မောင်ကိုယု (စာရေးဆရာ)

ဝီကီပီးဒီးယား မှ
(ကိုယု၊ မောင်၊ စာရေးဆရာ မှ ပြန်ညွှန်းထားသည်)

ပဲခူးမြို့ ဇိုင်းဂနိုင်း တောင်ပိုင်း ဝင်္ကပါလမ်း (ယခု အစိုးရ အလယ်တန်းကျောင်း အဖြစ် နိုင်ငံတော်ကို လှူဒါန်း ထားသော) နေအိမ်၌ အဖ ဦးအုန်းခိုင်၊ အမိ ဒေါ်ကြင်မေ တို့က ၁၉၃ဝ ပြည့်နှစ် ဖေဖော်ဝါရီ ၁ ရက်နေ့တွင် မွေးဖွား ခဲ့သည်။ မွေးချင်း ၉ ယောက် အနက် သတ္တမမြောက် ဖြစ်သည်။ အမည်ရင်းမှာ ဦးကိုယု ဖြစ်သည်။


ပဲခူး ဟိုက်စကူး ကျောင်းတွင် ပဉ္စမတန်း အထိ ပညာ သင်ကြား ခဲ့သည်။ စစ်ပြီး ကာလ ၁၉၄၅ - ၄၆ တွင် ရန်ကုန် ဟိုက်စကူး ကျောင်း၌ ဆဋ္ဌမတန်းမှ စ၍ ပညာ သင်ယူ ခဲ့သည်။ ၁၉၄၈ တွင် အဋ္ဌမတန်းဖြင့်အတန်းကျော် တက်ပြီး ဖြေဆိုသော 'တန်းမြင့် ကျောင်းထွက်' နှင့်'တက္ကသိုလ် ဝင်ခွင့်' စာမေးပွဲ နှစ်ခု စလုံး ပူးတွဲ အောင်မြင် ခဲ့သည်။ ၁၉၆၁ တွင် ဝိဇ္ဇာဘွဲ့၊ ၁၉၆၄ တွင် ဥပဒေ ဝိဇ္ဇာဘွဲ့ ရရှိ ခဲ့သည်။


အလွတ်ပညာသင် ကျောင်းများတွင် မြန်မာ ဘာသာပြ ဆရာ အဖြစ် လည်းကောင်း၊ ကဆ ကောလိပ်နှင့် ဗိုလ်တထောင် လုပ်သား ကောလိပ် တို့တွင် မြန်မာစာနှင့် သမိုင်း နည်းပြဆရာ အဖြစ် လည်းကောင်း၊ ရန်ကုန် ဝိဇ္ဇာနှင့် သိပ္ပံ တက္ကသိုလ် ဥပဒေပညာဌာနတွင် ၁၉ရဝ ပြည့်နှစ် အထိ လက်ထောက် ကထိက အဖြစ် လည်းကောင်း ထမ်းဆောင် ခဲ့သည်။ ထို့နောက် တရားရုံးချုပ် ရှေ့နေ အဖြစ် အသက်မွေး ဝမ်းကျောင်း ပြုခဲ့သည်။


၁၅ နှစ်သား အရွယ် ကပင် ပြင်ပ ဆောင်းပါး ပြိုင်ပွဲ တခု၌ ပထမဆု ရခြင်းဖြင့် စာပေနယ်သို့ စတင် ခြေလှမ်း ခဲ့သည်။ တရားရုံးချုပ် ရှေ့နေ အဖြစ် အမှု လိုက်ရင်း မြဝတီ၊ ငွေတာရီ၊ ရှုမဝ၊ ချယ်ရီ၊ ပန်၊ သဘင်၊ ဒီလှိုင်း၊ ဝါနီပြာ၊ သည်းဦးပန်း၊ ရတနာသစ်၊ သောင်းပြောင်းထွေလာ ရယ်စရယ်၊ မြတ်လေး မဂ္ဂဇင်း တို့တွင် ဝတ္ထုတို၊ မဂ္ဂဇင်း ဝတ္ထုရှည်များ ရေးခဲ့သည်။ 'မောင်ရင်မောင်၊ မမယ်မ' ဇာတ်ဆောင် အမည် ယူ၍ ခေတ်ပြိုင် သရုပ်ဖော် ဝတ္ထုတိုများ အများအပြား ရေးခဲ့သည်။ 'မောင်သစ်' ကလောင် အမည်ဖြင့် သရော်စာ ဆောင်းပါး များကို သတင်း ဂျာနယ်မှ စတင်ကာ မဂ္ဂဇင်း များစွာ၌ ရေးခဲ့သည်။ ကမ္ဘာကျော် တရားခွင် လျှောက်လဲချက်များ၊ တရားခံ ဖြစ်သွားသော ရှေ့နေ၊ တရားခံနှင့်သူ့ချစ်သူ၊ တရားခံနှင့် သူ့ရှေ့နေ၊ တရားခံ ဘယ်သူလဲ၊ ဂျာမန် ဂန္ထဝင် စာပေများ (အခြား သူများနှင့် တွဲဖက်၍) စသည့်ဘာသာပြန် စာအုပ်များနှင့် ပင်ကိုရေး ခေတ်သစ် မောင်ရင်မောင် မမယ်မနှင့် အခြား ဝတ္ထုတိုများ (၁၉၈၅)၊ မဂ္ဂဇင်း ဝတ္ထုရှည်များ (၁) (၂ဝဝ၃) တို့မှာ ထင်ရှားသည်။ 'ညနေစာ အလှည့်လေး' နှင့် 'လင်ရယ် မယားရယ်' ဝတ္ထုတို များကို မြန်မာ့အသံ ဇာတ်လမ်း ပမာ နားဆင်စရာ အဖြစ် ကြိမ်ဖန်များစွာ ထုတ်လွှင့်ခဲ့သည်။

ဘဝနိဂုံး[ပြင်ဆင်ရန်]

၁၉၉၈ ခု၊ ဒီဇင်ဘာ ၇ ရက်နေ့တွင် ဦးနှောက်အတွင်း (Metastasis) ကင်ဆာ ရောဂါဖြင့် ကွယ်လွန်ခဲ့သည်။

ထင်ရှားသောစာအုပ်အချို့[ပြင်ဆင်ရန်]

  1. ကမ္ဘာကျော်တရားခွင်လျောက်လဲချက်များ
  2. တရားခံဖြစ်သွားသောရှေ့နေ
  3. တရားခံနှင့်သူ့ချစ်သူ
  4. တရားခံနှင့်သူ့ရှေ့နေ
  5. တကယ့်ရှေ့နေ
  6. တရားခံဘယ်သူလဲ
  7. ခေတ်သစ်မောင်ရင်မောင်မမယ်မနှင့်အခြားဝတ္ထုတိုများ
  8. မဂ္ဂဇင်းဝရှည်များ(၁)
  9. ဂျာမန်ဂန္ထဝင်စာပေ(၂-တွဲ)(တည်းဖြတ်)[၁]

ကိုးကား[ပြင်ဆင်ရန်]

  1. ရာပြည့် စုစည်း တည်းဖြတ်သော '၂ဝ ရာစု မြန်မာ စာရေး ဆရာ ၁ဝဝ အတ္ထုပ္ပတ္တိ အကျုဉ်း' စာအုပ်၂ဝဝ၅ ခု၊ ဇူလိုင်
  1. မောင်ကိုယု။ မဂ္ဂဇင်း ဝတ္ထုရှည်များ [၁] (ဒီဇင်ဘာ ၂ဝဝ၃)။ စာ ၁။
  2. မိသားစုဝင်များ၏ ရေးသားပေးချက်။