ဆိုင်ပေါင်းနပ်

ဆိုင်ပေါင်းနပ်
Tax Sai Pao Nap
ဝ အမျိုးသားပါတီ ဥက္ကဋ္ဌ
တာဝန်သက်တမ်း ၂ ဧပြီ ၂၀၂၀ – ၁၀ ဩဂုတ် ၂၀၂၁
အမျိုးသားလွှတ်တော် ကိုယ်စားလှယ်
တာဝန်သက်တမ်း ၃၁ ဇန်နဝါရီ ၂၀၁၁ – ၂၈ ဇန်နဝါရီ ၂၀၁၆
ယခင်လူ	ပထမအကြိမ် အမျိုးသားလွှတ်တော်
ဆက်ခံသူ	ဦးစိုင်းစံအောင် (USDP) (၂၀၁၅ ရွေးကောက်ပွဲ)
မဲဆန္ဒနယ်	ရှမ်းပြည်နယ် (မဲဆန္ဒနယ်အမှတ် ၁၂)
အနိုင်ရမဲ အရေအတွက်	မဲ ၂၃,၅၄၂ (၉၃.၂၅ရာခိုင်နှုန်း)
ဝ ဒီမိုကရက်တစ်ပါတီ အထွေထွေအတွင်းရေးမှူး
တာဝန်သက်တမ်း ၂ ဇွန် ၂၀၁၀ – ၂ ဧပြီ ၂၀၂၀
ကိုယ်ရေး အချက်အလက်များ
မွေးဖွား	(1951-12-20)ဒီဇင်ဘာ ၂၀၊ ၁၉၅၁ မိုင်းမောမြို့၊ ရှမ်းပြည်နယ်
ကွယ်လွန်	မတ် ၂၄၊ ၂၀၂၆(2026-03-24) (အသက် ၇၄) လားရှိုးမြို့၊ ရှမ်းပြည်နယ်
နိုင်ငံရေးပါတီ	ဝ အမျိုးသားပါတီ(၂၀၂၀-၂၀၂၁)
အခြား နိုင်ငံရေးလွှမ်းမိုးမှု	ဝ ဒီမိုကရက်တစ်ပါတီ (၂၀၁၀-၂၀၂၀)
ကြင်ဖော်	ဒေါ်အစ်ဆိုက်
မိဘ	ဦးညီနပ် (ခေါ်) ဦးတလမ်နပ် (ဖခင်) ဒေါ်ယေနန်း (မိခင်)
ပညာရေး	B.A., H.G.P, DIL, DIR, DBL
အလုပ်အကိုင်	ရှေ့နေ၊ နိုင်ငံရေးသမား
ကိုးကွယ်သည့်ဘာသာ	ခရစ်ယာန်ဘာသာ

ဦးဆိုင်ပေါင်းနပ် (၂၀ ဒီဇင်ဘာ ၁၉၅၁ – ၂၄ မတ် ၂၀၂၆) သည် မြန်မာနိုင်ငံသား ဝ နိုင်ငံရေးသမားနှင့် ရှေ့နေတစ်ဦး ဖြစ်သည်။ ၎င်းသည် ဝ အမျိုးသားပါတီ ၏ ဥက္ကဋ္ဌအဖြစ် တာဝန်ထမ်းဆောင်ခဲ့သူဖြစ်ပြီး၊ ၂၀၁၁ ခုနှစ် မှ ၂၀၁၆ ခုနှစ်အထိ ရှမ်းပြည်နယ်၊ မဲဆန္ဒနယ်အမှတ် (၁၂) အမျိုးသားလွှတ်တော် ကိုယ်စားလှယ်အဖြစ် ရွေးကောက်ခံခဲ့ရသူ ဖြစ်သည်။ လွှတ်တော်သက်တမ်းအတွင်း အမျိုးသားလွှတ်တော် ဥပဒေကြမ်းကော်မတီ အဖွဲ့ဝင် နှင့် အမျိုးသားလွှတ်တော် တိုင်းရင်းသားရေးရာကော်မတီ၏ ဥက္ကဋ္ဌအဖြစ် ပါဝင်ဆောင်ရွက်ခဲ့သည်။

ငယ်ဘဝနှင့် ပညာရေး

ဦးဆိုင်ပေါင်းနပ်ကို ၁၉၅၁ ခုနှစ်၊ ဒီဇင်ဘာလ ၂၀ ရက်နေ့တွင် ရှမ်းပြည်နယ် (မြောက်ပိုင်း)၊ ဝ ကိုယ်ပိုင်အုပ်ချုပ်ခွင့်ရတိုင်း၊ မိုင်းမောမြို့၌ အဖ ဦးညီနပ် (ခေါ်) ဦးတလမ်နပ် နှင့် အမိ ဒေါ်ယေနန်းတို့မှ မွေးဖွားခဲ့သည်။ ၎င်းသည် မွေးချင်းမောင်နှမများအနက် အကြီးဆုံး ဖြစ်သည်။ ၁၉၆၂ ခုနှစ်တွင် မူလတန်းပညာကို စတင်သင်ကြားခဲ့ပြီး ၁၉၈၃ ခုနှစ်တွင် ဝိဇ္ဇာဘွဲ့ (B.A.) ရရှိခဲ့သည်။ ထို့နောက် ရန်ကုန်တက္ကသိုလ်တွင် ဥပဒေပညာရပ်များ ဆက်လက်ဆည်းပူးခဲ့ကာ H.G.P (အထက်တန်းရှေ့နေ)၊ DIL (နိုင်ငံတကာဥပဒေဒီပလိုမာ)၊ DIR (နိုင်ငံတကာဆက်ဆံရေးဒီပလိုမာ) နှင့် DBL (စီးပွားရေးဥပဒေဒီပလိုမာ) ဘွဲ့များကို ရရှိခဲ့သည်။

နိုင်ငံရေးနှင့် လွှတ်တော်လုပ်ငန်းများ

၎င်းသည် ၁၉၇၂ ခုနှစ်မှစ၍ မြန်မာ့ဆိုရှယ်လစ်လမ်းစဉ်ပါတီတွင် ပါဝင်ခဲ့ပြီး ၁၉၇၄ ဖွဲ့စည်းပုံအခြေခံဥပဒေ မူကြမ်းရေးဆွဲရာတွင် ပါဝင်ခဲ့သည်။ ၁၉၉၃ ခုနှစ်မှ ၂၀၀၇ ခုနှစ်အထိ အမျိုးသားညီလာခံတွင် တိုင်းရင်းသားကိုယ်စားလှယ်ခေါင်းဆောင်အဖြစ် တာဝန်ယူခဲ့ပြီး ၂၀ဝ၈ ဖွဲ့စည်းပုံအခြေခံဥပဒေ မူကြမ်းရေးဆွဲရေးကော်မရှင်တွင်လည်း အဖွဲ့ဝင်အဖြစ် ပါဝင်ခဲ့သည်။

၂၀၁၀ ပြည့်နှစ် အထွေထွေရွေးကောက်ပွဲတွင် အမျိုးသားလွှတ်တော် ကိုယ်စားလှယ်အဖြစ် ရွေးချယ်ခံရပြီးနောက် အမျိုးသားလွှတ်တော် တိုင်းရင်းသားရေးရာကော်မတီ ဥက္ကဋ္ဌ၊ ဥပဒေကြမ်းကော်မတီဝင်နှင့် ပြည်ထောင်စုမြန်မာနိုင်ငံ ပြည်တွင်းငြိမ်းချမ်းရေးဖော်ဆောင်ရေး ကော်မတီဝင်အဖြစ် တာဝန်ယူခဲ့သည်။ ၎င်းသည် ပန်ဆန်း၊ မိုင်းလားနှင့် ကျိုင်းတုံမြို့များတွင် ကျင်းပသော ငြိမ်းချမ်းရေးဆွေးနွေးပွဲများသို့ တက်ရောက်ခဲ့သည်။

၂၀၁၅ ခုနှစ်တွင် ကျင်းပသည့် အထွေထွေရွေးကောက်ပွဲ တွင် ရှမ်းပြည်နယ်၊ မဲဆန္ဒနယ်အမှတ် (၁၂) အမျိုးသားလွှတ်တော် ကိုယ်စားလှယ်အဖြစ် ထပ်မံဝင်ရောက်ယှဉ်ပြိုင်ရာ ပြိုင်ဘက် ကြံ့ခိုင်ဖွံ့ဖြိုးရေးပါတီကိုယ်စားပြုကိုယ်စားလှယ် ဦးစိုင်းစံအောင် ကို ရှုံးနိမ့်ခဲ့သည်။

၂၀၂၀ ပြည့်နှစ် ကျင်းပသည့် အထွေထွေရွေးကောက်ပွဲ တွင် ရှမ်းပြည်နယ်၊ မဲဆန္ဒနယ်အမှတ် (၁၁) အမျိုးသားလွှတ်တော် ကိုယ်စားလှယ်အဖြစ် ထပ်မံဝင်ရောက်ယှဉ်ပြိုင်ရာ ပြိုင်ဘက် ကြံ့ခိုင်ဖွံ့ဖြိုးရေးပါတီကိုယ်စားပြုကိုယ်စားလှယ် ဦးအိုက်နပ် ကို ရှုံးနိမ့်ခဲ့သည်။

ဝေဖန်ခံရမှုနှင့် နုတ်ထွက်ခြင်း

အထွေထွေရွေးကောက်ပွဲ ၂၀၂၀ မတိုင်မီ ၂၀၂၀ ပြည့်နှစ် ဧပြီ ၂ ရက်နေ့ တွင် ဝ အမျိုးသား စည်းလုံးညီညွတ်ရေးပါတီ၊ ဝ ဒီမိုကရက်တစ်ပါတီ နှင့် ဝလစ်ဘရယ် ဒီမိုကရက်တစ်တိုးတက်ဖွံ့ဖြိုးရေးပါတီတို့ ပူးပေါင်း၍ ဝ အမျိုးသားပါတီ ကို စုစည်းတည်ထောင်ခဲ့ကြသည်။ ၎င်းသည် ပါတီ၏ ဥက္ကဋ္ဌ အဖြစ် တင်မြှောက်ခံခဲ့ရသည်။

၂၀၂၁ ခုနှစ် ဩဂုတ်လတွင် စစ်ကောင်စီအား ထောက်ခံသည့် နိုင်ငံရေးပါတီ ၂၈ ခု၏ ပူးတွဲထုတ်ပြန်ချက်တွင် ပါတီဗဟိုကော်မတီ၏ သဘောထားမပါဘဲ လက်မှတ်ရေးထိုးခဲ့မှုကြောင့် ဝလူငယ်များနှင့် လူထု၏ ကန့်ကွက်မှုကို ခံခဲ့ရသည်။ ထိုဖြစ်ရပ်ကြောင့် ၂၀၂၁ ခုနှစ်၊ ဩဂုတ်လ ၁၀ ရက်နေ့တွင် ဝ အမျိုးသားပါတီ ဥက္ကဋ္ဌအဖြစ်မှ နုတ်ထွက်ခဲ့ရသည်။

ဘဝနိဂုံး

၎င်းသည် ဇနီးဖြစ်သူ ဒေါ်အစ်ဆိုက်နှင့်အတူ သားသမီး ၈ ဦး၊ မြေး ၁၃ ဦး ထွန်းကားခဲ့သည်။ ၂၀၂၆ ခုနှစ်၊ မတ်လ ၂၄ ရက်နေ့တွင် လားရှိုးမြို့ရှိ နေအိမ်၌ အသက် ၇၇ နှစ်အရွယ်တွင် ကွယ်လွန်ခဲ့ပြီး မတ်လ ၂၇ ရက်နေ့တွင် လားရှိုးမြို့ ကြာကန်နှစ်ခြင်းခရစ်ယာန်သင်္ချိုင်း၌ ဂူသွင်းသင်္ဂြိုဟ်ခဲ့သည်။