ကြွယ်ကြွယ်

ဒေါ်ကြွယ်ကြွယ်
အမည်ရင်း	မကြွယ်ကြွယ်
မွေးဖွား	(1933-04-18)၁၈ ဧပြီ၊ ၁၉၃၃ ဝမ်းဘဲအင်းရွာ၊ ပဲခူးမြို့နယ်၊ ပဲခူးတိုင်းဒေသကြီး
ကွယ်လွန်	၂၁ နိုဝင်ဘာ၊ ၂၀၂၃(2023-11-21) (အသက် ၉၀) ရန်ကုန်၊ မြန်မာနိုင်ငံ
အလုပ်အကိုင်	စာရေးဆရာမ၊ သတင်းစာဆရာမ
ဘာသာစကား	မြန်မာဘာသာ
နိုင်ငံသား	မြန်မာ
ရရှိသည့်ဆုများ	ပခုက္ကူ ဦးအုန်းဖေ စာပေဆု (တစ်သက်တာဆု, ၂၀၁၉)

ဒေါ်ကြွယ်ကြွယ် (၁၈ ဧပြီ ၁၉၃၂ - ၁၉ နိုဝင်ဘာ ၂၀၂၃) သည် ပခုက္ကူဦးအုံးဖေ တစ်သက်စာ စာပေဆုရှင်၊ ကန်တော့ခံသက်ကြီးစာပေပညာရှင် ဖြစ်သည်။တစ်သက်တာလုံး စာပေကဏ္ဍနှင့် သတင်းစာအလုပ်များတွင် ပါဝင်ခဲ့သူလည်း ဖြစ်သည်။ကလောင် အမည် မှာ မကြွယ်ကြွယ် ဖြစ်သည်။

မွေးဖွားမှုနှင့် ပညာရေး

၁၉၃၃ ခုနှစ်၊ ဧပြီ ၁၈ ရက် တွင် ပဲခူးမြို့နယ် ၊ ဝမ်းဘဲအင်းရွာ၌ ဖခင် ဦးဘိုးချစ် (ကျောင်းအုပ်) နှင့် မိခင် ဒေါ်စိန်မေ တို့မှ မွေးဖွားခဲ့သည်။မွေးချင်းခုနစ်ဦး ရှိသည့်အနက် ခြောက်ဦးမြောက် ဖြစ်သည်။

ပဲခူးမြို့၊ အစိုးရအထက်တန်းကျောင်းတွင် ၁၀ တန်းအထိ သင်ကြားခဲ့သည်။

နိုင်ငံဝန်ထမ်းဘဝ

ဆယ်တန်းအောင်မြင်ပြီးသည့်နောက်တွင် ပညာရေးဝန်ထမ်း ကျောင်းဆရာမ အဖြစ် ဘဝကို စတင်ခဲ့သည်။နောင်တွင် မြန်မာ့ဆိုရှယ်လစ်လမ်းစဉ်ပါတီ ဌာနချုပ် တွင် သတင်းထောက်၊ အယ်ဒီတာအဖွဲ့ဝင် အဖြစ် တာဝန်ထမ်းဆောင်ခဲ့သည်။

စာပေဘဝ

၁၉၅၀ ခုနှစ်၊ မတ် ၁၄ ရက် တွင် လင်းယုန်ဂျာနယ် တွင် ဖော်ပြခံရသည့် “မောင်းသံ” ဝတ္ထုတို ဖြင့် စာပေလောက သို့ စတင်ရောက်ရှိလာခဲ့သည်။စာရေးသူအမည် ကို နာမည်ရင်း ကြွယ်ကြွယ် ဖြင့်သာ အသုံးပြုခဲ့သည်။

ထိုစဉ် ခေတ်ပြိုင် အနေဖြင့် စာပေလောက က မဟုတ်သည့် တေးဂီတလောက မှ မန္တလေး၊ဈေးချိုသူ ကြွယ်ကြွယ် ဆိုသည့် တေးသံရှင် တစ်ဦး ပေါ်ပေါက်လာခဲ့သည်။အဆိုပါ တေးသံရှင် သည် တေးဂီတလောက တွင် အထူးအောင်မြင်နေချိန်လည်းဖြစ်၍ စာရေးဆရာမ ကြွယ်ကြွယ် သည် ၁၉၇၁ ခုနှစ်၊မတ်လအတွင်း ထုတ်ဝေသည့် ဗိုလ်တထောင်သတင်းစာ မှစကာ မူလ ကြွယ်ကြွယ် အစား ရှေ့တွင် မ တစ်လုံးအပို ထည့်၍ ကလောင်အမည် ကို မကြွယ်ကြွယ် ဟု ပြောင်းလဲခဲ့သည်။

သူသည် သတင်းစာနှင့် မဂ္ဂဇင်းများတွင် ဆောင်းပါး ၁၅၀၀ ခန့်၊ ဝတ္ထုတို ၆၀၀ ကျော်၊ ဝတ္ထုရှည် ၃၀ ကျော်နှင့် ကဗျာ ၂၀၀ ခန့် ရေးသား ဖော်ပြခဲ့သည့် မှတ်တမ်းရှိခဲ့သည်။

ထို့အပြင် လုံးချင်းဝတ္ထုရှည် ၆ အုပ်၊ ကဗျာစာအုပ်များ၊ ဘာသာရေး၊ ဘုရားသမိုင်းနှင့် ထေရုပ္ပတ္တိစာအုပ်များ တိုက်ရိုက်ရေးသားခဲ့သည်။

ဆုရရှိမှု

၂၀၁၉ ခုနှစ် အတွက် ပခုက္ကူဦးအုန်းဖေ စာပေဆု (တစ်သက်တာဆု)ကို ၂၀၂၁ ခုနှစ် တွင် ချီးမြှင့်ခံရသည်။

ပုဂ္ဂိုလ်ရေးဘဝ

၁၉၅၈ ခုနှစ် တွင် စာရေးဆရာ သက်မောင် (ဦးမောင်မောင်လတ်) နှင့် အိမ်ထောင်ပြုသည်။သား ၂ ဦး၊သမီး ၁ ဦး ထွန်းကားခဲ့သည်။

ဘဝနိဂုံး

အသက်(၉၁)နှစ်အရွယ် ၂၀၂၃-ခုနှစ်၊ နိုဝင်ဘာလ (၁၉)ရက် ညနေ ၆ နာရီ ၁၅ မိနစ် တွင် ရန်ကုန်မြို့ ၌ ကွယ်လွန်သည်။