ကျောက်တော်မြို့

ဝီကီပီးဒီးယား မှ
ကျောက်တော်မြို့
မြန်မာနိုင်ငံရှိ မြို့များ
ကျောက်တော်မြို့ သည် မြန်မာနိုင်ငံ တွင် တည်ရှိသည်
ကျောက်တော်မြို့
ကျောက်တော်မြို့
မြို့တည်နေရာပြ မြန်မာနိုင်ငံမြေပုံ
ကိုဩဒိနိတ်: 20°50′N 92°58′E / 20.833°N 92.967°E / 20.833; 92.967
နိုင်ငံအမည် မြန်မာ
ပြည်နယ် ရခိုင်ပြည်နယ်
ခရိုင်မြောက်ဦးခရိုင်
မြို့နယ်ကျောက်တော်မြို့နယ်
လတ္တီကျု(၂၀)ဒီဂရီ၊ (၅၀)မိနစ်
လောင်ဂျီကျု(၉၂)ဒီဂရီ၊ (၅၈)မိနစ်
အချိန်ဇုန်မြန်မာ စံတော်ချိန် (UTC+ ၆ နာရီ ၃၀ မိနစ်)

ကျောက်တော်မြို့သည် ရခိုင်ပြည်နယ်မြောက်ဦးခရိုင်တွင် ပါဝင်၍ ကျောက်တော်မြို့နယ်၏ ရုံးစိုက်ရာမြို့ ဖြစ်သည်။ ကုလားတန်မြစ်၏ လက်ယာဘက်ကမ်းပေါ်တွင် တည်ရှိ၍ မြို့၏ အကျယ်အဝန်းမှာ အလျား ၃ မိုင် အနံ ၁/၂ မိုင်မျှ ရှိသည်။ ကျောက်တော်မြို့၏ တစ်ဖက်ကမ်း ကုလားတန်မြစ်ကမ်းပါးရှိ ကျောက်တော်တောင်ပေါ်တွင် ကျောက်တော်စေတီ တည်ရှိသည်။

ကျောက်တော်မြို့တွင် ဈေး၊ ဆေးရုံ၊ စာတိုက်နှင့် ကြေးနန်းရုံးများ ရှိသည့်အပြင် အစိုးရအထက်တန်းကျောင်း တစ်ကျောင်းလည်း ရှိသည်။ မြို့ပေါ်၌ ဘုန်းတော်ကြီးကျောင်း ၄ ကျောင်းရှိရာ ယင်းတို့မှာ ရှမ်းရွာကျောင်း၊ မြို့သစ်ကျောင်း၊ သိမ်ကျောင်းနှင့် ကျောက်တော်ကျောင်းများ ဖြစ်ကြသည်။ မြို့သူမြို့သားများသည် ကျောက်တော်မြို့ ပတ်ဝန်းကျင်ရှိ ကန်များမှ သောက်ရေသုံးရေကို ရရှိကြသည်။ ကျောက်တော်မြို့သည် စစ်တွေမြို့မှ ချင်းပြည်နယ်ပလက်ဝမြို့သို့ သွားရာ မီးသင်္ဘောလမ်းပေါ်တွင် တည်ရှိ၍ တောင်တန်းဒေသမှ ထွက်သော ကုန်များနှင့် ရခိုင်မြေပြန့် ဒေသမှ ထွက်သောကုန်များ ဖလှယ်ရာဒေသ ဖြစ်သည်။ ပလက်ဝမြို့နယ်မှ ထွက်သော နာမည်ကျော် ကုလားတန်ဆေးများကို ကျောက်တော်မြို့တွင် ရောင်းဝယ်ဖောက်ကားကြသည်။ ကျောက်တော်မြို့ အနီးတဝိုက်ရှိ ရွာကြီးများ၌ ရက်သတ္တတစ်ပတ်လျှင် ဈေးနေ့ ၂ နေ့မျှ ဖွင့်လှစ်လေ့ရှိသည်။

ကျောက်တော်မြို့ တစ်ဖက်ကမ်းမှ အရှေ့ဘက် ၅ မိုင်ခန့် အကွာတွင် မန္တလေးမဟာမုနိ ရုပ်ပွားတော် မူလ ကိန်းဝပ်တော်မူရာ နေရာဟောင်းတည်ရှိ၍ ထိုနေရာတွင် သူဌေးဦးရဲကျော်သူ လှူဒါန်းထားသော ရုပ်ပွားတော် တစ်ဆူ ကိန်းဝပ်တော်မူသည်။ ကျောက်တော်မြို့မှ မဟာမုနိတန်ဆောင်းသို့ သွားရာလမ်းစဉ်ဖြင့် မြို့ဟောင်းမြို့သို့ ရောက်နိုင်သည်။

သမိုင်းကြောင်း[ပြင်ဆင်ရန်]

မဟာသက္ကရာဇ် ၁၂၃ ခုတွင် ဂေါတမမြတ်စွာဘုရားသခင်သည် ရခိုင်ဘုရင် စန္ဒသူရိယ မနောဒိဌာန်ဖြင့်ပင့်လျောက်၍ ဓညဝတီ ရခိုင်ပြည်သို့ ကြွလာတော်မူခဲ့စဉ် ကျောက်တော်ဘုရား တည်ရှိရာ ကျောက်အတိပြီးသော မောရပဗ္ဗတ တောင်ထက်၌ ရပ်တန့်တော်မူပြီးလျှင် နုစဉ်ဘဝတွင် ထိုဒေသ၌ ပန်းပွတ်သမား ဖြစ်ခဲ့ဘူးကြောင်း၊ ဘုရားသခင် ပရိနိဗ္ဗာန်ပြုတော်မူပြီးနောက် ကျောက်ရိုးတော်ဓာတ်ကို ဤအရပ်၌ ဌာပနာကျောက်တော်စေတီဟု တွင်လတံ့ဟူ၍ ဗျာဒိတ်ထားတော်မူခဲ့ကြောင်းနှင့် ရခိုင်ရာဇဝင်များတွင် ပါရှိ၏။ ထိုကျောက်တော်စေတီကို အစွဲပြု၍ ကျောက်တော်မြို့ဟု ခေါ်တွင်ခြင်း ဖြစ်သည်။

စီးပွားရေး[ပြင်ဆင်ရန်]

ကျောက်တော်မြို့မှ နှစ်စဉ် စပါးတန်ချိန် ၁၃ဝဝဝ ခန့် ထွက်လေသည်။ ယခုအခါ ပိုလျှံသောစပါးများ ကို နိုင်ငံတော် ကောက်ပဲသီးနှံ ရောင်းဝယ်ရေးအဖွဲ့မှ တိုက်ရိုက်ဝယ်ယူလျက်ရှိသည်။ ထိုနယ်တွင် ထင်ရှားသော စပါး ၂ မျိုးမှာ ငကြိန်သီး ခေါ် မီးဒုံးစပါးမျိုးနှင့် လက်ရုံးစပါးခေါ် ငစိန်စပါးမျိုး ဖြစ်သည်။ သို့သော် လူကြိုက်အများဆုံးဆန်မှာ ငါးရာဗိုလ် ဆန် ဖြစ်သည်။

မြို့နယ်လူထုမှာ လယ်ယာကိုင်းကျွန်းပေါ်တွင် အမှီပြု၍ နေထိုင်စားသောက်ကြသည်။ ဆန်စပါး၊ နှမ်း၊ မြေပဲနှင့် ဆေးများကို စိုက်ပျိုးလုပ်ကိုင်ကြသည်။ နှမ်းနှင့် မြေပဲမှ ဆီကို ကြိတ်ယူသည်။ အချို့မှာ သစ်လုပ်ငန်းများကို လုပ်ကိုင်၍ အသက်မွေးကြသည်။ [၁]

ပြင်ပလင့်များ[ပြင်ဆင်ရန်]

ကိုးကား[ပြင်ဆင်ရန်]

  1. မြန်မာ့စွယ်စုံကျမ်း၊ အတွဲ(၁)အပိုင်း(ခ)