၁ ဦး နှင့် ဝန်ထမ်းမိသားစုဝင် ၈၀ ဦး တို့ လက်နက်ချ အညံခံခြင်းတို့ ရှိခဲ့ကြသည်။

ဖမ်းဆီးရမိထားသည့် သုံ့ပန်းများနှင့် မိသားစုဝင်များအား ဂျနီဗာကွန်ဗင်းရှင်း (Geneva Conventions) နှင့်အညီ ကောင်းမွန်စွာ ထိန်းသိမ်းခဲ့ပြီး လိုအပ်သည့် ဆေးဝါးကုသမှုများ ပေးထားကြောင်း တော်လှန်ရေးအဖွဲ့များက ဆောင်ရွက်ပေးခဲ့ကြသည်။

နောက်ဆက်တွဲ

စစ်ကောင်စီတပ်များသည် မြို့ကို ပြန်လည်ထိန်းချုပ်ပြီးနောက် မြသိန်းတန်ကျောင်း၊ ကုန်းသာဦးကျောင်း၊ ဝန်ထမ်းအိမ်ရာနှင့် စာရင်းစစ်ရုံးတို့တွင် ဖြန့်ခွဲနေရာယူထားသည်။ ဤတိုက်ပွဲသည် မြို့ကြီးများကို သိမ်းပိုက်နိုင်သော်လည်း စစ်ကောင်စီ၏ လေကြောင်းအသာစီးရမှုကြောင့် မြို့ကို ရေရှည်ထိန်းထားနိုင်ရန် ခက်ခဲနေသေးသည့် အခြေအနေကို မီးမောင်းထိုးပြခဲ့သည်။

ဆက်စပ်ကြည့်ရန်

• ဒီပဲယင်းအရေးအခင်း
• ဒီပဲယင်း အစုအပြုံလိုက် သတ်ဖြတ်မှု