ခင်ခင်နု

ဝီကီပီးဒီးယား မှ
(ခင်ခင်နု၊ (ရုပ်ရှင်သရုပ်ဆောင်) မှ ပြန်ညွှန်းထားသည်)
Jump to navigation Jump to search
ရုပ်ရှင်မင်းသမီး ခင်ခင်နု

ခင်ခင်နု[ပြင်ဆင်ရန်]

ခင်ခင်နုသည် မြန်မာရုပ်ရှင် ပေါ်ပေါက်စကပင် ရုပ်ရှင်နယ်ထဲသို့ ဝင်လာသော နာမည်ကျော် ဇာတ်လိုက်မင်းသမီး တစ်ဦး ဖြစ်သည်။ မြန်မာနိုင်ငံ၌ ရုပ်ရှင်လုပ်ငန်းကို စတင်တည်ထောင်သူမှာ လန်ဒန်အတ် ဦးအုန်းမောင် ဖြစ်သည်။ ဦးအုန်းမောင်သည် ခရစ် ၁၉၁၉ ခုနှစ်တွင် မေတ္တာနှင့်သူရာ ဇာတ်ကားကို ဦးစွာပထမ ရိုက်ကူးခဲ့သည်။ ထိုဇာတ် ကား၌ ဦးညီပုမှာ ဇာတ်လိုက် မင်းသားဖြစ်၍ မရီဆိုသူမှာ ဇာတ်လိုက်မင်းသမီးအဖြစ် ပါဝင်လေသည်။


ဦးအုန်းမောင်သည် မေတ္တာ နှင့် သူရာဇာတ်ကားကို ရိုက်ကူးအောင်မြင်ပြီးနောက် ကျေးတောသူမနုဇာတ်ကားကို ရိုက်ကူးရန် ခင်ခင်နုကို ဇာတ်လိုက်မင်းသမီးအဖြစ် ရွေးချယ်လိုက်သည်။ ခင်ခင်နုမှာ ရန်ကုန်မြို့ ကြည့်မြင်တိုင် စမ်းချောင်း ရှင်စောပု လမ်းတွင် မြန်မာ ၁၂၅၃ ခုနှစ်၌ ဖွားမြင်လေသည်။ ခင်ခင်နု၏ နာမည်ရင်းမှာ မငွေမြိုင် ဖြစ်သည်။ ကျေးတောသူ မနု ဇာတ်ကားကို အကြောင်းပြု၍ ခင်ခင်နု တွင်လေသည်။ မငွေမြိုင်သည် မျက်ခုံးမျက်လုံးကောင်း၍ နှာတံပေါ်သည်။ အသားမှာ မဖြူမညိုဖြစ်သည်။ ကိုယ်လုံး ကိုယ်ထည် ပြေပြစ်သည်။ မငွေမြိုင်သည် ငယ်စဉ်ကပင် အကဝါသနာပါသည်။ အပျိုအရွယ်တွင် အရပ်ယိမ်း များ၌ ပါဝင်ကပြရာ လူအများပင် နှစ်ခြိုက်ကြသည်။ မငွေမြိုင်သည် အကကောင်းရုံမက ဇာတ်မူ ဇာတ်ဟန်လည်း အလွန်ပါလေသည်။ ထိုးထွင်းဉာဏ်နှင့် ပြည့်စုံ သူတစ်ဦးဖြစ်သည့်အလျောက် ဆရာသင်ကြားပြသမျှကို အလွယ် တကူနှင့် နည်းယူ အတုခိုးတတ်သည်။ သီချင်းဆိုရာ၌လည်း မညံ့ခဲ့ချေ။ ထိုကဲ့သို့ ထူးချွန်သော အရည်အချင်းများကြောင့် မငွေမြိုင်သည် နောင်အခါတွင် နာမည်ကျော် ဇာတ်လိုက် မင်းသမီးတစ်ဦး ဖြစ်လာပေသည်။


လန်ဒန်အတ်ဦးအုန်းမောင်သည် ရုပ်ရှင်ထဲ၌ ခင်ခင်နု (မငွေမြိုင်)၏ ဇာတ်ကွက်ဇာတ်လက် နိုင်နင်းပုံကို အကဲခတ် မိရကား ခင်ခင်နုနှင့်ပင် ရုပ်ရှင်များ ဆက်လက်ရိုက်ကူး လေ သည်။ စိန်ခြူးကြာညောင်၊ ရတနာပုံ၊ ဗိုလ်ဝ၊ သားဗိုလ်ဝ၊ သမီးဗိုလ်ဝ၊ တပြည်သူ၊ မြနန္ဒာ၊ မေဓာဝီ၊ စိန်တလေး အစရှိသော ဇာတ်ကားပေါင်း ၃ဝ ကျော်တွင် ခင်ခင်နုသည် ဇာတ်လိုက်မင်းသမီးအဖြစ် ပါဝင်ခဲ့လေသည်။ အပိုင်း ၄၉ ပိုင်းရှိ၍ အသံတိတ်ကားများတွင် အရှည်ဆုံးဖြစ်သော ရတနာပုံဇာတ်ကားတွင် ဇာတ်လမ်းအတိုင်း သရုပ်ပေါ်စေရန် မန္တလေးမြို့သို့ သွားရောက်ကာ ကြာမြင့်စွာ အချိန်ယူ၍ ရိုက်ကူးရလေသည်။ ရတနာပုံဇာတ်ကားကို လန်ဒန်အတ်ရုပ်ရှင်ကုမ္ပဏီ တည်ထောင်ပြီးစတွင် ရိုက်ကူးရာ လူကြိုက်အလွန်များသည်။ ထိုဇာတ်ကားအပြီးတွင် ဇာတ်လိုက် မင်းသမီး ခင်ခင်နု၊ ဇာတ်လိုက်မင်းသားမောင်ဘတင့်၊ ဒါရိုက်တာ ဦးတုတ်ကြီးတို့မှာ အမည်ကျော်ကြားလာခဲ့သည်။


ခင်ခင်နုသည် လန်ဒန်အတ်ရုပ်ရှင်ကုမ္ပဏီမှာ ၉ နှစ်ခန့် ဝင်ရောက်လုပ်ကိုင်ပြီးနောက် နေသူရိန်ဇာတ်ကားကို ရိုက်မည့် ဆဲဆဲတွင် ထိုကုမ္ပဏီမှ ထွက်ခဲ့လေသည်။ ထိုအချိန်၌ ခင်ခင်နု သည် ဇာတ်လိုက်မင်းသား မောင်ဘတင့်နှင့် အိမ်ထောင်ကျပြီး ဖြစ်လေသည်။ ခင်ခင်နုနှင့် မောင်ဘတင့်တို့သည် ခင်ခင်နု ကုမ္ပဏီတစ်ခုကိုလည်း တည်ထောင်ခဲ့သေးသည်။ သို့သော် ထိုကုမ္ပဏီမှာ ကြာရှည်စွာ မခံချေ။ နောက်ပိုင်း ဘတင့်နှင့် အိမ်ထောင်ကွဲခဲ့သည်။ အသက်အရွယ်ကြီးရင့်လာသောအခါ ခင်ခင်နုသည် ရုပ်ရှင်လုပ်ငန်းမှ အနားယူလေသည်။ ၁၉၄၉ ခုနှစ်တွင် ခင်ခင်နု ကွယ်လွန်အနိစ္စ ရောက်သည်။[၁]

ကိုးကား[ပြင်ဆင်ရန်]

  1. မြန်မာ့စွယ်စုံကျမ်း၊ အတွဲ(၂)