ငှက်ဝါ

ဝီကီပီးဒီးယား မှ
အ​ညွှန်း​သို့ ခုန်ကူးရန် ရှာဖွေရန် ခုန်ကူးမည်

ငှက်ဝါကို ငှက်နနွင်းဝါဟူ၍၎င်း၊ ငှက်ရွှေဝါဟူ၍၎င်း ခေါ်သေးသည်။ ပါဏဗေဒအမည်မှာ 'အော်ရီအိုလပ် တင်နျူ ရော့စတြစ် အင်ဗီဆပ်' ဖြစ်သည်။ အလျား ၁ဝ ၁/၂ လက်မ ခန့်ရှိသည်။ တကိုယ်လုံးတွင် ရွှေဝါရောင် လွှမ်းနေသည်။ ငှက်မ၏ အမွှေးအတောင်များ၌ အစိမ်းရောင်ရှိသည်။ ငှက်ငယ် သည် ငှက်မများနှင့် များစွာ တူသည်။ သို့ရာတွင် ငှက်ငယ်၏ လည်ပင်းတွင် အမည်းရစ် မရှိချေ။

ငှက်ဝါသည် ခြောက်သွေ့သော တောင်ခြေရှိ တောထဲ၌၎င်း၊ တောင်ကုန်းပေါ်၌၎င်း တစ်ကောင်တည်းဖြစ်စေ၊ ဖိုမတွဲ၍ ဖြစ်စေနေတတ်သည်။ တောထဲတွင် အလေ့ကျပေါက်သော သဖန်းပင်များမှ သဖန်းသီးများကို စားသည်။ အဆင်းလှ သလောက် သာယာစွာလည်း မြည်ကြွေးတတ်သည်။ တစ်ခါ တစ်ရံ စူးရှစွာ အော်တတ်သည်။

ငှက်ဝါသည် မေလနှင့် ဇွန်လတို့တွင် သားပေါက်သည်။ အသိုက်မှာ ခွက်သဏ္ဌာန်ဖြစ်၍ မြင့်သောသစ်ကိုင်းများတွင် တွဲလျားကျလျက်ရှိသည်။ လေတိုက်သော်လည်း ရုတ်တရက် ပြုတ်မကျချေ။ အောက်မှနေ၍ ကြည့်သောအခါ မြက်ကို လုံးထွေးထားသကဲ့သို့ ထင်ရသည်။ တစ်မြုံလျှင် ၂ ဥမှ ၄ ဥအထိ ရှိသည်။ ဥအရောင်မှာ ပန်းရောင်အောက်ခံပေါ်တွင် အညိုပြောက်များ ရှိသည်။

ငှက်ဝါကို အရှေ့တိုင်းနိုင်ငံများတွင် အနှံ့အပြား တွေ့ရ သည်။ မြန်မာနိုင်ငံ၌ အရှေ့မြောက်ဘက် ဒေသများမှလွဲလျှင် အခြားနေရာများတွင် အမြင့်ပေ ၅ဝဝဝ အထိ နေထိုင်သည်။ မေမြို့နှင့် အပူပိုင်းဒေသများတွင် ငှက်ဝါကို အများအပြား တွေ့မြင်နိုင်သည်။[၁]

ကိုးကား[ပြင်ဆင်ရန်]

  1. မြန်မာ့စွယ်စုံကျမ်း၊ အတွဲ(၃)