ကျော်ကျော်စိုး

ဗိုလ်မှူးချုပ်(ငြိမ်း)၊ ဦး ကျော်ကျော်စိုး
တတိယအကြိမ် ရန်ကုန်တိုင်းဒေသကြီးလွှတ်တော် ဒုတိယဥက္ကဋ္ဌ
တာဝန်ထမ်းဆောင်ဆဲ
တာဝန် စတင် ၂၀ မတ် ၂၀၂၆
ရန်ကုန်တိုင်းဒေသကြီးလွှတ်တော် ကိုယ်စားလှယ်
တာဝန်ထမ်းဆောင်ဆဲ
တာဝန် စတင် ၂၀ မတ် ၂၀၂၆
ယခင်လူ	ဦးမြင့်သွင် (NLD) (၂၀၁၅ ရွေးကောက်ပွဲ)
မဲဆန္ဒနယ်	မြောက်ဥက္ကလာပ အမှတ်(၂)
အနိုင်ရမဲ အရေအတွက်	အချိုးကျကိုယ်စားပြုစနစ်ဖြင့်
ရန်ကုန်တိုင်းဒေသကြီးအစိုးရအဖွဲ့ လမ်းပန်းဆက်သွယ်ရေးဝန်ကြီး
တာဝန်ထမ်းဆောင်ဆဲ
တာဝန် စတင် ၁၀ ဖေဖော်ဝါရီ ၂၀၂၄
ယခင်လူ	ရဲမှူးချုပ် မျိုးမင်းထိုက် (ရန်ကုန်တိုင်းရဲတပ်ဖွဲ့မှူး-ပူးတွဲတာဝန်)
အမျိုးသားလွှတ်တော် တပ်မတော်သား ကိုယ်စားလှယ်
တာဝန်သက်တမ်း ၃၀ ဒီဇင်ဘာ ၂၀၂၀ – ၁ ဖေဖော်ဝါရီ ၂၀၂၁
တာဝန်သက်တမ်း ၁၈ ဇန်နဝါရီ ၂၀၁၆ – ၃၀ ဒီဇင်ဘာ ၂၀၂၀
တာဝန်သက်တမ်း ၂၃ ဩဂုတ် ၂၀၁၅ – ၁၈ ဇန်နဝါရီ ၂၀၁၆
ယခင်လူ	ဗိုလ်မှူးချုပ် အောင်ကျော် (ကြည်း-၁၉၇၁၇)
ဆက်ခံသူ	တာဝန်ပြီးဆုံး
ကိုယ်ရေး အချက်အလက်များ
မွေးဖွား	(1962-08-04) ၄ ဩဂုတ်၊ ၁၉၆၂ စကုမြို့၊ မကွေးတိုင်း
နိုင်ငံသား	မြန်မာ
နိုင်ငံရေးပါတီ	ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ
ပညာရေး	ဝိဇ္ဇာဘွဲ့(စိတ်ပညာ)
အလုပ်အကိုင်	စစ်မှုထမ်း
ဆုတံဆိပ်များ	စစ်မှုထမ်း သင်္ဂဟတံဆိပ် အမျိုးသားစာပေဆု (၂၀၂၄)
စစ်မှုထမ်းခြင်း
သစ္စာခံနိုင်ငံ	မြန်မာ
တပ်/တပ်ဖွဲ့ခွဲ	တပ်မတော် (ကြည်း)
အမှုထမ်းကာလ	၁၉၈၁ - ၂၀၂၃
ရာထူး	ဗိုလ်မှူးချုပ်
တပ်	ကာကွယ်ရေးဦးစီးချုပ်ရုံး (ကြည်း)

ဦးကျော်ကျော်စိုး (၄ ဩဂုတ် ၁၉၆၂ မွေးဖွား)သည် အငြိမ်းစား ဗိုလ်မှူးချုပ်တစ်ဦးဖြစ်ပြီး၊ လက်ရှိ တတိယအကြိမ် ရန်ကုန်တိုင်းဒေသကြီးလွှတ်တော် ၏ ဒုတိယဥက္ကဋ္ဌ ဖြစ်သည်။

သူသည် တပ်မတော်သား အမျိုးသားလွှတ်တော်ကိုယ်စားလှယ် အဖြစ် လွှတ်တော်သက်တမ်း ၂ ကြိမ်အထိ ဆက်တိုက်တာဝန်ထမ်းဆောင်ခဲ့ပြီး ၂၀၂၄ ခုနှစ် နောက်ပိုင်းတွင် ရန်ကုန်တိုင်းဒေသကြီးအစိုးရအဖွဲ့ လမ်းပန်းဆက်သွယ်ရေးဝန်ကြီးဖြစ်ခဲ့သည် ။ဦးကျော်ကျော်စိုးသည် တပ်မတော်တွင် ဒုစစ်တိုင်းမှူး ၊တပ်မမှူး အစရှိသည့် တာဝန်များ ထမ်းဆောင်ခဲ့သူလည်း ဖြစ်သည်။

ငယ်ဘဝနှင့် ပညာရေး

မကွေးတိုင်းဒေသကြီး၊ စကုမြို့တွင် မွေးဖွားခဲ့သည်။ ချင်း၊ရခိုင်၊ ယောနယ်စပ် ငဖဲမြို့တွင် ကြီးပြင်းခဲ့သည်။ ငယ်စဉ်ဘဝအား ပညာရေးတစ်ဖက်တစ်လမ်းဖြင့်၊ မိဘများနှင့်အတူ တောင်ယာလုပ်ငန်း၊မုဆိုး၊တံငါလုပ်ငန်းများလုပ်ကိုင်ခြင်းဖြင့် ဖြတ်သန်းခဲ့သည်။

၁၉၈၀ပြည့်နှစ် တွင် ဆယ်တန်းအောင်မြင်ခဲ့သည်။တပ်မတော်သို့ ဝင်ကာ၊ ယင်းနောက် တပ်မတော်(ကြည်း)၊ O.T.S အမှတ်စဉ် (၁၀)သို့ တက်ရောက်ခဲ့သည်။

တပ်မတော်တွင် တာဝန်ထမ်းဆောင်ရင်း စိတ်ပညာအထူးပြုဖြင့် ဝိဇ္ဇာဘွဲ့ ကို အဝေးသင်ဖြင့် ရရှိခဲ့သည်။

သူသည် နိုင်ငံတော်ကာကွယ်ရေးတက္ကသိုလ်ကျောင်းဆင်း တစ်ဦးဖြစ်ပြီး၊ ထိုမှ မဟာဝိဇ္ဇာဘွဲ့(ကာကွယ်ရေးပညာ)ကို ရရှိထားသူလည်း ဖြစ်သည်။

စစ်မှုထမ်းခြင်း

သူသည် ၁၉၈၀ပြည့်နှစ်၊ဆယ်တန်းအောင်ပြီးကတည်းက တပ်မတော်ထဲ ဝင်ရောက်ပြီး၊ကြည်း - ၁၈၁၃၅ ဖြင့် စစ်မှုထမ်းခဲ့သူဖြစ်သည်။

သူသည် နှစ် ၃၀ကြာ စစ်မှုထမ်းပြီးနောက် ၂၀၁၀ပြည့်နှစ်၊အောက်တိုဘာ၉ရက်တွင် အမှတ်(၄၄)ခြေမြန်တပ်မဌာနချုပ် ၏ တပ်မမှူး ဖြစ်လာသည်။ထိုတာဝန်ကို ၂၀၁၁ခုနှစ် မေလ ၆ ရက်နေ့အထိ ထမ်းဆောင်ခဲ့သည်။ထို့နောက် ရခိုင်ပြည်နယ်၊ဘူးသီးတောင်အခြေစိုက် အမှတ်(၁၅)စစ်ဆင်ရေးကွပ်ကဲမှုဌာနချုပ် ၏ တပ်မမှူး၊ယင်းမှတဆင့် လားရှိုးမြို့အခြေစိုက် အရှေ့မြောက်တိုင်းစစ်ဌာနချုပ်၊ဒုတိယတိုင်းမှူး တာဝန်များထမ်းဆောင်ခဲ့သည်။

တပ်မတော်သား လွှတ်တော်ကိုယ်စားလှယ်ဘဝ

ဗိုလ်မှူးချုပ်ကျော်ကျော်စိုးသည် ၂၀၁၅ ခုနှစ်၊ဩဂုတ် ၂၃ ရက် တွင် တပ်မတော်သားအမျိုးသားလွှတ်တော်ကိုယ်စားလှယ်အဖြစ် ဗိုလ်မှူးချုပ် အောင်ကျော် နေရာသို့ အစားထိုးခန့်အပ်ခြင်းဖြင့် ကြေညာခံရသည်။

သူသည် အရှေ့မြောက်တိုင်းစစ်ဌာနချုပ် ၏ ဒုတိယတိုင်းမှူး အဖြစ်မှ တပ်မတော်သားအမျိုးသားလွှတ်တော်ကိုယ်စားလှယ်အဖြစ်သို့ ပြောင်းရွှေ့ခြင်းဖြင့် လွှတ်တော်နိုင်ငံရေးဘဝကို စတင်ခဲ့ခြင်းဖြစ်သည်။

ဗိုလ်မှူးချုပ်အဆင့် (၅)ဦးထက်မနည်းဝန်းကျင်သာရှိသည့် တပ်မတော်သားအမျိုးသားလွှတ်တော်ကိုယ်စားလှယ်တစ်ဦးအနေဖြင့် အမျိုးသားလွှတ်တော်၊ဥပဒေကြမ်းကော်မတီ၊တိုင်းရင်းသားရေးရာကော်မတီနှင့်ပြည်သူ့ငွေစာရင်းစိစစ်ရေးကော်မတီ တို့တွင် ပါဝင်ခဲ့သည်။

ထို့နောက် ဒုတိယအကြိမ်မြောက် အမျိုးသားလွှတ်တော်သက်တမ်းတွင် ဆက်၍တာဝန် ထမ်းဆောင်ခဲ့သည့်အပြင်၊၂၀၂၀ပြည့်နှစ် ဒီဇင်ဘာ ၃၀ တွင်လည်း တတိယအကြိမ်မြောက် အမျိုးသားလွှတ်တော်သက်တမ်းအတွက် တပ်မတော်သား အမျိုးသားလွှတ်တော်ကိုယ်စားလှယ်တစ်ဦးအဖြစ် ပြည်ထောင်စုရွေးကောက်ပွဲကော်မရှင် ဥက္ကဋ္ဌ ဦးလှသိန်းက ကြေညာခဲ့သည်။

သို့သော်လည်း ၂၀၂၀ ပြည့်နှစ်၊ အထွေထွေရွေးကောက်ပွဲ မဲရလဒ်များ ဖျက်သိမ်းခံခဲ့ရ၍ ၎င်း၏ တပ်မတော်သား လွှတ်တော်ကိုယ်စားလှယ်တာဝန်သည် မထမ်းဆောင်လိုက်ရဘဲ အဆုံးသတ်သွားခဲ့သည်။ သူသည် စစ်ဘက်ဆိုင်ရာတာဝန်များကိုမူ ဆက်လက်ထမ်းဆောင်ရသည်။၂၀၂၃ ခုနှစ်၊ ရခိုင်ပြည်နယ်သို့ မိုခါမုန်တိုင်းဝင်ရောက်ခံရပြီးနောက် ပြန်လည်ထူထောင်ရေးလုပ်ငန်းများဆောင်ရွက်ကြစဉ် ဗိုလ်မှူးချုပ်ကျော်ကျော်စိုးသည် ရခိုင်ပြည်နယ်၊ မြောက်ဦးခရိုင်၊ မြေပုံမြို့၏ တာဝန်ခံဖြစ်သည်။ ၂၀၂၃ ခုနှစ်၊ ဇူလိုင်နောက်ဆုံးပတ်တွင် သူသည် တပ်မတော်မှ အငြိမ်းစားယူခဲ့သည်။

နိုင်ငံရေးဘဝ

တိုင်းဒေသကြီးဘဝ

၂၀၂၄ ခုနှစ်၊ ဖေဖော်ဝါရီ ၁၀ ရက် တွင် နိုင်ငံတော်စီမံအုပ်ချုပ်ရေးကောင်စီသည် နေပြည်တော်ကောင်စီဝင်နှင့် တိုင်း/ပြည်နယ် လမ်းပန်းဆက်သွယ်ရေးဝန်ကြီးနေရာများရှိ ရဲမှူးချုပ်/ရဲမှူးကြီးများကို ရာထူးမှ ဖယ်ရှားပြီး ၎င်းတို့နေရာတွင် အစားထိုးခန့်အပ်မှုများကို ပြုလုပ်ခဲ့သည်။ ထိုတွင် ဦးကျော်ကျော်စိုးသည် ရန်ကုန်တိုင်းဒေသကြီးအစိုးရအဖွဲ့တွင် လမ်းပန်းဆက်သွယ်ရေးဝန်ကြီး ဖြစ်လာခဲ့သည်။

ရွေးကောက်ပွဲ ဝင်ပြိုင်မှု

အထွေထွေရွေးကောက်ပွဲ ၂၀၂၅-၂၀၂၆ တွင် ကြံ့ခိုင်ရေးပါတီ အချိုးကျကိုယ်စားပြုစနစ် ကိုယ်စားလှယ်အဖြစ် ရန်ကုန်တိုင်းဒေသကြီးလွှတ်တော်ရွေးကောက်ပွဲ ဝင်ရောက်ယှဉ်ပြိုင်ခဲ့သည်။ မိခင်ပါတီဖြစ်သည့် ကြံ့ခိုင်ဖွံ့ဖြိုးရေးပါတီမှ ကိုယ်စားလှယ်လောင်းသည် မဲအများဖြင့် အနိုင်ရခဲ့သဖြင့် ၎င်းသည် မြောက်ဥက္ကလာပ မဲဆန္ဒနယ်အမှတ်(၂) ကိုယ်စားလှယ်အဖြစ် တင်မြှောက်ခံရသည်။

၂၀၂၆ ခုနှစ် မတ်လ ၂၀ ရက်တွင် ကျင်းပသော တတိယအကြိမ် ရန်ကုန်တိုင်းဒေသကြီးလွှတ်တော်တွင် ဒုတိယဥက္ကဋ္ဌ အဖြစ် ရွေးချယ်တင်မြှောက်ခံခဲ့သည်။

စာရေးသားမှု

သူသည် စာပေရေးသားခြင်းကို ဝါသနာပါသူဖြစ်သည်။၁၉၉၀ပြည့်နှစ်၊ တြိဂံဒေသတိုင်းစစ်ဌာနချုပ် မဂ္ဂဇင်းတွင် ဗိုလ်ကျော်(ငဖဲ)ကလောင်အမည်ဖြင့် စတင်ရေးသားခြင်းဖြင့် စာပေဘဝကို စတင်ခဲ့သည်။ သူသည် မောင်ရိုး(ငဖဲ)၊ စာရေးဆရာ ငဖဲကလောင်အမည်များကို အသုံးပြုရေးသားခဲ့သည်။ တပ်မတော်က ထုတ်ဝေသည့် စာပေနှင့်မဂ္ဂဇင်းများတွင်သာ အများဆုံး ရေးသားလေ့ရှိသူလည်း ဖြစ်သည်။

ဆုရရှိမှုများ

၂၀၂၄ ခုနှစ်၊ အမျိုးသားစာပေဆု ချီးမြှင့်မှုတွင် စာပဒေသာဆု ဖြင့် ၎င်းရေးသားသည့် "လွမ်းရတမ်းတပါ့ ငဖဲမြေ ကျွန်တော်တို့ရွာ ကျွန်တော်တို့ဓလေ့-၂" စာအုပ်ဖြင့် အမျိုးသားစာပေဆု ရရှိခဲ့သည်။